Harshit Rana: ప్లేయింగ్ 11 లో లేడు కానీ మ్యాచ్ ఆడి భారత్ ను గెలిపించాడు !

india vs england: ఇంగ్లాండ్ తో జ‌రిగిన నాల్గో టీ20 మ్యాచ్ లో భార‌త్ సూప‌ర్ విక్ట‌రీ అందుకుంది. అయితే, ప్లేయింగ్ 11 లో లేని హ‌ర్షిత్ రాణా మ్యాచ్ ఆడి భార‌త్ కు విజ‌యాన్ని అందించాడు.  

Harshit Rana

India vs England: భారత్ - ఇంగ్లాండ్ టీ20 సిరీస్ లో భాగంగా పూణెలోని మహారాష్ట్ర క్రికెట్ అసోసియేషన్ స్టేడియంలో నాల్గో టీ20 మ్యాచ్ జ‌రిగింది. చివ‌రి ఓవ‌ర్ వ‌ర‌కు ఉత్కంఠగా సాగిన ఈ మ్యాచ్ లో టీమిండియా ఆల్ రౌండ్ ప్ర‌ద‌ర్శ‌న‌తో ఇంగ్లాండ్ ను చిత్తుచేసి మ‌రో మ్యాచ్ మిగిలి ఉండ‌గానే సిరీస్ ను కైవ‌సం చేసుకుంది. 

అయితే, ఈ మ్యాచ్ లో ప్లేయింగ్ 11లో చోటుద‌క్కించుకోలేక పోయిన భార‌త బౌల‌ర్ హ‌ర్షిత్ రాణా అనూహ్యంగా అరంగేట్రం చేసి అద్భుత‌మైన బౌలింగ్ తో భార‌త జ‌ట్టు విజ‌యంలో కీల‌క పాత్ర పోషించాడు.

శివమ్ దుబే స్థానంలో జ‌ట్టులోకి వ‌చ్చిన హ‌ర్షిత్ రాణా 

భారత్, ఇంగ్లండ్ మధ్య జరుగుతున్న నాలుగో టీ20 మ్యాచ్‌లో ఇరు జట్ల మధ్య గట్టి పోటీ క‌నిపించింది. అయితే, చివ‌రికి భార‌త్ విజ‌యాన్ని అందుకుంది. ఈ విజ‌యంలో హ‌ర్షిత్ రాణా మూడు వికెట్లు తీసుకుని కీల‌క పాత్ర పోషించాడు. 

బ్యాటింగ్‌లో హార్దిక్ పాండ్యా, శివమ్ దూబేలు హాఫ్ సెంచ‌రీల‌తో సత్తా చాటారు. అయితే, బౌలింగ్‌లో అరంగేట్రం చేసిన హర్షిత్ రాణా టీమ్ ఇండియాలో విచిత్రంగా ఎంట్రీ ఇచ్చాడు. అతను ప్లేయింగ్ 11లో లేడు కానీ, శివమ్ దూబే స్థానంలో హ‌ర్షిత్ రాణా జ‌ట్టులోకి వ‌చ్చాడు. మైదానంలోకి పిలుపుతో బంతి చేతికి రాగానే హర్షిత్ తన మ్యాజిక్‌ను చూపించాడు. కీల‌కమైన 3 వికెట్లు తీశాడు.  హర్షిత్ కంకషన్ సబ్‌స్టిట్యూట్‌గా వచ్చి మూడు కీలక వికెట్లు తీయ‌డంతో పాటు T20I అరంగేట్రం చేసిన మొదటి ఆటగాడిగా నిలిచాడు. 

India vs England

శివమ్ దూబే ఎందుకు ఔట్ అయ్యాడు?

టాస్ గెలిచిన ఇంగ్లండ్ ముందుగా బౌలింగ్ ఎంచుకుంది. బ్యాటింగ్‌లో టీమిండియా 100 పరుగులకే టాప్ బ్యాట్స్‌మెన్‌ను కోల్పోయింది. ఆ తర్వాత హార్దిక్ పాండ్యా (53 ప‌రుగులు), శివమ్ దూబే (53 ప‌రుగులు) తమ మైదానంలో అద్భుత‌మైన ఆట‌తో హాఫ్ సెంచ‌రీలు బాదారు. 

ఇన్నింగ్స్ చివరిలో, శివమ్ దూబే ఘోరమైన బౌన్సర్‌కు గురయ్యాడు. జామీ ఓవర్టన్ బౌన్సర్ అతని తలకు త‌గిలింది. దీంతో భార‌త జ‌ట్టు ఫీల్డింగ్ చేస్తున్నప్పుడు మైదానం వెలుపల కూర్చోవలసి వచ్చింది. దూబే లేక‌పోవడంతో హర్షిత్ రాణాకు అదృష్టం ద‌క్కింది. అత‌ని స్థానంలో జ‌ట్టులోకి వ‌చ్చాడు. 

తొలి ఓవర్‌లోనే హర్షిత్ అద్భుతం చేశాడు

12వ ఓవర్లో సూర్యకుమార్ యాదవ్ బంతిని హర్షిత్ రాణాకు అందించాడు. రానా అద్భుతంగా ప్రారంభించి లియామ్ లివింగ్‌స్టన్‌ను దెబ్బ‌కొట్టాడు. టీ20 అరంగేట్రం చేసిన రెండో బంతికే హర్షిత్ రాణా లివింగ్‌స్టన్‌ను పెవిలియన్‌కు చేర్చాడు. అయితే, తన రెండవ ఓవర్‌లో అతను ఖరీదైనదిగా నిరూపించాడు.. 18 పరుగులు ఇచ్చాడు. కానీ మూడో ఓవర్‌లోనే వెనుదిరిగి జాకబ్ బైతాల్‌ను ట్రాప్ చేసి మరో వికెట్‌ని తన ఖాతాలో వేసుకున్నాడు.

వరుణ్ చక్రవర్తి బ్రేక్ త్రూ అందించాడు

ఇంగ్లండ్‌తో జరిగిన సిరీస్‌లో ఫామ్‌లో ఉన్న స్పిన్ బౌలర్ వరుణ్ చక్రవర్తి ఒక్క ఓవర్‌లో మ్యాచ్‌ను మార్చేశాడు. స్టార్ బ్యాట్స్‌మెన్ హ్యారీ బ్రూక్ ధ‌నాధ‌న్ ఇన్నింగ్స్ ఆడుతూ హాఫ్ సెంచరీ కొట్టాడు. దీంతో మ్యాచ్ ఇంగ్లాండ్ చేతిలోకి వెళ్లింది. కేవలం 25 బంతుల్లోనే అర్ధ సెంచరీ సాధించాడు. అయితే, 26వ బంతికి వ‌రుణ్ చక్రవర్తి స్పిన్‌కు బలయ్యాడు. చక్రవర్తి తన ఓవర్‌లో 2 వికెట్లు తీసి మ్యాచ్‌ను భార‌త్ వైపు తీసుకువ‌చ్చాడు.

సిరీస్ గెలుచుకున్న భార‌త్ 

ఈ మ్యాచ్ లో తొలుత బ్యాటింగ్ చేసిన భార‌త జ‌ట్టు 20 ఓవ‌ర్ల‌లో 9 వికెట్లు కోల్పోయి 181 ప‌రుగులు చేసింది. అభిషేక్ శ‌ర్మ 29, రింకూ సింగ్ 30, శివ‌మ్ దుబే 53, హార్దిక్ పాండ్యా 53 ప‌రుగులు చేశారు. ఇంగ్లాండ్ బౌల‌ర్ల‌ల‌లో సాకిబ్ మహమూద్ 3 వికెట్లు, జామీ ఓవర్టన్ 2 వికెట్లు తీసుకున్నారు. వీరితో పాటు బ్రైడన్ కార్సే, ఆదిల్ ర‌షీద్ లు చెరో ఒక వికెట్ ప‌డ‌గొట్టారు.

182 ప‌రుగులు టార్గెట్ తో బ్యాటింగ్ ప్రారంభించిన ఇంగ్లాండ్ 19.4 ఓవ‌ర్ల‌లో 166 ప‌రుగుల‌కు ఆలౌట్ అయింది. ఇంగ్లాండ్ ప్లేయ‌ర్ల‌లో ఫిల్ సాల్ట్ 23, బెన్ డ‌కెట్ 39, హ్యారీ బ్రూక్ 51 ప‌రుగులు చేశారు. భార‌త బౌల‌ర్ల‌లో ర‌వి బిష్ణోయ్ 3, హ‌ర్షిత్ రాణా 3, వ‌రుణ్ చ‌క్ర‌వ‌ర్తి 2 వికెట్లు తీసుకున్నారు. ఈ మ్యాచ్ గెలుపుతో భార‌త్ 3-1తో సిరీస్ ను కైవ‌సం చేసుకుంది. ఈ సిరీస్ లో చివ‌రి మ్యాచ్ ఫిబ్ర‌వ‌రి 2న‌ ముంబై లో జ‌ర‌గ‌నుంది.