మళ్లీ సున్నా చుట్టిన ఛతేశ్వర్ పూజారా... సెకండ్ ఇన్నింగ్స్‌లో పరుగులు రాకపోతే ఇక ప్లేస్ కష్టమే...

సౌతాఫ్రికాతో జరుగుతున్న తొలి టెస్టులో మొదటి రోజు టీ బ్రేక్ విరామానికి భారత జట్టు 2 వికెట్లు కోల్పోయి 157 పరుగులు చేసింది. మయాంక్ అగర్వాల్ హాఫ్ సెంచరీ చేసి అవుట్ కాగా, కెఎల్ రాహుల్ హాఫ్ సెంచరీతో క్రీజులో ఉన్నాడు...

ముంబై టెస్టులో భారీ సెంచరీ చేసి ఫామ్‌లోకి వచ్చిన మయాంక్ అగర్వాల్, దాన్ని కొనసాగిస్తూ 123 బంతుల్లో 9 ఫోర్లతో 60 పరుగులు చేసి అవుట్ అయ్యాడు...

తొలి వికెట్‌కి కెఎల్ రాహుల్‌తో 117 పరుగుల భారీ భాగస్వామ్యం నెలకొల్పిన తర్వాత లుంగి ఇంగిడి బౌలింగ్‌లో ఎల్బీడబ్ల్యూగా పెవిలియన్ చేరాడు మయాంక్ అగర్వాల్...

మయాంక్ అగర్వాల్ అవుటైన క్రీజులోకి వచ్చిన ఛతేశ్వర్ పూజారా, లుంగి ఇంగిడి బౌలింగ్‌లో మొదటి బంతికే కీగన్ పీటర్సన్‌కి క్యాచ్ ఇచ్చి గోల్డెన్ డకౌట్‌గా పెవిలియన్ చేరాడు...

సౌతాఫ్రికాలో డకౌట్ కావడం ఛతేశ్వర్ పూజారాకి ఇది రెండోసారి. ఇంతకుముందు 2018 పర్యటనలోనూ సెంచూరియన్‌లో గోల్డెన్ డకౌట్ అయ్యాడు పూజారా...

1992లో సంజయ్ మంజ్రేకర్, 1996లో సౌరవ్ గంగూలీ... సౌతాఫ్రికాలో టెస్టుల్లో మూడో స్థానంలో వచ్చి డకౌట్ అయిన భారత బ్యాట్స్‌మెన్‌గా ఉండగా... పూజారా రెండుసార్లు ఈ చెత్త రికార్డు సాధించాడు...

2018 ఏడాదిలో మూడు సార్లు డకౌట్ అయిన పూజారా, 2021లోనూ మూడోసారి పరుగులేమీ చేయకుండా పెవిలియన్ చేరాడు. 2018లో సెంచూరియన్‌లో గోల్డెన్ డకౌట్ అయిన పూజారా, మళ్లీ అక్కడే మొదటి బంతికే అవుటై పెవిలియన్ చేరడం విశేషం...

భారత జట్టు తరుపున అత్యధిక సార్లు డకౌట్ అయిన వన్‌డౌన్ ప్లేయర్‌గా చెత్త రికార్డు మూటకట్టుకున్నాడు పూజారా. దిలిప్ వెంగ్‌సర్కార్ 8 సార్లు, రాహుల్ ద్రావిడ్ 7 సార్లు టెస్టుల్లో డకౌట్ కాగా, పూజారాకి ఇది 9వ డకౌట్...

ఆస్ట్రేలియా టూర్‌‌‌లో బోర్డర్ -గవాస్కర్ ట్రోఫీ తర్వాత 21 ఇన్నింగ్స్‌లు ఆడిన ఛతేశ్వర్ పూజారా, 23.90 సగటుతో 478 పరుగులు చేశాడు. ఇందులో కేవలం మూడు హాఫ్ సెంచరీలు మాత్రమే ఉన్నాయి. 

ఇప్పటికే పేలవ ఫామ్‌తో విమర్శలు ఎదుర్కొంటున్న ఛతేశ్వర్ పూజారా, రెండో ఇన్నింగ్స్‌లో కూడా పరుగులు చేయలేకపోతే... రెండో టెస్టులో టీమ్‌లో చోటు దక్కించుకోవడం కష్టమే...

శ్రేయాస్ అయ్యర్, హనుమ విహారి, ప్రియాంక్ పంచల్ వంటి ప్లేయర్లు తుదిజట్టులో చోటు కోసం ఎదురుచూస్తుండడంతో రహానే, పూజారాలపై వేటు వేసేందుకు ఛాన్స్‌లు పెరుగుతున్నాయి.