Fact Check: జాన్వీ కపూర్ తో హార్దిక్ పాండ్యా డేట్ చేస్తున్నారా?
Hardik Pandya Janhvi Kapoor Dating Rumors: భారత క్రికెటర్ హార్దిక్ పాండ్యా, బాలీవుడ్ నటి జాన్వీ కపూర్ల ఫోటోలు సోషల్ మీడియాలో వైరల్ అయ్యాయి. వీళ్లిద్దరూ డేటింగ్లో ఉన్నారనే వార్తలు వచ్చాయి. అయితే, నిజంగానే ఈ ఇద్దరు స్టార్లు డేటింగ్ లో ఉన్నారా?
హార్దిక్ పాండ్యా భారత క్రికెట్ జట్టలో స్టార్ ప్లేయర్. కొంతకాలం క్రితం ఆయన భార్య నటాషా స్టాంకోవిక్తో విభేదాలు వచ్చాయి. దీంతో ఇద్దరూ విడిపోతున్నట్లు ప్రకటించారు. విడాకులు తీసుకున్నారు. అయితే, హార్దిక్ పాండ్యా భార్యకు దూరమైన తర్వాత కొంతమంది బాలీవుడ్ నటీమణులతో తిరుగుతున్నట్లు ప్రచారం జరిగింది.
బాలీవుడ్ నటి అనన్య పాండేతో డేటింగ్ లో ఉన్నారనే వార్తలు కూడా వచ్చాయి. ఈ తరహాలోనే మరోసారి హార్దిక్ ఫోటోలు వైరల్ గా మారాయి. హార్దిక్ పాండ్యా, బాలీవుడ్ నటి జాన్వీ కపూర్ మాల్దీవుల్లో డేటింగ్ చేస్తున్న ఫోటోలు సోషల్ మీడియాలో వైరల్ అయ్యాయి. మాల్దీవుల బీచ్లలో జంటగా తిరుగుతూ, ఒకరికొకరు దగ్గరగా ఉన్న ఫోటోలు ఇంటర్నెట్లో వ్యాపించాయి.
హార్దిక్ పండ్యా-జాన్వీ కపూర్ డేటింగ్ లో ఉన్నారా?
హార్దిక్ పాండ్యా, జాన్వీ కపూర్ లు కలిసి వున్న ఫోటోలు సోషల్ మీడియాలో వైరల్ గా మారాయి. దీంతో వీరిద్దరూ డేటింగ్ లో ఉన్నారనే పుకార్లు వ్యాపించాయి. అయితే, ఫ్యాక్ట్ చెక్ లో ఈ ఫోటోలను పరిశీలించగా అవి నకిలీవని, వీళ్లిద్దరూ డేటింగ్ చేయడం లేదని తేలింది. ఎందుకంటే హార్దిక్ పాండ్యా, జాన్వీ కపూర్ డేటింగ్ చేస్తున్నారనేందుకు నిజమైన ఆధారాలు దొరకలేదు. ఇంకా వీరిద్దరి ఎక్స్, ఇన్స్టాగ్రామ్ పేజీలను పరిశీలించినప్పుడు వాళ్లు మాల్దీవులకు వెళ్లినట్లు ఎలాంటి ఫోటోలు, వీడియోలు షేర్ చేయలేదు.
సోషల్ మీడియాలో వైరల్ అయిన మాల్దీవుల్లో వీళ్లిద్దరూ డేటింగ్ చేస్తున్న ఫోటోకు సంబంధించిన ఇతర ఫోటోలు ఎక్కడా కనిపించలేదు. దీంతో హార్దిక్ పాండ్యా, జాన్వీ కపూర్ మాల్దీవుల్లో కలిసి తిరుగుతున్నారని చెబుతూ తప్పుడు సమాచారాన్ని వ్యాప్తి చేసి, నకిలీ ఫోటోలను ఇంటర్నెట్లో ప్రచారం చేసినట్లు తేలింది.
జాన్వీ కపూర్, హార్దిక్ పాండ్యాల నకిలీ ఫోటోలు వైరల్
నటాషాతో విడిపోయిన తర్వాత పలువురితో డేటింగ్ రూమర్ల మధ్య హార్దిక్ పాండ్యా, జాన్వీ కపూర్ కలిసి వున్న ఫోటోలు వైరల్ గా మారాయి. సోషల్ మీడియాలో వైరల్ అయిన చిత్రాలను పరిశీలించగా, ఆ చిత్రాలు AI, ఆర్టిఫిషియల్ ఇంటెలిజెన్స్ టెక్నాలజీ సాయంతో కృత్రిమంగా సృష్టించినట్లు తేలింది. ఆ ఫోటోలు చాలా వాస్తవికంగా నకిలీగా ఉన్నాయి. చూసే ప్రతి ఒక్కరూ ఇది నిజమైన హార్దిక్ పాండ్యా, జాన్వీ కపూర్ కాదని గుర్తించవచ్చు.
ఏఐ దుర్వినియోగం.. కఠినమైన చట్టాలు అవసరం
హార్దిక్ పాండ్యా, జాన్వీ కపూర్ డేటింగ్ చేయడం లేదని, వీళ్లిద్దరూ కలిసి మాల్దీవులకు వెళ్లలేదని ఇది స్పష్టంగా చూపిస్తుంది. అయితే, ప్రస్తుతం ఇలా ఏఐ ని ఉపయోగించి ఫేక్ ఫోటోలు, వీడియోలు ప్రచారం చేయడం ఆందోళన కలిగించే విషయం. ప్రస్తుతం AIతో సహా ఆధునిక సాంకేతిక పరిజ్ఞానాలు విస్తరించాయి. ఈ సాంకేతికతలను మంచి కోసం ఉపయోగిస్తుండగా, కొంతమంది వాటిని ఇలాంటి దురాగతాలకు ఉపయోగిస్తున్నారు.
హార్దిక్ పాండ్యా, జాన్వీ కపూర్తో సహా వివిధ ప్రముఖుల రూపంలో నకిలీ ఫోటోలను సృష్టించి, తప్పుడు వార్తలను వ్యాప్తి చేస్తున్నారు. ఇలాంటి వ్యక్తులపై చర్యలు తీసుకోవాలని, భవిష్యత్తులో ఇలాంటివి జరగకుండా కఠినమైన చట్టాలు తీసుకురావాలని డిమాండ్లు వస్తున్నాయి.
గతంలో సచిన్ టెండూల్కర్ ఫేక్ వీడియో వైరల్
గతంలో భారత మాజీ క్రికెటర్ సచిన్ టెండూల్కర్ ఆన్లైన్ గేమ్ను ప్రమోట్ చేస్తున్నట్టు ఒక నకిలీ వీడియో సోషల్ మీడియాలో వైరల్ అయింది. ఎడిట్ చేసిన వీడియోలో టెండూల్కర్ ఆన్లైన్ గేమ్ను ప్రమోట్ చేస్తూ, గేమ్లో అంచనాలు వేయడం ద్వారా కుమార్తె సారా రోజుకు రూ. 1.8 లక్షలు సంపాదించడాన్ని ఉదాహరణగా చూపుతూ కనిపించాడు. ఇలా సచిన్ టెండూల్కర్ కూడా డీప్ఫేక్ బాధితుడు అయ్యాడు.
క్లిప్ బయటకు వచ్చిన తర్వాత, టెండూల్కర్ తన సోషల్ మీడియా ప్లాట్ఫామ్లో ఒక పోస్ట్లో.. ఆ వీడియోతో తనకు ఎలాంటి సంబంధం లేదనీ, అది మార్ఫింగ్ చేసిన వీడియోగా స్పష్టం చేశారు. ఇలా సాంకేతికతను దుర్వినియోగం చేయడం ఆందోళన కలిగించే విషయంగా చెప్పారు. తప్పుడు సమాచారం, డీప్ఫేక్ల వ్యాప్తిని ఆపాలనీ, ప్రజలు అప్రమత్తంగా, జాగ్రత్తగా ఉండాలని కూడా కోరారు.