మళ్లీ ఐపీఎల్‌లో ఢిల్లీ బాయ్స్ గొడవ! అప్పుడు కోహ్లీ వర్సెస్ గౌతమ్ గంభీర్... ఇప్పుడు నితీశ్ రాణాతో హృతిక్...

టీమిండియాకి ఒకే టీమ్ తరుపున ఆడే ప్లేయర్లు, ఐపీఎల్‌లో వేర్వేరు టీమ్ తరుపున ఆడుతూ మాటామాటా అనుకోవడం చాలా నార్మల్ అయిపోయింది. శ్రీశాంత్‌ని హర్భజన్ సింగ్ చెంప దెబ్బ కొట్టడం ఐపీఎల్ చరిత్రలో మాయని మచ్చగా మిగిలిపోతే, అప్పుడెప్పుడో విరాట్ కోహ్లీతో జరిగిన వాగ్వాదాన్ని ఇప్పటికీ మరిచిపోలేదు గౌతమ్ గంభీర్...

Kohli-Gambhir

2013 సీజన్‌లో కేకేఆర్‌తో జరిగిన మ్యాచ్‌లో లక్ష్మీపతి బాలాజీ ఓవర్‌లో సిక్సర్ బాదిన విరాట్ కోహ్లీ, ఆ తర్వాతి బంతికి అదే విధమైన షాట్‌కి ప్రయత్నించి అవుట్ అయ్యాడు. కోహ్లీ అవుట్ కాగానే బాలాజీ ఏదో తిట్టడం, దానికి విరాట్ కోహ్లీ కూడా ఘాటుగా రియాక్ట్ అవ్వడంతో గొడవ మొదలైంది.

పెవిలియన్‌కి వెళ్తున్న విరాట్ కోహ్లీ, వెనక్కి వచ్చి కేకేఆర్ కెప్టెన్ గౌతమ్ గంభీర్‌తో గొడవ పడ్డారు. ఈ ఇద్దరూ దాదాపు కొట్టుకునే స్థాయిలో వాగ్వాదం జరిగింది. మరో ఢిల్లీ క్రికెటర్ రజత్ భాటియా వచ్చి ఈ ఇద్దరినీ నిలువరించాడు. 10 సీజన్లు గడిచినా ఈ ఢిల్లీ బాయ్స్ గొడవని అటు విరాట్ కోహ్లీ కానీ, ఇటు గౌతమ్ గంభీర్ కానీ మరిచిపోలేదు.. ఈ ఇద్దరూ కూడా దేశవాళీ క్రికెట్‌లో ఢిల్లీ తరుపున ఆడినవాళ్లే.

Image credit: PTI

తాజాగా మరోసారి గ్రౌండ్‌లో ఢిల్లీ బాయ్స్ మధ్య గొడవ జరిగింది. ముంబై ఇండియన్స్ వర్సెస్ కేకేఆర్ మధ్య మ్యాచ్‌లో ఇన్నింగ్స్ 9వ ఓవర్‌లో హృతిక్ షోకీన్ బౌలింగ్‌లో భారీ షాట్‌కి ప్రయత్నించిన నితీశ్ రాణా, సబ్‌స్టిట్యూట్ ఫీల్డర్ రమన్‌దీప్‌కి క్యాచ్ ఇచ్చి అవుట్ అయ్యాడు...

వికెట్ తీసిన వెంటనే నితీశ్ రాణాని కోపంగా చూస్తూ హృతీక్ షోకీన్ ... ‘వెళ్లు వెళ్లు..  *** వెళ్లి డగౌట్‌లో కూర్చో’ అంటూ బూతులు తిట్టాడు. హృతీక్ షోకీన్‌ మాటలు విన్న నితీశ్ రాణా, ‘ఏమన్నావ్ మళ్లీ అను’ అంటూ అడిగాడు...

దానికి మరింత రెచ్చిపోయిన హృతీక్ షోకీన్, ‘వెళ్లు రా... ***’ అంటూ మరోసారి బూతులు తిట్టాడు. దీంతో నితీశ్ రాణా.. ‘బాప్‌ సే లడ్ రహా హై అప్‌నే’ (నువ్వు నీ తండ్రితో గొడవ పడుతున్నావ్’ అంటూ బూతుల వర్షం కురిపించాడు...

పరిస్థితి అదుపు తప్పుతుండడంతో ముంబై ఇండియన్స్ కెప్టెన్ సూర్యకుమార్ యాదవ్, సీనియర్ బౌలర్ పియూష్ చావ్లా కలగచేసుకుని నితీశ్ రాణాని అక్కడి నుంచి పంపించారు. 

తమిళనాడు ప్లేయర్లు, ఐపీఎల్‌లో కలిసినప్పుడు అప్యాయంగా పలకరించుకుంటే... ఆవేశాన్ని అణువణువునా నింపుకున్న ఢిల్లీ ప్లేయర్లు మాత్రం ఇలా తిట్టుకుంటూ ఉంటారని సోషల్ మీడియాలో ‘ఢిల్లీ బాయ్స్’ ట్యాగ్‌తో ఈ ఫైట్‌ని వైరల్ చేస్తున్నారు ఐపీఎల్ ఫ్యాన్స్..