సౌరవ్ గంగూలీకి బద్ధకం ఎక్కువ, కానీ పెత్తనం చేసేవాడు... టీమిండియా మాజీ కోచ్ గ్రెగ్ చాపెల్ కామెంట్స్...
టీమిండియా మాజీ కెప్టెన్ సౌరవ్ గంగూలీకి, మాజీ కోచ్ గ్రెగ్ చాపెల్‌కి ఉన్న గొడవల గురించి కొత్తగా చెప్పాల్సిన అవసరం లేదు. ఏరి కోరి తెచ్చుకున్న గ్రెగ్ చాపెల్ కారణంగా కెప్టెన్సీ కోల్పోయి, ఆ తర్వాత జట్టులో చోటు కోల్పోయి పడరాని కష్టాలన్నీ పడ్డాడు ‘దాదా’ సౌరవ్ గంగూలీ. మరోసారి గంగూలీ గురించి వివాదాస్పద వ్యాఖ్యలు చేశాడు గ్రెగ్ చాపెల్..
2003 వన్డే వరల్డ్‌కప్‌లో అండర్‌డాగ్స్‌గా బరిలో దిగి, ఛాంపియన్‌ ఆటతీరుతో ఫైనల్ చేరింది టీమిండియా. సచిన్ టెండూల్కర్ అద్భుతంగా రాణించి, 673 పరుగులు చేసి రికార్డు క్రియేట్ చేశాడు. 2003లో రన్నరప్‌గా నిలిచిన భారత జట్టుకి కోచ్‌గా వ్యవహారించిన జాన్ వ్రైట్ తర్వాత ఏరి కోరి ఆసీస్ మాజీ కెప్టెన్ గ్రేగ్ చాపెల్‌ను తెచ్చుకున్నాడు గంగూలీ...
2005లో టీమిండియా కోచ్‌గా ఎంపికైన తర్వాత భారత జట్టులో సమూలమైన మార్పులు చేయడం మొదలెట్టాడు. ఆ సమయంలో ‘దాదా’గా టీమిండియాలో స్టార్ స్టేటస్ అనుభవిస్తున్న సౌరవ్ గంగూలీ ఆధిపత్యానికి చెక్ పడింది...
‘భారత జట్టుకి కోచ్‌గా వ్యవహారించిన రెండేళ్లు చాలా కఠినమైన సవాళ్లు ఎదుర్కొన్నాను. అప్పటికే భారత జట్టు రన్నరప్‌గా నిలవడంతో అభిమానుల్లో అంచనాలు భారీగా ఉండేవి. కానీ ప్రదర్శన మాత్రం అంతంత మాత్రమే...
ఆ సమయంలో సౌరవ్ గంగూలీ కెప్టెన్సీ గురించి ఎక్కువగా చర్చ జరిగింది. నిజానికి గంగూలీకి బద్ధకం చాలా ఎక్కువ. అస్సలు కష్టపడే తత్వం కాదు, కానీ జట్టులో పెత్తనం చేయడానికి కెప్టెన్సీ కావాలని కోరుకునేవాడు...
టీమిండియా కోచ్‌గా నేను రావాలనేది గంగూలీ అభిలాష. 2003 పర్ఫామెన్స్ చూసిన తర్వాత నేను కూడా టీమిండియాకి అభిమానినయ్యా. ప్రపంచంలో అత్యంత ప్రతిష్టమైన, ఎంతో ప్రతిష్టాత్మకమైన జట్టుకి కోచ్‌గా ఉండాలని కోరుకున్నా...
గంగూలీ వల్లే నాకు టీమిండియా కోచ్ పదవి దక్కిందని మాత్రం కచ్ఛితంగా చెప్పగలను... కానీ తన ఆటను ఇంప్రూవ్ చేసుకోవడానికి గంగూలీ ఏ మాత్రం ప్రయత్నించేవాడు కాదు..
సచిన్ టెండూల్కర్, వీరేంద్ర సెహ్వాగ్, రాహుల్ ద్రావిడ్, అనిల్ కుంబ్లే, హర్భజన్ సింగ్ వంటి ప్లేయర్లతో పని చేయడం చాలా అద్భుతంగా ఉండేది, అలాగే ఛాలెంజింగ్‌గా కూడా. ధోనీ వచ్చాకే జట్టులో మార్పు మొదలైంది’ అంటూ కామెంట్ చేశాడు మాజీ కోచ్ గ్రేగ్ చాపెల్..
ఒకానొక దశలో క్రికెట్‌లో సచిన్ టెండూల్కర్‌తో సమానంగా క్రేజ్ తెచ్చుకున్న సౌరవ్ గంగూలీ, 2003 సమయంలో తీవ్రమైన ట్రోలింగ్ ఎదుర్కొన్నాడు. ముఖ్యంగా మ్యాగీ వండాలంటే సౌరవ్ గంగూలీకి బ్యాటింగ్‌కి వచ్చినప్పుడు స్టవ్ ముట్టిచి, అతను అవుట్ అయ్యాక ఆఫ్ చేస్తే చాలు అంటూ జోకులు వైరల్ అయ్యాయి. గంగూలీ 2 నిమిషాలు కూడా క్రీజులో ఉండడంటూ అభిమానులు మ్యాగీ జోక్‌తో ఎద్దేవా చేసేవాళ్లు...
నిలకడలేమీ బ్యాటింగ్‌తో కొన్నాళ్ల పాటు కెరీర్‌ను కొనసాగించిన గంగూలీ, గ్రెగ్ చాపెల్ ఎంట్రీ తర్వాత కెప్టెన్సీ కోల్పోయి, ఆ తర్వాత జట్టులో స్థానం కూడా కోల్పోయాడు... ఈ విషయం గురించి చాలాసార్లు మాట్లాడాడు దాదా...
‘నా కెరీర్‌లో చేసిన అతిపెద్ద తప్పిదం ఏదైనా ఉందంటే... అది గ్రెగ్ చాపెల్‌ను టీమిండియా కోచ్‌గా ఎన్నుకోవడం. అది చాలా అన్యాయం. ఆ సమయంలో కనీసం నన్ను ఓ మనిషిలా కూడా చూసేవాడు కాదు...
జింబాబ్వే టూర్‌లో సిరీస్ గెలిచిన జట్టుకి కెప్టెన్‌గా ఉన్న నేను, స్వదేశానికి వచ్చేసరికి కెప్టెన్సీ కోల్పోయాను. నన్ను కావాలనే పక్కనపెట్టాడు చాపెల్. 2003లో ఫైనల్‌లో ఓడి, వరల్డ్‌కప్ ఓడిపోయిన నేను, 2007లో ప్రపంచకప్ గెలవాలని కలలు కన్నాను.
నా కెప్టెన్సీలో భారత జట్టు స్వదేశంలోనే కాదు, విదేశాల్లో కూడా మంచి విజయాలు అందుకుంది. జట్టులో ఉన్న ప్రతీ ఒక్క ప్లేయర్‌ గురించి నాకు అవగాహన, మంచి రాపో ఉంది. అలాంటి సమయంలో నన్ను కెప్టెన్సీ నుంచి తొలగించారు. తర్వాత జట్టులో నుంచి కూడా...
మొదట నన్ను వన్డేల నుంచి తప్పించారు, ఆ తర్వాత టెస్టుల నుంచి కూడా... మళ్లీ టీమ్‌లో స్థానం సంపాదించుకోవడానికి చాలా కష్టపడ్డాను...’ అంటూ చెప్పుకొచ్చాడు సౌరవ్ గంగూలీ...
2006లో తిరిగి భారత జట్టులో స్థానం సంపాదించుకున్న సౌరవ్ గంగూలీ, 2007 వన్డే వరల్డ్‌కప్‌లో చోటు దక్కించుకున్నాడు. 2007 వన్డే వరల్డ్‌కప్ గ్రూప్ స్టేజ్‌లో పసికూన బంగ్లాతో ఓడిన టీమిండియా, ప్లేఆఫ్ చేరకుండానే నిష్కమించిన విషయం తెలిసిందే. బంగ్లాదేశ్‌తో ఓడిన మ్యాచ్‌లో 66 పరుగులు చేసిన గంగూలీ, టాప్ స్కోరర్‌గా నిలవడం విశేషం.
గంగూలీని జట్టులో నుంచి తప్పించడాన్ని తట్టుకోలేకపోయిన అతని అభిమానులు, చాపెల్‌ను చంపేస్తామని బెదిరిస్తూ బ్లాక్ మెయిల్ మెయిల్స్ పంపించారు. ఈ మెయిల్స్‌ను బయటపెట్టి, అప్పట్లో సంచలనం క్రియేట్ చేశాడు గ్రెగ్ చాపెల్..
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
