మీరు ఎస్‌బిఐ ఖాతాదారులా! అయితే రివార్డ్ పాయింట్ల కోసం కక్కుర్తిపడ్డారో అంతే సంగతి

టెక్నాలజీ పుణ్యాన ప్రపంచమే మన అరచేతిలోకి వచ్చింది. ఒకప్పుడు ఆర్థిక లావాదేవీల కోసం బ్యాంకులకు, ఫుడ్ కోసం హోటళ్లకు, షాపింగ్ చేయాలంటే మాల్స్ కి వెళ్ళేవారు... కానీ ఇప్పుడు ఇంట్లో కూర్చునే ఈ పనులన్నీ చేస్తున్నారు. స్మార్ట్ ఫోన్ లో ఒక్క క్లిక్ తో పనులన్నీ అయిపోతున్నాయి. భూమికి ఓ మూలన కూర్చుని మరో మూలన పనులు చేసుకునే వెసులుబాటు కూడా ఈ టెక్నాలజీ కల్పిస్తుంది. 

ఇలా పనులను సులభం చేసిందని చంకలు గుద్దుకుంటున్న సమయంలోనే ఇదే టెక్నాలజీ మన జేబులకు చిల్లుపెట్టడం ప్రారంభించింది. సెల్ పోన్లు బ్యాంకులుగా మారిపోయినప్పటి నుండి ఆర్థిక మోసాలు పెరిగిపోయాయి. ముక్కూ మొఖం తెలియనివాడు ప్రపంచంలో ఏదో మూలన కూర్చుని మనకు ఒక్క ఫోన్ కాల్ లేదా మేసేజ్ పంపి డబ్బులు దోచేస్తున్నాడు. ఇలా స్మార్ట్ ఫోన్ రాకతో సైబర్ నేరాల సంఖ్య భారీగా పెరిగిపోయింది. 

మనం ఏమాత్రం అజాగ్రత్తగా వున్నా చాలు... అకౌంట్ మొత్తాన్ని ఊడ్చేసి రోడ్డుకు ఈడుస్తున్నారు సైబర్ నేరగాళ్లు. బ్యాంక్ సిబ్బంది పేరిటి, పోలీసులు, ఐటీ అధికారుల పేరిట మన అకౌంట్, ఇతర వివరాలు సేకరించి డబ్బులు దోచుకుంటున్న ఘటనలు అనేకం చూస్తున్నాం. తాజాగా స్టేట్ బ్యాంక్ వినియోగదారులను కొత్త విధానంలో దోచేందుకు ప్లాన్ చేసారు సైబర్ కేటుగాళ్లు. 
 

స్టేట్ బ్యాంక్ కస్టమర్లే టార్గెట్ : 

స్టేట్ బ్యాంక్ ఆఫ్ ఇండియా ఖాతాదారులు, ఎస్‌బిఐ క్రెడిట్ కార్డ్ ఉన్నవారిని టార్గెట్ చేస్తూ మోసగాళ్లు మళ్లీ రంగంలోకి దిగారు. రివార్డ్ పాయింట్ల పేరుతో మోసాలు చేస్తున్నారు. రివార్డ్ పాయింట్లు వచ్చాయని, వెంటనే వాడుకోవాలని ఎస్ఎంఎస్ పంపి మోసం చేస్తున్నారు. 

ఉదాహరణకు మీకు 9,000 రూపాయలు లేదా అంతకంటే ఎక్కువ విలువైన రివార్డ్ పాయింట్లు వచ్చాయని... ఈ పాయింట్లు వాడుకునేందుకు గడువు ఈరోజుతో ముగుస్తుందని నమ్మిస్తారు. వెంటనే వీటిని ఉపయోగించుకోవడానికి కింద ఇచ్చిన లింక్ పై క్లిక్ చేసి యాప్ డౌన్‌లోడ్ చేసుకోవాలని మెసేజ్ ఉంటుంది. డౌన్‌లోడ్ చేసిన తర్వాత ఖాతా నంబర్, మొబైల్ నంబర్, పాస్‌వర్డ్ వంటి బ్యాంక్ ఖాతా వివరాలు అడుగుతారు.

ఇది నిజమేనని నమ్మి వివరాలను అందిస్తే అంతే సంగతి... ఈ సమాచారం సైబర్ మోసగాళ్లకు చేరుతుంది. దీంతో కేటుగాళ్లు క్షణాల్లో మన బ్యాంక్ ఖాతాను ఖాళీ చేస్తారు. అంతేకాదు మన బ్యాంక్ అకౌంట్ ని ఇతర చట్ట వ్యతిరేక కార్యకలాపాలకు కూడా ఉపయోగించవచ్చు. 

ప్రస్తుతం పండగ సీజన్‌ కాబట్టి చాలామంది డెబిట్, క్రెడిట్ కార్డులతో చెల్లింపులు చేస్తారు. కాబట్టి మెసేజ్ రాగానే నిజంగానే రివార్డ్ పాయింట్లు వచ్చాయని కస్టమర్లు నమ్ముతారు... దీంతో చాలా ఈజీగా మోసపోతున్నారు. 
 

ఈ మోసాల నుంచి ఎలా తప్పించుకోవాలి

ఎస్‌బిఐ నుంచి వచ్చే రివార్డ్ పాయింట్ సందేశాలన్నీ నకిలీవి కావు. కానీ ఎస్‌బిఐ ఇలాంటి సందేశాలతో పాటు డౌన్‌లోడ్ లింక్‌లు పంపదు. ఎస్‌బిఐ రివార్డ్ పాయింట్లను ఆన్‌లైన్ బ్యాంకింగ్ ద్వారా మాత్రమే ఉపయోగించుకోవచ్చు. దీనికోసం ఎలాంటి లింక్‌లు క్లిక్ చేయవద్దు. 

మీకు కూడా ఇలాంటి సందేశం వస్తే జాగ్రత్తగా ఉండండి.ఎట్టి పరిస్థితుల్లో వారు పంపినన లింక్‌లను క్లిక్ చేయవద్దు. ఇలాంటి సందేశాలను వెంటనే డిలీట్ చేయండి.యాప్ డౌన్‌లోడ్ చేసుకుంటే వెంటనే అన్‌ఇన్‌స్టాల్ చేయండి, ఫోన్ ఫార్మాట్ చేసుకోవడం మంచిది. లావాదేవీలకు సంబంధించిన ఓటీపీ ఎవరికీ చెప్పకండి.