'మీ సామర్థ్యాలను న‌మ్మండి.. కష్టపడి పనిచేయండి'.. భార‌త స్టార్ క్రికెటర్ కామెంట్స్ వైర‌ల్

ఢిల్లీ ప్రీమియర్ లీగ్ తొలి సీజన్ ఆగస్టు 17న ప్రారంభమైంది. ఢిల్లీలోని అరుణ్ జైట్లీ స్టేడియంలో దక్షిణ ఢిల్లీ సూపర్‌స్టార్స్‌తో పురాణి డిల్లీ 6 పోటీపడింది. రిషబ్ పంత్ నేతృత్వంలోని జట్టు మొదటి ఇన్నింగ్స్‌లో 197/3 స్కోరు చేసినప్పటికీ విజ‌యాన్ని అందుకోలేక‌పోయింది.

భారత క్రికెటర్, వెటరన్ పేసర్ ఇషాంత్ శర్మ  డిల్లీ 6  కు చెందిన 20 మంది సభ్యుల జట్టులో భాగమైనప్పటికీ పంత్ అండ్ టీమ్ మేనేజ్‌మెంట్ యువకులతో ముందుకు సాగడంతో ప్లేయింగ్ 11లో చోటు దక్కించుకోలేకపోయాడు.

ఏది ఏమైనప్పటికీ ఇషాంత్ కొత్తగా ప్రవేశపెట్టిన ఈ క్రికెట్ టోర్నమెంట్‌లో భాగమైనందుకు ఎంత థ్రిల్‌గా ఉన్న‌ట్టు తెలిపాడు. ఎందుకంటే మొదటిసారిగా తన సొంత ప్రాంతంలో జ‌రుగుతుండ‌టంతో ఆనందం వ్యక్తం చేస్తున్నాడు. 35 ఏళ్ల ఈ సీనియ‌న్ బౌల‌ర్ కు 165 టీ20 మ్యాచ్ లు ఆడిన ఆనుభ‌వం ఉంది. ఇది యువ‌కుల‌తో కూడిన జ‌ట్టుకు ప్రేర‌ణ క‌లిగిస్తుంద‌ని చెప్ప‌డంలో సందేహం లేదు.

ఈ క్ర‌మంలో ఇషాంత్ శ‌ర్మ మాట్లాడుతూ.. "ఢిల్లీ ప్రీమియర్ లీగ్ కోసం నేను చాలా ఉత్సాహంగా ఉన్నాను. ఢిల్లీలో లీగ్ తొలిసారిగా జరుగుతోంది. యువ ఆటగాళ్లకు నా సందేశం ఒక్క‌టే.. కష్టపడి పనిచేయడం.. మీ సామర్థ్యాలపై నమ్మకం ఉంచడం.. ఈ ఫార్మాట్ క్రూరమైనది కావచ్చు, కానీ మీరు మీపై నమ్మకం ఉంచితే గెలుపు మీ సొంతం. సామర్థ్యాలు-కష్టపడి పని చేస్తే మీరు ఏ ఫార్మాట్‌లోనైనా అద్భుతాలు చేయగలరు" అని ఇషాంత్ పేర్కొన్నాడు. 

"నేను చాలా కాలంగా రిషబ్‌తో కలిసి ఆడుతున్నాను, అతనితో ఆడటం నాకు ఎప్పుడూ ఆనందాన్ని ఇస్తుంది" అని ఇషాంత్ చెప్పాడు. ఢిల్లీ ప్రీమియర్ లీగ్ మొదటి ఎడిషన్‌లో 33 పురుషులు, 7 మహిళల మ్యాచ్ లు స‌హా మొత్తం 40 మ్యాచ్‌లు జరుగుతాయి. అన్నీ కూడా అరుణ్ జైట్లీ స్టేడియంలో జరుగుతాయి. టోర్నమెంట్ ఆగస్ట్ 17 నుండి సెప్టెంబర్ 8 వరకు కొన‌సాగ‌నుంది.