Royal Enfield Bullet 650 : వచ్చేసింది కొత్త రాయల్ ఎన్ఫీల్డ్ బుల్లెట్ 650.. ధర, ఫీచర్లు ఇవే..!

రాయల్ ఎన్‌ఫీల్డ్ బైక్‌లలో బుల్లెట్‌కు చాలా పెద్ద చరిత్ర ఉంది. 1932లో మొదటిసారిగా మార్కెట్లోకి వచ్చిన ఈ బైక్, ఇప్పుడు బుల్లెట్ 650 పేరుతో సరికొత్త అవతారంలో వచ్చేసింది. దీని ధర, రంగులు, ఇతర పూర్తి వివరాలు ఇప్పుడు చూద్దాం.

Image Credit : stockPhoto

రాయల్ ఎన్‌ఫీల్డ్ బుల్లెట్ 650

 భారత్‌లో రాయల్ ఎన్‌ఫీల్డ్ బైక్‌లకు ఎంత క్రేజ్ ఉందో చెప్పక్కర్లేదు. మార్కెట్లో ఎన్ని కొత్త బైక్‌లు వచ్చినా, రాయల్ ఎన్‌ఫీల్డ్ తన స్థానాన్ని పదిలంగా ఉంచుకుంది. ఇప్పుడు సరికొత్త రాయల్ ఎన్‌ఫీల్డ్ 650 బైక్‌ను లాంచ్ చేసింది. 1932లో మొదలైన బుల్లెట్ ప్రస్థానం, ఎన్నో అవతారాలు ఎత్తింది. ఇప్పుడు మరింత ఆకర్షణీయమైన లుక్‌తో మార్కెట్లోకి వచ్చింది.

Image Credit : x

బుల్లెట్ 650 బైక్ ధర

రాయల్ ఎన్‌ఫీల్డ్ బుల్లెట్ 650 బైక్, కానన్ బ్లాక్, బాటిల్‌షిప్ బ్లూ అనే రెండు అదిరిపోయే రంగుల్లో లభిస్తుంది. దీని ఎక్స్-షోరూమ్ ధర రూ. 3,64,856. ప్రపంచంలోనే అత్యంత సుదీర్ఘకాలంగా ఉత్పత్తి అవుతున్న ఈ మోటార్‌సైకిల్, ఇప్పుడు 94వ సంవత్సరంలోకి అడుగుపెట్టింది. దీని గంభీరమైన లుక్, ప్రత్యేకమైన 'థ్రంప్' సౌండ్.. తరతరాలుగా బైకర్లకు ఒక నమ్మకమైన బ్రాండ్‌గా నిలిచింది.

Image Credit : Gaadiwaadi

650 సిసి ఇంజిన్ శక్తి

ఇప్పటివరకు వచ్చిన బుల్లెట్‌లలో ఇదే అత్యంత శక్తివంతమైనది. దీని కొత్త 650cc అవతార్, బుల్లెట్ వారసత్వానికి మరింత బలాన్నిచ్చింది. ఈ బైక్ తన బ్రిటిష్ వారసత్వాన్ని, భారత గడ్డపై తనకున్న తిరుగులేని స్థానాన్ని చాటిచెబుతోంది. ఈ కొత్త బైక్, బుల్లెట్ అభిమానులకు పండగ చేసుకునేందుకు మరో కారణాన్ని ఇచ్చింది.

Image Credit : stockPhoto

ఇండియాలో లాంచ్

ఈ బైక్‌ను మొదట EICMA 2025లో పరిచయం చేశారు. ఆ తర్వాత భారత్‌లో జరిగిన మోటోవర్స్‌లో ప్రదర్శించారు. అప్పటి నుంచే ప్రపంచవ్యాప్తంగా ఉన్న బైక్ రైడర్లలో ఇది విపరీతమైన ఆసక్తిని రేకెత్తించింది. ఇప్పుడు భారత్‌లో అధికారికంగా లాంచ్ అవ్వడంతో, రాయల్ ఎన్‌ఫీల్డ్ అభిమానులకు ఈ బ్రాండ్‌ను సెలబ్రేట్ చేసుకునేందుకు మరో అవకాశం దొరికింది.

Image Credit : stockPhoto

పాత బుల్లెట్ సరికొత్తగా...

రాయల్ ఎన్‌ఫీల్డ్ సీఈఓ బి. గోవిందరాజన్ మాట్లాడుతూ.. 'తొమ్మిది దశాబ్దాలుగా బుల్లెట్ ఒక నమ్మకానికి, స్థిరత్వానికి చిహ్నంగా నిలిచింది. మేము బుల్లెట్ 650తో ఈ ఐకానిక్ బైక్‌ను మార్చడం లేదు. దాని వారసత్వాన్ని, నమ్మకాన్ని కాపాడుతూనే, మా 650cc ప్యారలల్ ట్విన్ ఇంజిన్ పనితీరును, ఆధునికతను జాగ్రత్తగా జోడించాం' అని అన్నారు.

ఈ బైక్‌లో 6-స్పీడ్ గేర్‌బాక్స్‌తో కూడిన ట్విన్ సిలిండర్ ఇంజిన్ ఉంది. ఇది నెమ్మదైన, వేగవంతమైన రైడింగ్ రెండింటికీ స్మూత్ పవర్‌ను అందిస్తుంది. తన 125వ వార్షికోత్సవాన్ని జరుపుకుంటున్న రాయల్ ఎన్‌ఫీల్డ్, ఈ కొత్త బైక్‌తో అమ్మకాల్లో భారీ పెరుగుదలను ఆశిస్తోంది.