సంజూ శాంసన్ టీమిండియా కెప్టెన్ అవుతాడంటున్న డివిలియర్స్.. టీమ్‌లో ప్లేసే దిక్కులేదు, అయ్యేపనేనా..?

IPL 2023: ఐపీఎల్ లో  రాజస్తాన్ రాయల్స్ తరఫున సారథిగా వ్యవహరిస్తున్న  సంజూ శాంసన్ ఏదో ఒకరోజు టీమిండియా సారథి అవుతాడంటున్నాడు డివిలియర్స్. 

ఐపీఎల్ లో రాజస్తాన్ రాయల్స్ కు  సారథిగా వ్యవహరిస్తున్న  సంజూ శాంసన్.. రాబోయే రెండు మూడేండ్లలో టీమిండియాకు కెప్టెన్ అవుతాడని, అందుకు గల లక్షణాలు  సంజూలో పుష్కలంగా ఉన్నాయని అంటున్నాడు   దక్షిణాఫ్రికా మాజీ ఆటగాడు  ఏబీ డివిలియర్స్.   ఇటీవలే పంజాబ్ కింగ్స్ తో రాజస్తాన్ రాయల్స్ మ్యాచ్ ముగిసిన తర్వాత  డివిలియర్స్ ఈ  వ్యాఖ్యలు చేశాడు. 

డివిలియర్స్ మాట్లాడుతూ.. ‘సంజూ శాంసన్ గురించి మనందరికీ తెలుసు.  కానీ అతడి కెప్టెన్సీ గురించి ఎంతమందికి తెలుసు..?   అతడి పేరు చెప్పగానే నాకు గుర్తొచ్చేది  సంజూ ప్రశాంతత.  కెప్టెన్ గా చేసేప్పుడు సంజూ  చాలా కామ్ అండ్ కంపోజ్డ్ గా ఉంటాడు.  ముఖంలో ఎలాంటి భావం కూడా  కనబడదు.   ప్రశాంతంగా ఉంటాడు.  

అసలు సంజూ వ్యూహాలు ఏంటి..? వాటిని పసిగట్టడానికి ట్రై చేస్తే ఆ అవకాశమే ఉండదు.  ఒక కెప్టెన్ కు ఉండాల్సిన లక్షణాల్లో ఇది కూడా ఒకటి.   అతడు  ఇంకా ఇంప్రూవ్ అవ్వాల్సింది ఉన్నా రాబోయే రోజుల్లో అనుభవం నుంచి దానిని నేర్చుకుంటాడు.  ఇక టీమ్ లో  జోస్ బట్లర్ వంటి అనుభవజ్ఞుడు అతడితో ఉండటం  వల్ల ఎక్కువ టైమ్  అతడితో గడపడం వల్ల అది శాంసన్ కు ఎంతో ఉపకరిస్తున్నది. వాస్తవానికి బట్లర్.. రాజస్తాన్ కు దొరికిన పెద్ద ఆస్తి. 

Sanju Samson

బట్లర్ మార్గదర్శకత్వంలో సంజూ రాబోయే రోజుల్లో ఇంకా చాలా నేర్చుకుంటాడు.   ఏదో ఒకరోజు.. బహుశా రాబోయే  రెండు, మూడేండ్లలో భారత్ తరఫున ఏదో ఒక ఫార్మాట్ లో  సంజూ  సారథిగా ఉంటాడని అనిపిస్తుంది...’అని జియో సినిమాతో చెప్పాడు.

అయితే  డివిలియర్స్  చెప్పినట్టు భారత  జట్టుకు సంజూ సారథ్యం వహించే అవకాశం అయితే దాదాపుగా లేదు. ఎందుకంటే  సంజూను టీమ్ లో ఆడించడమే గగనం.  నిన్నా మొన్నటిదాకా  రిషభ్ పంత్  ను కాదని అతడిని టీమ్ లోకి చేర్చుకోవడానికే బీసీసీఐ పెద్దలు సాహసం చేయలేదు. 

అడపాదడపా అవకాశాలిచ్చిన  ప్రతిసారి శాంసన్  నిరూపించుకున్నాడు.  కానీ  ఇప్పటికీ అతడు టీమిండియాలో రెగ్యురల్ మెంబర్ కాదు. ఎవరో గాయపడితేనో లేక ఎవరైనా ఆటగాడికి విరామం ఇస్తే తప్ప  శాంసన్ కు టీమ్ లో చోటు దక్కే పరిస్థితి లేదు. అలాంటి సమయంలో  సంజూకు టీమిండియా పగ్గాలు దక్కడమనేది అతిశయోక్తే అవుతుంది.