ఫ్యూచ‌ర్ టెండూల్క‌ర్ అన్నారు- చివ‌ర‌కు టీమ్ నుంచి పంపేశారు - ఈ యంగ్ స్ట‌ర్ కెరీర్ ముగిసినట్టేనా?

Is Prithvi Shaw's career over: ఒకప్పుడు సచిన్ టెండూల్కర్, బ్రియాన్ లారా వంటి వారి ఆటతీరును క‌న‌బ‌రుస్తూ ఫ్యూచ‌ర్ స్టార్ గా ప్ర‌శంస‌లు అందుకున్న భార‌త స్టార్ ప్లేయ‌ర్ ఇప్పుడు దేశ‌వాళీ క్రికెట్ టీమ్ నుంచి ఔట్ అయ్యే ప‌రిస్థితికి జారుకున్నాడు. అత‌నే పృథ్వీ షా. ఒక‌ప్పుడు భార‌త జ‌ట్టులోని మూడు ఫార్మాట్ల‌కు ఆడాడు. అనేక అద్భ‌త‌మైన ఇన్నింగ్స్ లు ఆడాడు.

భ‌విష్య‌త్తు భార‌త సూప‌ర్ స్టార్ క్రికెట‌ర్ అనే ప్ర‌శంస‌లు అందుకున్నాడు కానీ, వివాదాలు చిక్కుకోవ‌డంతో పాటు ఫిట్ నెస్ పై దృష్టి సారించ‌క టీమిండియా నుంచి ఔట్ అయ్యాడు. ఇప్పుడు దేశ‌వాళీ క్రికెట్ టీమ్ నుంచి కూడా ఔట్ అయ్యాడు. ఇప్పుడు అత‌ని కెరీర్ కు ముగింపు కార్డు ప‌డిన‌ట్టేనా? 

పృథ్వీ షాను ఒకప్పుడు గొప్ప ఆటగాడు, క్రికెట్ దేవుడు అని పిలుచుకునే సచిన్ టెండూల్కర్‌తో పోల్చారు. ఐసీసీ (ఇంటర్నేషనల్ క్రికెట్ కౌన్సిల్) కూడా అతనిని 'నెక్స్ట్ సచిన్ టెండూల్కర్' అని ఒక వీడియోలో పేర్కొంది. కానీ అరంగేట్రం అంతర్జాతీయ మ్యాచ్‌లోనే సెంచరీ సాధించిన పృథ్వీ షాకు ఇప్పుడు ముంబై జట్టులో కూడా చోటు దక్కలేదు. దీనికి ఫిట్‌నెస్‌ కారణమని రిపోర్టులు పేర్కొంటున్నాయి. 

త్వరలో జరగనున్న రంజీ ట్రోఫీ మ్యాచ్ కోసం ముంబై జట్టును ప్ర‌క‌టించింది. అయితే, అద్భుత‌మైన ఇన్నింగ్స్ లు ఆడే పృథ్వీ షాను టీమ్ నుంచి తప్పించారు. అతని స్థానంలో 41 రంజీ మ్యాచ్‌లు ఆడిన అనుభవం ఉన్న ఎడమచేతి వాటం ఓపెనర్ అఖిల్ హెర్వాడ్కర్‌ని తీసుకున్నాడు. 

ముంబై ప్రకటించిన జట్టులో మరో ప్రధాన మార్పు కనిపించింది. నిజానికి ఆస్ట్రేలియా వెళ్లే ఇండియా ఏ జట్టులో ఎంపికైన తనుష్ కోటియన్‌ను జట్టు నుంచి తప్పించాల్సి ఉంది. అతని స్థానంలో 28 ఏళ్ల లెఫ్ట్ ఆర్మ్ స్పిన్నర్ కర్ష్ కొఠారి జట్టులోకి వచ్చాడు. 

ముంబై క్రికెట్ అసోసియేషన్ (MCA) పత్రికా ప్రకటనలో పృథ్వీ షాను జ‌ట్టు నుంచి త‌ప్పించ‌డానికి కార‌ణాలు వెల్ల‌డించ‌లేదు. కానీ, ఈ 24 ఏళ్ల ఓపెనింగ్ బ్యాట్స్‌మన్‌ను మినహాయించడం ఒక హెచ్చరికగా చూడ‌వ‌చ్చు. పృథ్వీ షాకు క్రమశిక్షణా వివాదాలు, సమస్యల చరిత్ర చాలా వుంది. ఇప్పుడు అదే అత‌ని కెరీర్ పై దెబ్బ‌కొట్టింది.

సంజయ్ పాటిల్ (ఛైర్మన్), రవి థాకర్, జితేంద్ర థాకరే, కిరణ్ పొవార్, విక్రాంత్ యెలిగేటీలతో కూడిన ముంబై సెలక్షన్ కమిటీ షాను కనీసం ఒక్క మ్యాచ్‌కైనా దూరం పెట్టాలని భావించిందని 'క్రిక్‌బజ్' నివేదిక పేర్కొంది. నెట్స్, ప్రాక్టీస్ సెషన్లలో సక్రమంగా లేని ఓపెనింగ్ బ్యాట్స్‌మన్‌కు బయట ఒక గుణపాఠం అని కూడా ఈ నివేదిక పేర్కొంది.

పేలవమైన ఫిట్‌నెస్, క్రీడ పట్ల క్రమశిక్షణ లేకపోవడం వల్ల జట్లలో స్థానం ద‌క్కించుకోవ‌డంలో విఫలమయ్యాడు. ఈ బ్యాటర్ కొన్నేళ్లుగా మూడు ఫార్మాట్‌లలో టీమ్ ఇండియా తరఫున ఆడాడు కానీ ఇప్పటివరకు జట్టులో సాధారణ పేరుగా మారడంలో విజ‌యం సాధించ‌లేక‌పోయాడు. ఇప్పుడు దేశవాళీ టీమ్స్ లో కూడా చోటు ద‌క్కించుకోవ‌డానికి క‌ష్ట‌ప‌డుతున్నాడు. 

ప‌లు మీడియా నివేదిక‌ల‌ ప్రకారం పృథ్వీ షా అధిక బరువుతో ఉన్నాడని ముంబై జట్టు సెలక్టర్లు, టీమ్ మేనేజ్ మెంట్ భావిస్తోంద‌ట‌. అలాగే, నెట్ ప్రాక్టీస్‌ను సీరియస్‌గా తీసుకోలేదని, సక్రమంగా హాజరు కావ‌డం లేద‌ని కూడా గుర్తించారు. ఇదే స‌మ‌యంలో జట్టులోని ఇతర భారత ఆటగాళ్లు శ్రేయాస్ అయ్యర్, శార్దూల్ ఠాకూర్, కెప్టెన్ అజింక్యా రహానేలు తమ ప్రాక్టీస్‌లో నిరంతరం నిమగ్నమై ఉన్నారు. సీనియ‌ర్ ఎంసీఏ వ‌ర్గాల ప్ర‌కారం.. షాను జట్టుకు దూరంగా ఉంచాలనే నిర్ణయంలో కెప్టెన్, కోచ్‌తో సహా సెలెక్టర్లు, టీమ్ మేనేజ్‌మెంట్ ఏకగ్రీవంగా ఉన్నార‌ని స‌మాచారం.

కాగా, పృథ్వీ షా ఐదు టెస్టులు, ఆరు వన్డేలు, ఒక టీ-20 అంతర్జాతీయ మ్యాచ్‌లను ఆడాడు. అరంగేట్రం మ్యాచ్‌లోనే ప్లేయర్ ఆఫ్ ది మ్యాచ్‌గా నిలిచాడు. 2018లో రాజ్‌కోట్‌లో వెస్టిండీస్‌తో జరిగిన తొలి టెస్టులో సెంచరీ చేసిన తర్వాత అతను ప్లేయర్ ఆఫ్ ది మ్యాచ్‌గా ఎంపికయ్యాడు. గ్రౌండ్ లో అద్భుతమైన ఆటతో రాణించే పృథ్వీ షా.. గ్రౌడ్ వెలుపల అనేక సమస్యలు, వివాదాల్లో చిక్కుకున్నాడు.

ఈ సీజన్‌లో ఇప్పటివరకు ఆడిన రెండు రంజీ మ్యాచ్‌లలో అతని స్కోర్లు 7, 12 (బరోడాపై), 1, 39 నాటౌట్ (మహారాష్ట్రపై)తో పెద్ద ఇన్నింగ్స్ లను ఆడటంలో విఫలమయ్యాడు. అలాగే, జూలైలో బెంగళూరులో జరిగిన ముంబై కండిషనింగ్ క్యాంప్‌ను, చెన్నైలో జరిగిన బుచ్చి బాబు ట్రోఫీని షా కోల్పోయాడు. ఇరానీ ట్రోఫీ రెండో ఇన్నింగ్స్‌లో 76 పరుగులతో దేశీయ సీజన్‌ను ప్రారంభించినప్పటికీ ఆ మ్యాచ్ మ్యాచ్ డ్రాగా ముగిసింది.