Year Ender 2024: ఇంట‌ర్నెట్ లేకుండా UPI చెల్లింపులు - పెరిగిన ప‌రిమితి - యూపీఐలో టాప్-5 బిగ్ ఛేంజెస్

Year Ender 2024: ఈ ఏడాది జనవరి నుండి నవంబర్ వరకు ₹223 లక్షల కోట్ల విలువైన 15,547 కోట్ల లావాదేవీలను యూపీఐ (UPI) ప్రాసెస్ చేసిందని ఆర్థిక మంత్రిత్వ శాఖ వెల్ల‌డించింది. ప్ర‌జ‌ల‌కు యూపీఐని మ‌రింత ద‌గ్గ‌ర చేసేందుకు 2024 లో UPI లో చాలా మార్పులు జ‌రిగాయి. 

Year Ender 2024: భార‌త్ లో డిజిట‌ల్ విప్ల‌వంతో సంచ‌ల‌న మార్పులు క‌నిపిస్తున్నాయి. మ‌రీ ముఖ్యంగా ఇంట‌ర్నెట్ వినియోగం పెర‌గ‌డంతో పాటు డిజిట‌ల్ లావాదేవీలు కూడా భారీగా పెరిగాయి. ఆన్‌లైన్ చెల్లింపులు చేయడానికి, స్వీకరించడానికి భార‌త్ లో అత్యంత ప్రజాదరణ పొందిన మార్గాలలో యునైటెడ్ పేమెంట్ ఇంటర్‌ఫేస్ అంటే యూపీఐ (UPI) టాప్ లో ఉంటుంది. ఈ సంవత్సరం యూపీఐ అనేక ప్రధాన మార్పులను చూసింది. 

2024 లో నవంబర్ వరకు 15,482 మిలియన్ యూపీఐ లావాదేవీలు

నవంబర్ 2024కి సంబంధించిన NPCI అంటే నేషనల్ పేమెంట్స్ కార్పొరేషన్ ఆఫ్ ఇండియా డేటా ప్రకారం.. యూపీఐ నుంచి దాదాపు 15,482 మిలియన్ లావాదేవీలు జరిగాయి, దీని మొత్తం విలువ‌ రూ. 21,55,187.4 కోట్లు. ప్ర‌జ‌ల‌కు మ‌రింత సౌక‌ర్య‌వంతంగా చేసే యూపీఐలో మార్పులు జ‌రుగుతూనే ఉన్నాయి. యూపీఐలో వ‌చ్చిన కొన్ని ప్ర‌ధాన‌ పెద్ద మార్పుల గురించి ఇప్పుడు తెలుసుకుందాం.

యూపీఐలో పెరిగిన లావాదేవీల‌ పరిమితి

ఆగస్టులో NPCI కొన్ని వర్గాల కింద ఒక్కో లావాదేవీకి యూపీఐ పరిమితిని రూ. 1 లక్ష నుండి రూ. 5 లక్షలకు పెంచింది. వీటిలో ప్రత్యక్షంగా, పరోక్షంగా చెల్లింపులు చేయడం, ఆసుపత్రులు- విద్యా సంస్థలకు చెల్లింపులు చేయడం వంటివి ఉన్నాయి. మీరు ఆర్బీఐ IPO లేదా రిటైల్ డైరెక్ట్ స్కీమ్ కోసం దరఖాస్తు చేస్తున్నట్లయితే, రూ. 5 లక్షల పరిమితి ఉంటుంది. షేర్ మార్కెట్‌కు సంబంధించిన బీమా, ఇతర లావాదేవీల పరిమితిని రూ.2 లక్షలుగా నిర్ణ‌యించారు. 

యూపీఐ లైట్ పరిమితి కూడా పెరిగింది

ఆర్బీఐ ఈ సంవత్సరం యూపీఐ లైట్,  UPI123Pay రెండింటి పరిమితులను పెంచాలని నిర్ణయించింది. ఇంతకుముందు యూపీఐ లైట్ వాలెట్ పరిమితి రూ.2,000 ఉండగా, దానిని రూ.5,000కు పెంచారు. యూపీఐ లైట్ చిన్న-విలువ లావాదేవీలకు ఉత్తమంగా పని చేస్తుంది. ప‌న్ అవ‌స‌రం లేకుండా రూ. 1,000 వరకు చెల్లింపుల కోసం అనుకూలంగా ఉంటుంది. గతంలో ఈ పరిమితి రూ.500గా ఉండేది.

ఇంట‌ర్నెట్ క‌నెక్ష‌న్ లేకుండా.. UPI123PAY పరిమితి పెరిగింది

స్మార్ట్‌ఫోన్, ఇంటర్నెట్ కనెక్షన్ లేకుండా యూపీఐని యాక్సెస్ చేయడానికి మిమ్మల్ని అనుమతించే UPI123PAY దాని లావాదేవీ పరిమితిని రూ. 5,000 నుండి రూ. 10,000కి పెంచారు. వినియోగదారులు మిస్డ్ కాల్ చేయడం లేదా IVR నంబర్‌ను డయల్ చేయడం ద్వారా ఈ  ర‌క‌మైన‌ లావాదేవీలు చేయవచ్చు.

కొత్త‌గా యూపీఐ (UPI) సర్కిల్

NPCI ఈ సంవత్సరం UPI సర్కిల్‌ను కూడా ప్రవేశపెట్టింది. ఇది ఒక UPI వినియోగదారుని ప్రాథమిక వినియోగదారు బ్యాంక్ ఖాతా నుండి లావాదేవీలు చేయడానికి గరిష్టంగా 5 మంది వినియోగదారుల కోసం ఆ ఖాతాను ఉపయోగించుకునేలా అనుమతిస్తుంది. ప్రాథమిక వినియోగదారు లావాదేవీ పరిమితులను కూడా సెట్ చేయవచ్చు. ఈ ఫీచర్‌తో, రెండవ వినియోగదారు నెలకు గరిష్టంగా రూ. 15,000, ప్రతి లావాదేవీకి రూ. 5,000 ఖర్చు చేయవచ్చు.

UPI

యూపీఐ లైట్ వాలెట్ ఆటో టాప్-అప్ కూడా వ‌చ్చేసింది 

జూన్ 2024లో RBI మీ బ్యాంక్ ఖాతా నుండి మీ లైట్ వాలెట్‌కి డబ్బును బదిలీ చేయడానికి అవసరమైన అదనపు ప్రమాణీకరణ, ప్రీ-డెబిట్ నోటిఫికేషన్‌ను తీసివేసింది. ఇప్పుడు ఈ విధంగా ధృవీకరణ అవసరం లేదు. మీ UPI లైట్ బ్యాలెన్స్ ఆటోమేటిక్‌గా టాప్ అప్ అవుతుంది.