కేన్ మామ వర్సెస్ డేవిడ్ భాయ్... టీ20 వరల్డ్‌కప్ 2021 ఫైనల్ మ్యాచ్‌‌పై సన్‌రైజర్స్ ఫ్యాన్స్ బెట్టింగ్...

టీ20 వరల్డ్‌కప్ 2021 టోర్నీ కథ క్లైమాక్స్‌కి చేరుకుంది. ఆదివారం నవంబర్ 14న జరిగే ఫైనల్ మ్యాచ్‌లో ఈ పొట్టి ప్రపంచకప్ కొత్త విజేత ఎవరో తేలిపోనుంది... ఈ మ్యాచ్‌పై ఎస్ఆర్‌హెచ్ ఫ్యాన్స్ కూడా ఆసక్తిగా ఎదురుచూస్తున్నారు...

ఐపీఎల్ 2021 సీజన్‌లో సన్‌రైజర్స్ హైదరాబాద్ అట్టర్ ఫ్లాప్ పర్ఫామెన్స్ ఇచ్చింది. ఆటతోనే కాదు, వివాదాలతోనూ నిత్యం వార్తల్లో నిలిచింది... ముఖ్యంగా డేవిడ్ వార్నర్‌ను కెప్టెన్సీ నుంచి తొలగించడం హాట్ టాపిక్ అయ్యింది...

2016 సీజన్‌లో సన్‌రైజర్స్‌కి ఐపీఎల్ టైటిల్ అందించిన డేవిడ్ వార్నర్‌ని కాదని, 2018 సీజన్‌లో టీమ్‌ను ఫైనల్ చేర్చిన కేన్ విలియంసన్‌కి కెప్టెన్సీ అప్పగించింది. ఆరు మ్యాచులు పూర్తయిన తర్వాత జరిగిన ఈ మార్పు, జట్టు పర్ఫామెన్స్‌పై తీవ్ర ప్రభావం చూపించింది...

అయితే టీమ్ మేనేజ్‌మెంట్ తీసుకున్న నిర్ణయాలను పట్టించుకోకుండా సోషల్ మీడియాలో కేన్ మామపై ప్రేమను బహిరంగంగానే వ్యక్తం చేశాడు డేవిడ్ వార్నర్ భాయ్...

టీ20 వరల్డ్‌కప్ 2021 టోర్నీ ఫైనల్ మ్యాచ్‌లో తలబడేది న్యూజిలాండ్ వర్సెస్ ఆస్ట్రేలియా జట్లు అయితే సన్‌రైజర్స్ హైదరాబాద్ ఫ్యాన్స్‌కి అది కేన్ మామ వర్సెస్ వార్నర్ భాయ్ మ్యాచ్...

ఐపీఎల్ 2022 సీజన్‌కి మెగా వేలం జరగనుంది. ఈ మెగా వేలంలో ఏ జట్టుకైనా ఇద్దరు ఫారిన్ ప్లేయర్లను మాత్రమే అట్టిపెట్టుకునేందుకు అవకాశం ఉంది. సన్‌రైజర్స్ హైదరాబాద్ వార్నర్ భాయ్‌ని వదిలేయనుందని టాక్ నడుస్తోంది...

సన్‌రైజర్స్ హైదరాబాద్ కెప్టెన్ కేన్ విలియంసన్‌తో పాటు ఆల్‌రౌండర్ రషీద్ ఖాన్‌ని అట్టిపెట్టుకుని మిగిలిన ప్లేయర్లను వేలానికి విడుదల చేయబోతున్నట్టు ప్రచారం నడుస్తోంది...

డేవిడ్ వార్నర్ కూడా సన్‌రైజర్స్ హైదరాబద్‌తో తన అనుబంధం ముగిసిందని, కొత్తగా ప్రయాణం మొదలెట్టాల్సిన సమయం వచ్చేసిందని తెలిపాడు. వచ్చే సీజన్‌లో వార్నర్ దాదాపు వేరే జట్టుకి ఆడడం ఖాయంగా మారింది...

టీ20 వరల్డ్‌కప్ 2021 టోర్నీ ప్రాక్టీస్ మ్యాచుల్లో ఫెయిల్ అయినా సూపర్ 12 రౌండ్‌లో డేవిడ్ వార్నర్ అద్భుతంగా రాణించి, ఆస్ట్రేలియా ఫైనల్ దాకా రావడానికి కారణమయ్యాడు...

పాకిస్తాన్‌తో జరిగిన మ్యాచ్‌లోనూ 49 పరుగులు చేసిన డేవిడ్ వార్నర్, అంపైర్ వివాదాస్పద నిర్ణయం కారణంగా పెవిలియన్ చేరాడు. వార్నర్ భాయ్ బ్యాటుకి బాల్ తగలకపోయినా, అంపైర్ అవుట్ ఇవ్వగానే రివ్యూ కూడా తీసుకోకుండా పెవిలియన్ చేరాడు...

వార్నర్ భాయ్ పర్ఫామెన్స్‌తో ఫుల్లు హ్యాపీగా ఉన్న సన్‌రైజర్స్ హైదరాబాద్ ఫ్యాన్స్, ఈ సారి ఆయన్ని రిటైన్ చేసుకోవాలంటూ ఆరెంజ్ ఆర్మీకి మెసేజ్‌ల మీద మెసేజ్‌లు పెడుతున్నారు...

ఫైనల్ మ్యాచ్‌లో ఎవరు గెలుస్తారో వారిని రిటైన్ చేసుకోవాలని సన్‌రైజర్స్ హైదరాబాద్ ఫ్యాన్స్ ఓ కొత్త పోటీని సోషల్ మీడియాలో మొదలెట్టారు. టీ20 వరల్డ్‌కప్ టోర్నీలో ఆస్ట్రేలియా గెలిస్తే వార్నర్ భాయ్‌ని రిటైన్ చేసుకోవాలని, న్యూజిలాండ్ గెలిస్తే కేన్ మామను రిటైన్ చేసుకోవాలంటూ డిమాండ్ చేస్తున్నారు.