ఇలాగే ఆడాల్సింది ... ఇది టెస్టు క్రికెట్ అని గుర్తుంచుకోండి... మహ్మద్ కైఫ్ కౌంటర్...
ఆస్ట్రేలియాతో జరుగుతున్న మూడో టెస్టులో రెండు ఇన్నింగ్స్‌ల్లో హాఫ్ సెంచరీలతో రాణించాడు ఛతేశ్వర్ పూజారా. అయితే మొదటి ఇన్నింగ్స్‌లో 174 బంతుల్లో హాఫ్ సెంచరీ పూర్తిచేసుకున్న ఛతేశ్వర్ పూజారా... టెస్టుల్లో తన స్లోయెస్ట్ హాఫ్ సెంచరీ రికార్డును అధిగమించాడు. బ్యాటింగ్ పిచ్‌పై మరీ ఇంత జిడ్డాట ఆడుతుండడంతో ఛతేశ్వర్ పూజారాపై విమర్శల వర్షం కురిపించాడు కొందరు మాజీ క్రికెటర్లు, నెటిజన్లు.
పూజారా స్లో ఇన్నింగ్స్ డిఫెన్స్ కారణంగా నాన్ స్టైయికింగ్ బ్యాట్స్‌మెన్ ఒత్తిడిలోకి వెళుతున్నారని, టీమిండియా బ్యాటింగ్ ఫెయిల్యూర్‌కి ఇది కూడా ఓ కారణమని కామెంట్ చేశాడు ఆస్ట్రేలియా మాజీ కెప్టెన్ రికీ పాంటింగ్.
పూజారా డిఫెన్స్ చూస్తుంటే పరుగులు చేయడానికి ఆడుతున్నట్టు లేదని, అవుట్ అవుతానేమోననే భయంతో ఆడుతున్నట్టు ఉందని కామెంట్ చేశాడు ఆసీస్ మాజీ క్రికెటర్ ఆలెన్ బోర్డర్ కామెంట్ చేశాడు.
ఈ కామెంట్లపై స్పందించిన ఛతేశ్వర్ పూజారా... ‘నేను బాగానే బ్యాటింగ్ చేశా. అవుట్ అయిన బంతి కూడా మామూలుదేమీ కాదు. ప్యాట్ కమ్మిన్స్ అద్భుతంగా బౌలింగ్ చేస్తున్నాడు. అతన్ని ఎదుర్కొనేటప్పుడు డిఫెన్స్ ఆడాల్సి ఉంటుంది. ఇంతకంటే గొప్పగా నేను ఆడలేను...
నన్ను అవుట్ చేసేందుకు కమ్మిన్స్ వేసిన బంతి, నా దృష్టిలో ‘బాల్ ఆఫ్ ది సిరీస్’గా నిలుస్తుంది... మెల్‌బోర్న్‌లో ప్రాక్టీస్ చేస్తున్న సమయంలో నా చేతికి గాయమైంది. అయితే ఈ మ్యాచ్ చాలా కీలకం. నొప్పి తక్కువగా ఉండడంతో బరిలో దిగాను’ అని చెప్పాడు.
ఛతేశ్వర్ పూజారా డిఫెన్స్‌ను ట్రోల్ చేస్తున్న వారికి గట్టిగా కౌంటర్ ఇచ్చాడు భారత మాజీ క్రికెటర్ మహ్మద్ కైఫ్...
‘అతని డిఫెన్స్ కారణంగా టెస్టు ఫలితం మారనుందా? భారత జట్టు త్వరత్వరగా పరుగులు చేసి, ఇన్నింగ్స్ డిక్లేర్ చేయాలని భావించిందా? లేదు కదా...
9 నెలల నుంచి క్రికెట్‌కి దూరంగా ఉన్న ఛతేశ్వర్ పూజారా, టెస్టు సిరీస్ కోసం ఆస్ట్రేలియా వచ్చాడు. అతను స్లోగా ఆడుతున్నాడని అనేవారికి, అసలు మనసనేది ఉందా?
గుర్తుంచుకోండి ఇది టెస్టు క్రికెట్... వైట్ బాల్ కాంటెస్ట్ కాదు...’ అంటూ ట్వీట్ చేశాడు మహ్మద్ కైఫ్.
రెండో ఇన్నింగ్స్‌లో 170 బంతుల్లో హాఫ్ సెంచరీ పూర్తిచేసుకున్నాడు ఛతేశ్వర్ పూజారా. అయితే హాఫ్ సెంచరీ తర్వాత బౌండరీలతో విరుచుకుపడ్డాడు...
రిషబ్ పంత్‌తో కలిసి నాలుగో వికెట్‌కి 148 పరుగులు జోడించిన పూజారా... 205 బంతుల్లో 12 ఫోర్లతో 77 పరుగులు చేశాడు. ప్యాట్ కమ్మిన్స్ బౌలింగ్‌లో పూజారా కొట్టిన హ్యాట్రిక్ ఫోర్లు... మూడో టెస్టు మ్యాచ్‌కే హైలైట్.
విదేశాల్లో నాలుగో ఇన్నింగ్స్‌లో మొట్టమొదటిసారి హాఫ్ సెంచరీ చేశాడు ఛతేశ్వర్ పూజారా. స్వదేశంలో రెండు సార్లు ఆస్ట్రేలియాపై ఈ ఫీట్ సాధించాడు పూజారా.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
