Ben Stokes: సిక్సర్ల సెంచరీ.. అరుదైన ఘనత సాధించిన ఇంగ్లాండ్ టెస్ట్ కెప్టెన్

ENG vs NZ: ఇంగ్లాండ్ టెస్టు జట్టుకు ఇటీవలే సారథిగా నియమితుడైన బెన్ స్టోక్స్ తన ఖాతాలో మరో రికార్డును లిఖించుకున్నాడు.  న్యూజిలాండ్ తో జరుగుతున్న మూడో టెస్టులో అతడు సిక్సర్ కొట్టడం ద్వారా ఈ రికార్డు సాధించాడు. 

ఇంగ్లాండ్ టెస్టు కెప్టెన్ బెన్ స్టోక్స్ టెస్టులలో అరుదైన ఘనత సాధించాడు. సుదీర్ఘ ఫార్మాట్ లో వంద సిక్సర్లు కొట్టిన మూడో బ్యాటర్ గా  స్టోక్స్ నిలిచాడు. ఇంగ్లాండ్-న్యూజిలాండ్ మధ్య జరుగుతున్న మూడో టెస్టు సందర్భంగా స్టోక్స్ ఈ ఘనత సాధించాడు. 

లీడ్స్ లోని హెడ్డింగ్లీ వేదికగా జరుగుతున్న ఈ టెస్టులో ఇంగ్లాండ్ తొలి ఇన్నింగ్స్ లో బ్యాటింగ్ కు వచ్చిన స్టోక్స్.. 13 బంతుల్లో 2 ఫోర్లు, 1 సిక్సర్ తో 18 పరుగులు చేశాడు.  ఈ ఇన్నింగ్స్ లో అతడు కొట్టిన సిక్సర్.. స్టోక్స్ టెస్టు కెరీర్ లో వందో సిక్సర్ కావడం విశేషం. దీంతో అతడు ఆసీస్ దిగ్గజం ఆడమ్ గిల్ క్రిస్ట్ సరసన నిలిచాడు.

ఫలితంగా టెస్టులలో ఈ ఘనత సాధించిన మూడో క్రికెటర్ గా స్టోక్స్ నిలిచాడు.  ఈ జాబితాలో తొలి స్థానంలో ఇంగ్లాండ్ ప్రస్తుత హెడ్ కోచ్ (టెస్టులకు), కివీస్ మాజీ సారథి అయిన బ్రెండన్ మెక్ కల్లమ్ ఉండగా తర్వాత స్థానంలో ఆసీస్ మాజీ వికెట్ కీపర్ ఆడమ్ గిల్ క్రిస్ట్ ఉన్నాడు. మూడో స్థానంలో స్టోక్స్ నిలిచాడు.

టెస్టు క్రికెట్ చరిత్రలో అత్యధిక సిక్సర్లు  బాదిన ఆటగాళ్ల జాబితాను పరిశీలిస్తే.. బ్రెండన్ మెక్ కల్లమ్ (108), గిల్ క్రిస్ట్ (100), బెన్ స్టోక్స్ (100) లు టాప్-3 లో ఉన్నారు. 

ఈ జాబితాలో యూనివర్సల్ బాస్ క్రిస్ గేల్.. 98 సిక్సర్లతో నాలుగో స్థానంలో ఉండగా 94 సిక్సర్లతో వీరేంద్ర సెహ్వాగ్ ఆరో స్థానంలో ఉన్నాడు. 

ఇక ఇంగ్లాండ్ బ్యాటర్లలో చూసుకుంటే ఈ జాబితాలో అగ్రస్థానంలో ఉన్నది స్టోక్స్ మాత్రమే. అయితే మూడు ఫార్మాట్లలో కలిపితే మాత్రం స్టోక్స్.. ఇంగ్లాండ్ పరిమిత ఓవర్ల క్రికెట్ కెప్టెన్ ఇయాన్ మోర్గాన్ (328 సిక్సర్లు), జోస్ బట్లర్ (267) ల తర్వాత స్టోక్స్ (207) మూడో స్థానంలో నిలిచాడు.