`నీది పెద్ద అందమేం కాదు`ః ఆ తొలి అనుభవాలను పంచుకున్న అనుష్క శర్మ..
అనుష్క శర్మ కెరీర్ తొలినాళ్లలో అనేక అవమానాలు ఎదుర్కొందట. తాను అందంగా లేదని చాలా మంది ఎగతాలి చేశారని కన్నీళ్లు పెట్టుకుందట. తాజాగా ఈ అమ్మడికి సంబంధించి ఆసక్తికర విషయాలు వైరల్గా మారాయి.
మేడే సందర్భంగా తన 33వ బర్త్ డే జరుపుకుంది అనుష్క శర్మ. కరోనా నేపథ్యంలో ఈ సారి బర్త్ డే సెలబ్రేషన్స్ కి దూరంగా ఉంది. ఇంతటి క్లిష్ట సమయంలో పుట్టిన రోజు జరుపుకోవడం కరెక్ట్ కాదని చెప్పింది అనుష్క శర్మ.
అయితే ఈ సందర్భంగా అనుష్క శర్మకి సంబంధించిన కొన్ని ఆసక్తికర విషయాలు వైరల్గా మారాయి. ఆమె గతంలో చెప్పిన విషయాలు, కెరీర్ తొలినాళ్లలో తాను ఎదుర్కొన్న అవమానాలను ఇందులో తెలిపింది.
అనుష్క.. షారూఖ్ ఖాన్తో `రబ్ నే బనాదీ జోడీ` చిత్రంతో హీరోయిన్గా పరిచయం అయ్యింది. తొలి సినిమాతోనే షారూఖ్లాంటి స్టార్ హీరోతో నటించే అవకాశం రావడంతో ఒక్కసారిగా ఫేమస్ అయిపోయింది అనుష్క శర్మ. అయితే ఆ సినిమా విడుదలయ్యాక చాలా మంది అనేక రకాలుగా అవమానించారట.
తాను తొలి సినిమా సమయంలో ఆమె వయసు 18ఏళ్లు. కాలేజ్ చేస్తుంది. సినిమా విడుదలయ్యాక కొంత గ్యాప్ రావడంతో కాలేజ్కి వెళ్లింది. దీంతో అక్కడ తొలి అమ్మాయి అనుష్కని కామెంట్ చేసేవారట.
`నేను కాలేజ్లో ఉన్నప్పుడే మోడలింగ్పై ఆసక్తి ఉండేది. అయితే కాలేజ్లో `నువ్వు ఏం అంత అందంగా లేవు, కేవలం సన్నగా నాజుగ్గా ఉన్నందువల్లే అవకాశం వచ్చింది తప్ప నీలో పెద్దగా హీరోయిన్ ఫీచర్స్ లేవంటూ` కామెంట్లు చేసేవారు. ఆ మాటలకు నేను చాలా కుమిలిపోయేదాన్ని` అంటూ అనుష్క తెలిపింది.
`సినిమా తర్వాత కూడా ఉత్తమ నూతన నటిగా ఫిలింఫేర్ అవార్డు దక్కుతుందని భావించి ఆ వేడుకకి వెళితే.. తీరా ఆ అవార్డు దక్కలేదు. దీంతో అప్పుడు కూడా కన్నీళ్లు ఆగలేదు. దీంతో వేదిక వెనక్కి వెళ్లి ఏడుస్తుంటే అమితాబ్ బచ్చన్ వెనుక నుంచి వచ్చి `రబ్ దే బనాది జోడీ` చూశా.. అందులో మీ నటన చాలా బాగుందని చెప్పడం చాలా ఆనందాన్నిచ్చింది. ఆయన మాటే అవార్డుగా భావించా` అని పేర్కొంది అనుష్క.
ఆర్మీ కుటుంబం నుంచి మోడలింగ్లోకి ఎంట్రీ ఇచ్చి అట్నుంచి సినిమారంగ ప్రవేశం చేసిన అనుష్క శర్మ స్టార్ హీరోయిన్గా ఎదిగింది. 2017 డిసెంబరులో విరాట్ కోహ్లీని పెళ్లి చేసుకుంది. జనవరిలో విరుష్కలు వామిక అనే పండంటి ఆడబిడ్డకు జన్మనిచ్చిన సంగతి తెలిసిందే.