పంజాబ్కు గుడ్ న్యూస్.. విధ్వంసక ఆల్ రౌండర్ వచ్చేస్తున్నాడు..
IPL 2023: ఐపీఎల్ - 16లో వరుసగా రెండు విజయాలతో దూకుడు మీదున్న పంజాబ్ కింగ్స్ కు మరో శుభవార్త. ఆ జట్టు కీలక ఆల్ రౌండర్ త్వరలోనే జట్టుతో కలవబోతున్నాడు.
ఈ సీజన్ లో ఆడిన రెండు మ్యాచ్ లలోనూ నెగ్గి పాయింట్ల పట్టికలో మూడో స్థానంలో ఉన్న పంజాబ్ కింగ్స్ కు మరో శుభవార్త. మరో మూడు నాలుగు రోజుల్లో ఆ జట్టు విధ్వంసక ఆల్ రౌండర్ లియామ్ లివింగ్స్టొన్ పంజాబ్ తో కలవనున్నాడు. ఈ మేరకు అతడే కీలక అప్డేట్స్ అందించాడు.
గత సీజన్ కు ముందు వేలంలో రూ. 11 కోట్లు వెచ్చించి లివింగ్స్టొన్ ను దక్కించుకున్న పంజాబ్ కు అతడు మెరుగైన ప్రదర్శనలు చేశాడు. 2022లో ఆడిన 14 మ్యాచ్ లలో 437 పరుగులు సాధించాడు. బౌలింగ్ లో కూడా ఆరు వికెట్లు పడగొట్టాడు.
కానీ ఈ సీజన్ కు నాలుగు నెలల ముందు డిసెంబర్ లో పాకిస్తాన్ తో జరిగిన టెస్టు సిరీస్ లో భాగంగా లివింగ్స్టొన్ రావల్పిండి టెస్టులో ఆడాడు. ఇదే అతడికి తొలి టెస్టు మ్యాచ్. ఈ టెస్టులో చీలమండ గాయంతో క్రికెట్ కు దూరమయ్యాడు.
2023 సీజన్ కు ముందు లివింగ్స్టొన్ తాను ఫిట్నెస్ గా ఉన్నానని,ఐపీఎల్ లో ఆడతానని ప్రకటించాడు. కానీ ఇంగ్లాండ్ అండ్ వేల్స్ క్రికెట్ బోర్డు (ఈసీబీ) అతడకి ఐపీఎల్ ఆడేందుకు నో ఆబ్జెక్షన్ సర్టిఫికెట్ (ఎన్వోసీ) ఇవ్వలేదు. దీంతో అతడు ఇంగ్లాండ్ లోనే ఉండిపోవాల్సి వచ్చింది.
కానీ పూర్తి ఫిట్నెస్ సాధించడంతో పాటు రిహాబిటేషన్ కూడా పూర్తి చేసుకున్న లివింగ్స్టొన్ తాను ఐపీఎల్ ఆడేందుకు సిద్ధంగా ఉన్నానని చెప్పాడు. స్కై స్పోర్ట్స్ కు ఇచ్చిన ఇంటర్వ్యలో అతడు మాట్లాడుతూ.. ‘చాలా రోజలుగా గాయంతో ఇంట్లోనే ఉంటున్నా. చివరికి ఇది ముగిసింది. ఈ వారాంతంలో గానీ వచ్చే వారం ఆరంభంలో గానీ ఇండియాలో ఉంటా. రాబోయే రెండు మూడు రోజుల్లోనే ఎన్వోసీ కూడా అందుతుంది..’ అని తెలిపాడు.
గాయం కారణంగా తన కెరీర్ లో హయ్యస్ట్, లోయెస్ట్ ఫేజ్ లను చూశానని, రీహాబిటేషన్ వల్ల తాను రిలాక్స్ అయ్యానని లివింగ్స్టొన్ చెప్పాడు. ఫ్రెష్ మైండ్ తో ఐపీఎల్ లోకి బరిలోకి దిగబోతున్నానని రాబోయే సీజన్ లో కూడా రాణిస్తానని అన్నాడు. కాగా పంజాబ్.. ఈనెల 9న హైదరాబాద్ తో ఆడనుంది. ఈ మ్యాచ్ కు లివింగ్స్టొన్ దూరంగా ఉన్నా ఏప్రిల్ 13న గుజరాత్ టైటాన్స్ తో ఆడబోయే మ్యాచ్ కు మాత్రం అందుబాటులో ఉండే అవకాశాలున్నాయని పంజాబ్ కింగ్స్ వర్గాలు తెలిపాయి.