చెన్నై సూప‌ర్ కింగ్స్ రిటైన్ చేసుకున్న ఆట‌గాళ్లు వీరే.. ధోని ఉన్నాడా?

CSK IPL 2025 Retention : ఇండియన్ ప్రీమియర్ లీగ్ (ఐపీఎల్) రాబోయే ఎడిషన్ కోసం ఆటగాళ్ల రిటెన్షన్‌ల జాబితాను అందించ‌డానికి చెన్నై సూప‌ర్ కింగ్స్ సిద్ధంగా ఉంది. ఇప్ప‌టికే లిస్టును కూడా సిద్దం చేసింది.  

Chennai Super Kings, MS Dhoni, CSK IPL 2025 Retention list

CSK IPL 2025 Retention: ఇండియన్ ప్రీమియర్ లీగ్‌లోని అన్ని జట్లూ విపరీతమైన అభిమానుల ఫాలోయింగ్‌ను క‌లిగివున్నాయి. అయితే, కొన్ని విష‌యాల్లో స్పెష‌ల్ గా క‌నిపించే ముంబై ఇండియన్స్, చెన్నై సూపర్ కింగ్స్, రాయ‌ల్ ఛాలెంజ‌ర్స్ బెంగ‌ళూరు జ‌ట్లు ఏ ఆట‌గాళ్ల‌ను రిటైన్ చేసుకుంటుంద‌నేది క్రికెట్ ల‌వ‌ర్స్ ను ఉత్కంఠకు గురిచేస్తోంది. ఈ నేప‌థ్యంలోనే చెన్నై టీమ్ రిటెన్ష‌న్ లిస్టును క‌న్ఫ‌ర్మ్ చేసింది.

CSK IPL 2025 Retention list

ఐపీఎల్ రిటెన్షన్ జాబితాను విడుదల చేయడానికి చివరి తేదీ సమీపిస్తున్నందున ఏ ఫ్రాంచైజీ ఏ ఆటగాళ్లను రిటైన్ చేయబోతుంద‌నే ఆస‌క్తి త అభిమానుల్లో మ‌రింత‌ పెరుగుతోంది. ఇండియన్ ప్రీమియర్ లీగ్ చరిత్రలో అత్యంత విజయవంతమైన ఫ్రాంచైజీ అయిన చెన్నై సూపర్ కింగ్స్ తమ రిటెన్ష‌న్ గురించి సమాచారాన్ని అందించే పోస్ట్‌ను సోషల్ మీడియాలో షేర్ చేసింది. ఎక్స్ ప్లాట్‌ఫారమ్‌లోని తన అభిమానులను మెగా-వేలానికి ముందు వారు ఉంచుకోవాలనుకునే ఆటగాళ్లకు ఓటు వేయమని కోరింది.

చెన్నై సూపర్ కింగ్స్ పోస్టుతో అభిమానులకు సస్పెన్స్

ఎక్స్ ప్లాట్‌ఫారమ్ అకౌంట్ లో CSK చేసిన పోస్ట్‌లో 5 మంది ఆటగాళ్ల ప్రత్యేక ఎమోజీలను కూడా పంచుకుంది. సీఎస్కే ఫ్రాంచైజీని నిలుపుకోవాలని భావిస్తున్నట్లు ఈ పోస్ట్‌పై పేర్లు వ్యాఖ్యానిస్తున్నారు. అభిమానులు హెలికాప్టర్, కివీ ఫ్రూట్, రాకెట్ వంటి ఎమోజీలకు ఎంఎస్ ధోని, రచిన్ రవీంద్ర, మతిషా పతిరానా వంటి ఆటగాళ్ల పేర్ల‌ను సూచిస్తున్నారు. 

ఏదేమైనా చెన్నై సూపర్ కింగ్స్ పోస్టు అభిమానులకు ఉత్కంఠను మిగిల్చింది. అయితే, రాబోయే సీజ‌న్ లో లెజెండ‌రీ ప్లేయ‌ర్ ఎంఎస్ ధోని చెన్నై సూప‌ర్ కింగ్స్ త‌ర‌ఫున ఆడ‌నున్నాడ‌ని స‌మాచారం. ఇటీవ‌ల ఒక కార్య‌క్ర‌మంలో ధోని మాట్లాడుతూ.. 'గత కొన్ని సంవత్సరాల క్రికెట్‌ను ఆస్వాదించాలనుకుంటున్నాను' అని చెప్పాడు. గత సీజన్‌లో రుతురాజ్ గైక్వాడ్‌కు కెప్టెన్సీని అప్పగించి లోయర్ ఆర్డర్‌లో బ్యాటింగ్ ప్రారంభించినప్పుడు ధోనీ రిటైర్మెంట్ గురించిన వార్త‌లు వ‌చ్చిన సంగ‌తి తెలిసిందే.

చెన్నై సూప‌ర్ కింగ్స్ రిటెన్ష‌న్ ఫైన‌ల్ లిస్టు ఇదే 

చెన్నై సూప‌ర్ కింగ్స్ రాబోయే ఐపీఎల్ సీజ‌న్ కోసం రిటైన్ చేసుకున్న ఆట‌గాళ్ల జాబితాను ఫైన‌ల్ చేసింద‌ని ప‌లు నివేదిక‌లు పేర్కొంటున్నాయి. ఐదు రిటెన్ష‌న్ల‌ను ఖరారు చేసినట్లు ESPN క్రిక్‌ఇన్‌ఫో ఒక నివేదిక పేర్కొంది. ఈ లిస్టులో ఎంఎస్ ధోని , కెప్టెన్ రుతురాజ్ గైక్వాడ్ , రవీంద్ర జడేజా , శివమ్ దూబే, శ్రీలంక ఫాస్ట్ బౌలర్ మతీషా పతిరానాలు ఉన్నారు. 

ఈ లిస్టులో క‌నిపించ‌ని రచిన్ రవీంద్ర , డెవాన్ కాన్వే వంటి స్టార్లను సీఎస్కే విడుద‌ల చేయ‌నున్న‌ట్టు తెలుస్తోంది. కాగా, ఐదు నిలుపుదలలకు మొత్తం రూ.120 కోట్ల పర్స్ నుండి కనీసం రూ.65 కోట్లు ఖర్చవుతుందని నివేదిక పేర్కొంది. ధోనీని అన్‌క్యాప్డ్ ప్లేయర్‌గా కొనసాగించే అవకాశం ఉంది. 

కాగా, చెన్నై సూపర్ కింగ్స్ (సీఎస్కే) ను ఐపీఎల్ లో విజ‌యవంత‌మైన జ‌ట్టుగా ముదుకు న‌డిపించిన నాయ‌కుడిగా ఎంఎస్ ధోని ప్రత్యేక గుర్తింపు సాధించాడు. ఐదు ఐపీఎల్ టైటిల్స్ ను అందించిన ధోని.. ఇటీవ‌ల చేసిన వ్యాఖ్య‌ల‌తో తాను ఐపీఎల్ 2025 లో ఆడ‌నున్న‌ట్టు స్ప‌ష్టం చేశాడు. అయితే, గ‌తంలో ధోనిని చెన్నై టీమ్ రూ.12 కోట్ల‌కు జ‌ట్టుతో ఉంచుకుంది. కానీ, ఇప్పుడు ఈ వెటరన్ వికెట్-కీపర్ బ్యాటర్‌ను చెన్నై సూపర్ కింగ్స్ కేవలం రూ. 4 కోట్లకు రిటైన్ చేస్తుందని భావిస్తున్నారు.ఎందుకంటే ధోని ఇప్ప‌టికే అంత‌ర్జాతీయ క్రికెట్ కు వీడ్కోలు ప‌లికాడు. ఐపీఎల్ నిబంధ‌న‌ల ప్ర‌కారం.. భారత క్రికెట్ జట్టు ఆటగాడు గత ఐదేళ్లలో జాతీయ జట్టుకు ఆడకపోతే 'అన్‌క్యాప్డ్ ప్లేయ‌ర్' గా పరిగణిస్తారు.

కేఎల్ రాహుల్ పై క‌న్నేసిన చెన్నై సూప‌ర్ కింగ్స్ 

కేఎల్ రాహుల్ ల‌క్నో టీమ్ ను వీడాల‌ని నిర్ణ‌యించుకున్నాడు. దీంతో అత‌న్ని రాబోయే ఐపీఎల్ వేలంలో ద‌క్కించుకోవ‌డానికి ప‌లు టీమ్ లు వ్యూహాలు సిద్ధం చేసుకుంటున్నాయి. నవంబర్ చివరి వారంలో జరగనున్న ఐపీఎల్ 2025 మెగా వేలంలో దాదాపు అన్ని ఫ్రాంఛైజీలు క‌న్నేసిన ప్లేయ‌ర్ల లిస్టులో కేఎల్ రాహుల్ కూడా ఉన్నాడు. 

32 ఏళ్ల కేఎల్ రాహుల్ ను ద‌క్కించుకోవ‌డానికి రాయల్ ఛాలెంజర్స్ బెంగళూరు (RCB)తో పాటు మ‌రో ముగ్గురు మాజీ ఛాంపియన్లు కూడా ప్ర‌య‌త్నాలు చేస్తున్నాయ‌ని రిపోర్టులు పేర్కొంటున్నాయి. ఆర్సీబీతో పాటు చెన్నై సూపర్ కింగ్స్ (CSK), రాజస్థాన్ రాయల్స్ (RR),గుజరాత్ టైటాన్స్ (GT),  పంజాబ్ కింగ్స్ (PBKS) కేఎల్ రాహుల్ పై ఆస‌క్తి చూపుతున్నాయి.