ITR Filing 2026: ట్యాక్స్ పేయర్లకు అలర్ట్.. మారిన డెడ్‌లైన్, ఐటీఆర్ ఫామ్స్‌లో కొత్త మార్పులు ఇవే

ITR Filing 2026: ట్యాక్స్ పేయర్లకు గుడ్ న్యూస్.. 2025-26 ఆర్థిక సంవత్సరం ఐటీఆర్ ఫైలింగ్ నిబంధనలు మారాయి. నాన్ ఆడిట్ కేస్ గడువు ఆగస్టు 31 వరకు పొడిగించారు. ఐటీఆర్ ఫామ్స్ 1, 2, 3, 4 లలో కీలక మార్పులు చేశారు. ఆ వివరాలు ఇక్కడ తెలుసుకుందాం.

Image Credit : social media

ఐటీఆర్ ఫైలింగ్ 2026: ట్యాక్స్ పేయర్లు తెలుసుకోవాల్సిన కీలక మార్పులు ఇవే

ఆదాయపు పన్ను రిటర్నులు (ITR) దాఖలు చేసే వారికి కేంద్ర ప్రభుత్వం కీలక అప్‌డేట్ ఇచ్చింది. ఆర్థిక సంవత్సరం 2025-26కు సంబంధించి అసెస్‌మెంట్ ఇయర్ 2026-27 ఐటీఆర్ ఫామ్స్‌లో ప్రభుత్వం పలు మార్పులు చేసింది. ట్యాక్స్ చెల్లింపుల ప్రక్రియను మరింత పారదర్శకంగా మార్చడానికి, డేటా ఆధారితంగా పరిశీలించడానికి వీలుగా ఈ మార్పులు తీసుకొచ్చారు. పెట్టుబడి లాభాలు, ట్రేడింగ్ యాక్టివిటీ, బ్యాంక్ అకౌంట్ వివరాలు, డిడక్షన్ క్లెయిమ్‌లకు సంబంధించి ఇకపై మరిన్ని వివరాలు అందించాల్సి ఉంటుంది.

Image Credit : Asianet News

ఐటీఆర్ 3, ఐటీఆర్ 4 గడువు పొడిగింపు

ట్యాక్స్ ఫైలింగ్ క్యాలెండర్‌లో ఈసారి ఒక పెద్ద మార్పు జరిగింది. నాన్ ఆడిట్ కేసుల్లో ఐటీఆర్-3, ఐటీఆర్-4 రిటర్న్‌లను సమర్పించడానికి చివరి తేదీని ఆగస్టు 31 వరకు పొడిగించారు. గతంలో ఈ రిటర్న్‌లను జూలై 31 లోపు ఫైల్ చేయాల్సి ఉండేది. ఈ అదనపు సమయం వ్యాపారవేత్తలు, నిపుణులు, ట్యాక్స్ ప్రాక్టీషనర్లకు కాస్త ఉపశమనం కలిగిస్తుంది. అయితే, రిపోర్టింగ్ నిబంధనలు చాలా వివరంగా మారినందున, ఆర్థిక సమాచారాన్ని సేకరించడం టైమ్ తీసుకుంటుందని, ట్యాక్స్ పేయర్లు ఆలస్యం చేయకుండా ప్రిపేర్ అవ్వాలని నిపుణులు హెచ్చరిస్తున్నారు.

Image Credit : Pixabay

ఐటీఆర్-1 లో కొత్త వెసులుబాటు

ఐటీఆర్-1 ఫామ్‌లో ఈ ఏడాది మరిన్ని మార్పులు తెచ్చారు. ఒకటి కంటే ఎక్కువ ఇళ్ల ద్వారా ఆదాయం వచ్చే వారు గతంలో ఐటీఆర్-2 ఫామ్ ఉపయోగించాల్సి వచ్చేది. కానీ ఇప్పుడు రెండు రెసిడెన్షియల్ ప్రాపర్టీల నుంచి వచ్చే ఆదాయాన్ని ఐటీఆర్-1 లోనే చూపించవచ్చు. 

Image Credit : ChatGPT

ఐటీఆర్-2 లో క్యాపిటల్ గెయిన్స్ పారదర్శకత

కొత్త ఐటీఆర్-2 ఫార్మాట్‌లో క్యాపిటల్ గెయిన్స్ రిపోర్టింగ్‌పై మరింత ఫోకస్ పెట్టారు. ఆస్తుల కొనుగోలు, విక్రయ తేదీలు, వచ్చిన మొత్తం, కొనుగోలు ఖర్చు వంటి ప్రతి లావాదేవీకి సంబంధించిన వివరాలను ట్యాక్స్ పేయర్లు అందించాల్సి ఉంటుంది. దీనితో పాటు, షేర్ బైబ్యాక్ లావాదేవీల వల్ల వచ్చే నష్టాలను విడిగా చూపించడానికి ఈసారి ఫామ్‌లో ప్రత్యేక కాలమ్‌ను చేర్చారు. ట్యాక్స్ డిపార్ట్‌మెంట్ ఇలాంటి లావాదేవీలను మరింత స్పష్టంగా పర్యవేక్షించడానికి ఈ మార్పు ఉపయోగపడుతుందని నిపుణులు పేర్కొంటున్నారు.

Image Credit : freepik

ఐటీఆర్-3 లో ట్రేడింగ్ కేటగిరీలు

ట్రేడింగ్ చేసే వారికి ఐటీఆర్-3 లో పెద్ద మార్పు వచ్చింది. ఎఫ్ అండ్ ఓ కాంట్రాక్టులు, ఇంట్రాడే షేర్ ట్రేడింగ్, కమోడిటీ డీలింగ్స్, ఫారెక్స్ ట్రేడింగ్ ద్వారా వచ్చే లాభనష్టాలను ఇకపై విడివిడిగా డిక్లేర్ చేయాల్సి ఉంటుంది. అలాగే, ట్యాక్స్ ఆడిట్‌కు గురయ్యే వ్యాపారాలు, నిపుణుల కోసం కొన్ని ఆడిటర్ డిస్క్లోజర్ అవసరాలను ఈజీగా మార్చారు. దీనివల్ల పేపర్‌వర్క్ తగ్గి ఫైలింగ్ మరింత వేగంగా, సులువుగా పూర్తవుతుంది.

Image Credit : freepik

ఐటీఆర్-4 లో ప్రిజమ్టివ్ ట్యాక్స్ మార్పులు

ప్రిజమ్టివ్ టాక్సేషన్ స్కీమ్‌ను ఎంచుకునే వ్యక్తులు, వ్యాపారాల కోసం ఐటీఆర్-4 లో వెసులుబాటు కల్పించారు. గరిష్ఠంగా రెండు ఇళ్ల నుండి వచ్చే ఆదాయాన్ని ఈ రిటర్న్‌లోనే చూపించుకోవచ్చు. దీనివల్ల ఫామ్ మార్చాల్సిన అవసరం రాదు. అలాగే సెక్షన్ 112A పరిధిలోకి వచ్చే లిస్టెడ్ షేర్లు, ఈక్విటీ మ్యూచువల్ ఫండ్స్ ద్వారా వచ్చే రూ. 1.25 లక్షల వరకు ఉన్న దీర్ఘకాలిక మూలధన లాభాలను ఐటీఆర్-4 ఫైల్ చేసే ట్యాక్స్ పేయర్లు రిపోర్ట్ చేయడానికి అనుమతించారు.