Gold ETF: గోల్డ్ ఈటీఎఫ్ అంటే ఏమిటి? అందులోనే పెట్టుబడులు పెట్టడం లాభమేనా?
Gold ETF: బంగారాన్ని నేరుగా షాపుకెళ్లి కొంటేనే వాటిపై పెట్టుబడి పెట్టినట్టు కాదు.. గోల్డ్ ఈటీఎఫ్ లో పెట్టుబడి పెట్టినా కూడా బంగారం కొన్నట్టే. ఇది ఒక రకమైన మ్యూచువల్ ఫండ్. ఇది మీరు నెల నెల కట్టే డబ్బుతో బంగారం కొంటుంది.
గోల్డ్ ఈటీఎఫ్ అంటే ఏమిటి?
బంగారంలో పెట్టుబడి పెట్టాలంటే చాలామంది బంగారు ఆభరణాలు, బిస్కెట్లు లేదా నాణేలు కొనుగోలు చేస్తుంటారు. అయితే ఇప్పుడు వాటిని కొనుగోలు చేయకుండానే బంగారంలో పెట్టుబడి పెట్టే అవకాశం ఉంది. అదే గోల్డ్ ETF (Gold Exchange Traded Fund). ఇది ఒక రకమైన మ్యూచువల్ ఫండ్. ఈ ఫండ్ లో మనం పెట్టిన డబ్బుతో నిజమైన బంగారాన్ని కొనుగోలు చేసి భద్రపరుస్తుంది. పెట్టుబడిదారులు మాత్రం డీమ్యాట్ ఖాతా ద్వారా ఈ ఫండ్ యూనిట్లను స్టాక్ మార్కెట్‌లో షేర్ల మాదిరిగా కొనుగోలు చేస్తారు. బంగారం ధర పెరిగితే ఈ యూనిట్ల విలువ కూడా పెరుగుతుంది. అంటే చేతిలో బంగారం లేకపోయినా, బంగారం ధర పెరుగుదల వల్ల వచ్చే లాభాన్ని పొందే అవకాశం ఉంటుంది. ఇటీవల ప్రపంచంలోని ఆర్థిక పరిస్థితుల్లో అనిశ్చితి, మార్కెట్లలో ఒడిదుడుకుల కారణంగా భారతీయులు గోల్డ్ ETFలపై ఎక్కువ ఆసక్తి చూపుతున్నారు.
గోల్డ్ ఈటీఎఫ్ తో ప్రయోజనాలు ఏమిటి?
గోల్డ్ ETFలో పెట్టుబడి పెట్టడం వల్ల అనేక ప్రయోజనాలు ఉన్నాయి. ముందుగా బంగారం స్వచ్ఛత గురించి ఎలాంటి సందేహం ఉండదు. ఇంట్లో లేదా బ్యాంక్ లాకర్‌లో బంగారం భద్రపరచాల్సిన అవసరం ఉండదు. దొంగతనం, పోవడం వంటి ప్రమాదాలు కూడా ఉండవు. అవసరమైనప్పుడు స్టాక్ మార్కెట్‌లో యూనిట్లను సులభంగా విక్రయించి నగదుగా మార్చుకోవచ్చు. చిన్న మొత్తాలతో కూడా పెట్టుబడి ప్రారంభించే అవకాశం ఉంటుంది. అంతేకాకుండా ఆభరణాలు కొనుగోలు చేసినప్పుడు ఉండే మేకింగ్ చార్జీలు, వేస్టేజ్ వంటి అదనపు ఖర్చులు కూడా ఇందులో ఉండవు. అందుకే దీర్ఘకాలిక పెట్టుబడిగా చాలామంది దీనిని ఎంచుకుంటున్నారు.
ఈ విషయాలు తెలుసుకోండి
అయితే గోల్డ్ ETFలో పెట్టుబడి పెట్టేముందు కొన్ని విషయాలు తెలుసుకోవాలి. దీనిలో వచ్చే లాభం పూర్తిగా బంగారం ధరలపై ఆధారపడి ఉంటుంది. బంగారం ధరలు తగ్గితే పెట్టుబడి విలువ కూడా తగ్గవచ్చు. అలాగే ఇది పూర్తిగా రిస్క్ లేనిదని అనుకోకూడదు. ఆర్థిక నిపుణుల అభిప్రాయం ప్రకారం మొత్తం పెట్టుబడిలో సుమారు 5 నుంచి 15 శాతం వరకు మాత్రమే గోల్డ్ ETFలకు కేటాయించడం మంచిది. మిగిలిన మొత్తాన్ని ఈక్విటీ, డెట్ ఫండ్లు లేదా ఇతర పెట్టుబడుల్లో విభజిస్తే రిస్క్ తగ్గుతుంది. సరైన ప్రణాళికతో గోల్డ్ ETFలో పెట్టుబడి పెడితే బంగారాన్ని భౌతికంగా కొనుగోలు చేయకుండానే దాని విలువ పెరుగుదల ప్రయోజనాన్ని పొందవచ్చు. అందుకే ఆధునిక పెట్టుబడిదారులలో గోల్డ్ ETFలు వేగంగా పెరిగాయి.
