నా భార్యను చూసుకోడానికే టైం లేదు.. ఇంక ఐపీఎల్ ఏం ఆడాలి..? ఆసీస్ పేసర్ మిచెల్ స్టార్క్ సంచలన వ్యాఖ్యలు

IPL:  రెండు నెలల్లో కోట్లు కురిపించే ఇండియన్ ప్రీమియర్ లీగ్ (ఐపీఎల్) లో ఆడాలని కోరుకోని ప్లేయర్ ఉండడు. అయితే ఫామ్, ఫిట్నెస్ రెండూ ఉన్నా  ఆసీస్ పేసర్ మిచెల్ స్టార్క్ మాత్రం ఈ లీగ్ కు దూరంగా ఉంటున్నాడు. 

తక్కువ వ్యవధిలో కోట్లు సంపాదించే ఛాన్స్ ఉన్న అతికొద్ది క్రీడల్లో ఐపీఎల్ ఒకటి. ముఖ్యంగా ప్రపంచవ్యాప్తంగా నేమ్, ఫేమ్ ఉన్న క్రికెటర్ ఈ లీగ్ లో ఆడితే అతడి పంట పండినట్టే. ఆటగాళ్లపై కోట్లాది రూపాయలు కుమ్మరిస్తున్న ఈ లీగ్ ఆడటానికి ఆసక్తి చూపని ఆటగాళ్లు చాలా తక్కువ. 

ఈ జాబితాలో మొదటి వరుసలో వచ్చే ఆటగాడి పేరు మిచెల్ స్టార్క్. ఆస్ట్రేలియాకు చెందిన ఈ స్టార్ పేసర్ చివరిసారి 2015 సీజన్ లో ఐపీఎల్ లో మెరిశాడు. ఆ తర్వాత ఐపీఎల్ లో ఆడలేదు. ఐపీఎలే కాదు.. ఆసీస్ లో నిర్వహించే బిగ్ బాష్ లీగ్ (బీబీఎల్) లో కూడా స్టార్క్ పాల్గొనడు. 

కోట్లాది రూపాయలు సంపాదించుకునే అవకాశమున్న ఫ్రాంచైజీ క్రికెట్ లొ ఆడకపోవడంపై ఈ స్టార్ పేసర్ తాజాగా స్పందించాడు. తనకు ఆస్ట్రేలియా తరఫున ఆడటమే ముఖ్యమన్న స్టార్క్.. ఖాళీ దొరికితే తన భార్యను చూసుకోవడానికే టైమ్ సరిపోవట్లేదని చెప్పుకొచ్చాడు. 

ఈఎస్పీఎన్ క్రిక్ ఇన్ఫో కు ఇచ్చిన ఇంటర్వ్యూలో  స్టార్క్ మాట్లాడుతూ.. ‘నేను బీబీఎల్ లో ఆడేప్పుడు చాలా ఎంజాయ్ చేసేవాడిని.  కానీ గడిచిన ఏడేండ్లలో ఫ్రాంచైజీ క్రికెట్ మీద నా అభిప్రాయం మారింది.  ఐపీఎల్, బీబీఎల్ కంటే నాకు ఆస్ట్రేలియా తరఫున ప్రాతినిథ్యం వహించడమే ముఖ్యం.  

జాతీయ జట్టు తరఫున ఆడి మంచి ప్రదర్శనలివ్వడం, నా దేశం కోసం శక్తి మేర కృషి చేయడానికే నేను తొలి ప్రాధాన్యమిస్తాను. అందుకే నేను ఈ లీగ్  క్రికెట్ ను పక్కనబెట్టాను. అదీగాక ఆసీస్ తరఫున మేం తీరిక లేని క్రికెట్ ఆడుతున్నాం. రాబోయే 18 నెలలలో మాకు ఊపిరిసలపని షెడ్యూల్ ఉంది.  నేనెప్పుడూ ఆస్ట్రేలియాకు ఆడటానికే ప్రాధాన్యం ఇస్తాను.  

నాకు ఖాళీ సమయం దొరికితే ఇంట్లో గడపడానికే  మొదటి ప్రాధాన్యమిస్తా. నా భార్యను కూడా చూసుకోవాలి కదా...’ అని వ్యాఖ్యానించాడు. స్టార్క్ భార్య అలిస్సా హీలి కూడా క్రికెటరే. ఆసీస్ మహిళా క్రికెట్ జట్టులో వికెట్ కీపర్ గా సేవలందిస్తున్న హీలి.. ఇటీవలే న్యూజిలాండ్ వేదికగా ముగిసిన వన్డే వరల్డ్ కప్  ఫైనల్ లో 175 పరుగులు చేసి ఆ జట్టు విజయంలో కీలక పాత్ర పోషించిన విషయం తెలిసిందే. 

ఇక స్టార్క్ ఫ్రాంచైజీ క్రికెట్ హిస్టరీ విషయానికొస్తే.. అతడు బీబీఎల్ లో 2014-15 సీజన్ లో సిడ్నీ సిక్సర్స్ తరఫున ఆడాడు. ఈ లీగ్ లో 2015 తర్వాత అతడు మళ్లీ కనిపించలేదు.

ఐపీఎల్ లో  ఆర్సీబీ తరఫున 2015వ సీజన్ లో పాల్గొన్నాడు. 2018 లో కేకేఆర్ స్టార్క్ ను వేలంలో దక్కించుకున్నా అతడు గాయం కారణంగా టోర్నీ నుంచి తప్పుకున్నాడు. ఆ తర్వాత సీజన్ల నుంచి  స్టార్క్  ఫ్రాంచైజీ క్రికెట్ కు దూరంగా ఉంటున్నాడు. ప్రస్తుతం లంక పర్యటనలో ఉన్న ఆసీస్ జట్టులో స్టార్క్ సభ్యుడు. ఇటీవలే ముగిసిన  గాలే టెస్టులో ఒక వికెట్ తీశాడు.