బుమ్రా: ఐపీఎల్ 2025 కోసం ఛాంపియన్స్ ట్రోఫీలో ఆడటం లేదా?

Champions Trophy 2025: ఛాంపియన్స్ ట్రోఫీ 2025 నుంచి గాయల కారణంగా జస్ప్రీత్ బుమ్రా జట్టుకు దూరం అయ్యాడు. అయితే, ఐపీఎల్ 2025 కోసమేనంటూ మరో కొత్త చర్చ మొదలైంది.

భారత క్రికెట్ నియంత్రణ మండలి (బీసీసీఐ) వెన్ను గాయం కారణంగా ఛాంపియన్స్ ట్రోఫీ 2025 నుంచి బుమ్రాను తప్పించింది. బీసీసీఐ ఈ నిర్ణయం పూర్తిగా వైద్యపరమైనదే అని చెబుతున్నప్పటికీ, బుమ్రాను ఐపీఎల్ 2025, ముంబై ఇండియన్స్ కోసం కాపాడుతున్నారా అనే ప్రశ్నలు తలెత్తుతున్నాయి. ఇప్పుడు ఇదే విషయంలో క్రికెట్ సర్కిల్ లో హాట్ టాపిక్ గా మారింది. 

2022లో వెన్ను శస్త్రచికిత్స చేయించుకున్న బుమ్రా, ఆస్ట్రేలియాతో సిడ్నీలో జరిగిన చివరి టెస్టులో బౌలింగ్ చేస్తున్నప్పుడు మరోసారి గాయానికి గురయ్యాడు. జాతీయ క్రికెట్ అకాడమీ (ఎన్‌సిఏ)లో ఫిజికల్ ట్రైనర్  రజనీకాంత్, ఫిజియో థులసి పర్యవేక్షణలో ఉన్నాడు. సెలెక్టర్లు అతని ఫిట్‌నెస్‌పై రిస్క్ తీసుకోవడానికి ఇష్టపడలేదు.

ఎన్సీయే నివేదిక ఏం చెబుతోంది?

ఎన్సీయే చీఫ్ నితిన్ పటేల్ పంపిన నివేదిక ప్రకారం, బుమ్రా తన పునరావాసం పూర్తి చేసుకున్నాడు, స్కాన్ నివేదికలు కూడా క్లియర్‌గా ఉన్నాయి. అయితే ఛాంపియన్స్ ట్రోఫీ ప్రారంభమయ్యే సమయానికి అతను మ్యాచ్‌కు సిద్ధంగా ఉంటాడో లేదో తెలియదు అని బీసీసీఐ వర్గాలు పీటీఐకి తెలిపాయి. అహ్మదాబాద్‌లో ప్రధాన సెలెక్టర్ అజిత్ అగార్కర్, ప్రధాన కోచ్ గౌతమ్ గంభీర్, కెప్టెన్ రోహిత్ శర్మల మధ్య జరిగిన చర్చల తర్వాత ఈ నిర్ణయం తీసుకున్నారు.

అయితే, ఛాంపియన్స్ ట్రోఫీ నుంచి బుమ్రా దూరంగా ఉండటం నిజంగా ఫిట్‌నెస్ సమస్యల కారణంగానా లేదా ఐపీఎల్ 2025లో ముంబై ఇండియన్స్ కోసం అతని లభ్యతను నిర్ధారించుకోవడానికి వ్యూహాత్మక చర్యనా అని అభిమానులు సోషల్ మీడియాలో ప్రశ్నిస్తున్నారు.

Image Credit: Getty Images

జాతీయ జట్టు కంటే ఐపీఎల్ ముఖ్యమా? 

బుమ్రాను జట్టులోకి తీసుకోకపోవడంపై సోషల్ మీడియాలో మిశ్రమ స్పందనలు వెల్లువెత్తాయి. చాలా మంది ఈ నిర్ణయంపై ప్రశ్నలు లేవనెత్తారు. "ఛాంపియన్స్ ట్రోఫీలో బుమ్రా గాయంపై ముంబై ఇండియన్స్ ఎంత ప్రభావం చూపిందో నాకు ఆశ్చర్యంగా ఉంది" అని ఒక ఎక్స్ యూజర్ రాశారు.

మరొకరు ఇలా అన్నారు, "గుడ్ న్యూస్.. ముంబై ఇండియన్స్ బుమ్రాకు విశ్రాంతి ఇచ్చింది. అతను ఐపీఎల్‌కు ఫిట్‌గా ఉంటాడు. ఐపీఎల్ తర్వాత అతను మళ్లీ భారత జట్టు నుంచి విశ్రాంతి తీసుకుంటాడు. త్వరలో అతను దేశం తరపున ఆడటం మానేసి, శాశ్వత క్లబ్ ఆటగాడిగా మారతాడు." అంటూ ఘాటుగా కామెంట్ చేశాడు.

బీసీసీఐ జాతీయ కమిట్‌మెంట్ల కంటే ఐపీఎల్ ఫ్రాంచైజీలకు ప్రాధాన్యతనిస్తుందని విమర్శకులు ఆరోపిస్తున్నారు. "ఐపీఎల్ ఐసీసీ కంటే ప్రాధాన్యత సంతరించుకున్నప్పుడు. గతంలో బీసీసీఐ ఐసీసీ ట్రోఫీలను లక్ష్యంగా చేసుకునేది, ఇప్పుడు ఐపీఎల్ చాలా ముఖ్యమైనది, బుమ్రా ఛాంపియన్స్ ట్రోఫీ కోసం విశ్రాంతి తీసుకుంటున్నాడు, తద్వారా అతను ఐపీఎల్ ఆడగలడు" అని మరో ఎక్స్ యూజర్ కామెంట్ చేశాడు. 

Rohit Sharma and Jasprit Bumrah. (Picture: ICC)

బుమ్రా స్థానంలో జట్టులోకి హర్షిత్ రాణా

ఇదిలా ఉండగా, బుమ్రా స్థానంలో హర్షిత్ రాణాను ఎంపిక చేశారు. టీమిండియా యంగ్ ప్లేయర్ యశస్వి జైస్వాల్ స్థానంలో మిస్టరీ స్పిన్నర్ వరుణ్ చక్రవర్తిని జట్టులోకి తీసుకున్నారు. మార్చి 21న ఐపీఎల్ ప్రారంభం కానుండగా, అందరి దృష్టీ బుమ్రా కోలుకోవడంపైనే ఉంది. అతను ముంబై ఇండియన్స్ బౌలింగ్ విభాగానికి నాయకత్వం వహిస్తే, బీసీసీఐ గాయాల నిర్వహణ విధానాలు, అగ్రశ్రేణి ఫాస్ట్ బౌలర్లను ఎలా నిర్వహిస్తుందనే దానిపై పెరుగుతున్న సందేహాలకు మరింత ఆజ్యం పోసినట్లే అవుతుంది.

గౌతమ్ గంభీర్ కామెంట్స్ వైరల్ 

ఊహాగానాల నడుమ, భారత ప్రధాన కోచ్ గౌతమ్ గంభీర్ ఈ అంశంపై మాట్లాడుతూ, "అతను జట్టులో లేడన్నది వాస్తవం. కానీ అన్ని వివరాలు నేను మీకు ఇవ్వలేను, ఎందుకంటే అతను ఎంతకాలం దూరంగా ఉంటాడో, ఇతర విషయాల గురించి మాట్లాడటం వైద్య బృందం ఇష్టం, ఎందుకంటే ఎన్‌సిఏలోని వైద్య బృందమే నిర్ణయిస్తుంది." అని అన్నారు."మేము బుమ్రా జట్టులో ఉండాలని మొదటి నుంచి ఆశించాము. ఎందుకంటే అతను ఏం చేయగలడో మాకు తెలుసు, అతను ప్రపంచ స్థాయి ఆటగాడు. కానీ కొన్ని విషయాలు మన చేతుల్లో ఉండవు. కాబట్టి ఇది హర్షిత్ రాణా, అర్ష్‌దీప్ సింగ్ వంటి కొంతమంది యువకులు తమ ప్రతిభను చూపించి, దేశం కోసం ఏదైనా చేయడానికి ఒక అవకాశం కోసం చూస్తున్నారు. కొన్నిసార్లు ఇవి మీరు వెతుకుతున్న అవకాశాలు కావచ్చు. హర్షిత్ సిరీస్ అంతటా అద్భుతంగా ఆడాడు. అతను కొన్ని ముఖ్యమైన వికెట్లు తీసుకున్నాడు. అర్ష్‌దీప్ ఏమి చేయగలడో మనందరికీ తెలుసు. అయితే, బుమ్రాను మిస్ అవుతున్నామనేది నిజం. ఇదే సమయంలో మహ్మద్ షమీ వంటి అనుభవజ్ఞుడైన పేసర్ తిరిగి రావడం మంచి విషయం" అని గంభీర్ తెలిపాడు.

Jasprit Bumrah

ఛాంపియన్స్ ట్రోఫీ 2025 కోసం భారత జట్టు 

రోహిత్ శర్మ (కెప్టెన్), శుభ్‌మన్ గిల్ (వైస్ కెప్టెన్), విరాట్ కోహ్లీ, శ్రేయాస్ అయ్యర్, కేఎల్ రాహుల్ (వికెట్ కీపర్), రిషబ్ పంత్ (వికెట్ కీపర్), హార్దిక్ పాండ్యా, అక్షర్ పటేల్, వాషింగ్టన్ సుందర్, కుల్దీప్ యాదవ్, హర్షిత్ రాణా, మహ్మద్ షమీ, అర్ష్‌దీప్ సింగ్, రవీంద్ర జడేజా, వరుణ్ చక్రవర్తి.

రిజర్వు ప్లేయర్లు: యశస్వి జైస్వాల్, మహ్మద్ సిరాజ్, శివమ్ దూబే. అవసరమైనప్పుడు ఈ ముగ్గురు ఆటగాళ్లు దుబాయ్‌ లో టీమ్ తో కలుస్తారు.