car maintenance tips: మీ కారు లైఫ్ టైమ్ పెరగాలంటే.. ఈ టిప్స్ పాటించండి
car maintenance tips: ఈ రోజుల్లో కారు లేకపోతే ఎలా? కాని కారు ఎక్కువ కాలం ఇబ్బందులు లేకుండా పనిచేయాలంటే దాని మెయింటనెన్స్ సరిగ్గా చూసుకోవాలి. లేకపోతే చాలా త్వరగా దెబ్బతింటుంది. కారు లైఫ్ టైమ్ పెరగాలంటే ఎలాంటి టిప్స్ పాటించాలో ఇప్పుడు తెలుసుకుందాం.
ఆయిల్స్ చెక్ చేయించండి
కారు పైకి బాగానే కనిపిస్తున్నా ఇంజిన్ ఆయిల్, బ్రేక్ ఫ్లూయిడ్, కూలెంట్, విండ్షీల్డ్ వాషర్ ఫ్లూయిడ్ లాంటి ఆయిల్స్ ఎప్పటికప్పుడు చెక్ చేసి మార్చుకోకపోతే కారు లోపల లోపల దెబ్బతింటుంది. పైకి మాత్రం చెక్కు చెదరకుండా ఉంటుంది. కారు బాగా పనిచేయాలంటే ఇంజిన్ ఆయిల్, మొదలైనవి చాలా ఇంపార్టెంట్. కారుకు అవే ప్రాణం. వాటిని తరచూ తనిఖీ చేసి లెవల్స్ సరిగ్గా ఉన్నాయో లేదో చూసుకోవాలి. అవసరమైతే మార్చాలి. ఇది కారు పనితీరు మెరుగుపరుస్తుంది.
వైపర్ బ్లేడ్లు మార్చేయండి
వర్షాకాలంలో వాన పడేటప్పుడు దారి సరిగ్గా కనిపించకపోతే వైపర్ వేస్తాం కదా.. అప్పుడు గుర్తొస్తుంది అయ్యో.. వైపర్ మార్పించాలనుకున్నాం అని.. కాని ఈ సారి అప్పటి దాకా ఆగకుండా వెంటనే మార్పించండి. వైపర్ పాడైన వెంటనే మార్చకపోతే గ్లాస్ దెబ్బతింటుంది. వైపర్ మార్చుకుంటే వందలు మాత్రమే ఖర్చవుతాయి. గ్లాస్ మార్చాల్సి వస్తే వేలల్లో ఖర్చవుతుంది. వైపర్ బ్లేడ్లు సరిగ్గా పనిచేయాలంటే వాటిని శుభ్రమైన, తడిగా ఉన్న వస్త్రంతో క్రమం తప్పకుండా శుభ్రం చేయాలి. బ్లేడ్లు పాడైపోతే వెంటనే మార్చాలి.
బ్రేకుల తనిఖీ తప్పనిసరి
కారు భద్రతకు బ్రేకులు అత్యంత కీలకం. బ్రేక్ ప్యాడ్లు, రోటర్లు అరిగిపోక ముందే వాటిని ఎప్పటికప్పుడు చెక్ చేసుకుంటూ ఉండాలి. నిపుణుల ద్వారా తరచూ తనిఖీ చేయించుకోవాలి. అవసరమైతే వెంటనే మార్పించాలి. లేదంటే అనవసరమైన ప్రమాదాలకు గురై ప్రాణాల మీదకు తెచ్చుకున్నట్లవుతుంది. బ్రేక్ సిస్టమ్ పనితీరు బాగుంటేనే ప్రయాణాలు హ్యాపీగా సాగుతాయి.
బ్యాటరీ పాడవకుండా చూసుకోండి
కారు బ్యాటరీని ఎప్పటికప్పుడు చెక్ చేసుకుంటూ ఉండాలి. తుప్పు లేదా లీకేజీ వంటి సమస్యలుంటే వెంటనే బాగుచేయించాలి. బ్యాటరీలో ఇతర సాంకేతిక సమస్యలున్నా చెక్ చేయించి వెంటనే రిపేర్ చేయించాలి. బ్యాటరీ మూతలు తీసి లోపల లిక్విడ్ లెవల్స్ ఎలా ఉన్నాయో చెక్ చేసుకోవాలి. బ్యాటరీ మెయింటనెన్స్ బాగుంటే స్టార్టింగ్ సమస్యలు రావు.
టైర్లను చెక్ చేస్తూ ఉండండి
టైర్ల స్థితిని తరచుగా తనిఖీ చేయడం చాలా ముఖ్యం. ఎక్కడైన పగుళ్లు వంటివి ఉంటే వెంటనే టైర్ మార్చేయాలి. లేదంటే పేలిపోయే ప్రమాదం ఉంటుంది. టైర్లో గాలి తక్కువగా ఉన్నా, ఎక్కువగా ఉన్నా ఇబ్బందే. కారు బ్రాండ్ ని బట్టి టైర్లకు ఎంత గాలి ఉండాలో ఆ కంపెనీ నిర్ణయిస్తుంది. ఆ లెక్కనే ఎప్పుడూ టైర్లలో గాలి పట్టించాలి. టైర్లను జాగ్రత్తగా చూసుకుంటే డ్రైవింగ్ సేఫ్ గా చేసుకోవచ్చు. ఇంధన వినియోగం కూడా మెరుగవుతుంది.
