Tata Curvv కారు ధర రూ. 9.99 లక్షల నుండి ప్రారంభం

టాటా మోటార్స్ తన కొత్త  కారు టాటా కర్వ్ (Tata Curvv)ను భారతీయ మార్కెట్లోకి విడుదల చేసింది. డీజిల్, పెట్రోల్, EV వేరియంట్లలో లభ్యమయ్యే ఈ కారు ధర రూ. 9.99 లక్షల నుండి ప్రారంభమవుతుంది. 6 అద్భుతమైన రంగుల్లో ఈ కారు అందుబాటులో ఉంది.

లగ్జరీ కార్లకు పరిమితమైన కూపే డిజైన్ ఇప్పుడు సామాన్యులకు అందుబాటులోకి వచ్చింది. సిట్రోయెన్ బసాల్ట్ తర్వాత టాటా కూడా ఆకర్షణీయమైన కూపే డిజైన్ కలిగిన Curvv కారును విడుదల చేసింది. దీని ధర కూడా ఇప్పుడు అధికారికంగా ప్రకటించబడింది.

టాటా కర్వ్ కారు ధర రూ. 9.99 లక్షలు (ఎక్స్‌షోరూమ్) నుండి ప్రారంభమవుతుంది. అద్భుతమైన బాడీ స్టైల్‌తో వస్తున్న ఈ కారు, వేగంగా అభివృద్ధి చెందుతున్న మిడ్-SUV విభాగంలో కొత్త సంచలనం సృష్టించింది. పెట్రోల్ వేరియంట్ ధర రూ. 9.99 లక్షలు కాగా, డీజిల్ వేరియంట్ ధర రూ. 11.49 లక్షలు (ఎక్స్‌షోరూమ్) నుండి ప్రారంభం.

టాటా మోటార్స్ Curvv కారును మూడు ఇంజిన్ ఆప్షన్లలో విడుదల చేసింది. అత్యాధునిక డ్యూయల్ క్లచ్ ఆటోమేటిక్ ట్రాన్స్‌మిషన్‌తో పాటు, శక్తివంతమైన హైపరియన్ గ్యాసోలిన్ డైరెక్ట్ ఇంజెక్షన్ ఇంజిన్, 1.2 లీటర్ రెవోట్రాన్ పెట్రోల్ ఇంజిన్, కొత్త 1.5 లీటర్ క్రయోజెట్ డీజిల్ ఇంజిన్‌లను కూడా ఈ కారులో అందించారు. ముఖ్యంగా డీజిల్ వేరియంట్‌లో డ్యూయల్ క్లచ్ ట్రాన్స్‌మిషన్‌ను అందించడం ఇదే తొలిసారి. వినియోగదారుల అవసరాలకు అనుగుణంగా విభిన్నమైన, అత్యుత్తమ ఎంపికలను అందించాలనే ఉద్దేశంతో టాటా ఈ నిర్ణయం తీసుకుంది.

భద్రత విషయంలో ఎప్పటిలాగే టాటా మోటార్స్ Curvv కారులో కూడా రాజీ పడలేదు. అడాప్టివ్ క్రూయిజ్ కంట్రోల్, లేన్ కీప్ అసిస్ట్, ట్రాఫిక్ సైన్ రికగ్నిషన్ వంటి 20కి పైగా ఫీచర్లతో ADAS లెవల్ 2, 6 ఎయిర్‌బ్యాగ్‌లు, ఎలక్ట్రానిక్ స్టెబిలిటీ ప్రోగ్రామ్, ఆటో హోల్డ్, ఎలక్ట్రానిక్ పార్కింగ్ బ్రేక్ వంటి ఫీచర్లను ఈ కారులో అందించారు.

Curvv కారు ఇంటీరియర్ విషయానికి వస్తే.. విలాసవంతమైన ఫీచర్లతో అదరహో అనిపిస్తుంది. జెస్చర్ కంట్రోల్, సెగ్మెంట్‌లోనే తొలిసారిగా టైల్‌గేట్, 500 లీటర్ల బూట్ స్పేస్, వెంటిలేటెడ్ ఫ్రంట్ సీట్లు, 6-వే డ్రైవర్ సీట్, 60:40 స్ప్లిట్ రియర్ సీట్లు వంటి ఫీచర్లు ఈ కారును మరింత ప్రత్యేకం చేస్తున్నాయి.

 31.24 సెం.మీ హర్మన్ టచ్‌స్క్రీన్ ఇన్ఫోటైన్‌మెంట్ సిస్టమ్, 26.03 సెం.మీ డిజిటల్ ఇన్స్ట్రుమెంట్ క్లస్టర్, వైర్‌లెస్ స్మార్ట్‌ఫోన్ ఛార్జింగ్, iRA కనెక్టెడ్ కార్ టెక్నాలజీ వంటి అత్యాధునిక ఫీచర్లను కూడా ఈ కారులో అందించారు.