Posani Krishna Murali Arrest : పోసానిపై పెట్టిన కేసు ఏమిటి?

ప్రముఖ సినీనటుడు పోసాని కృష్ణమురళిని ఆంధ్ర ప్రదేశ్ పోలీసులు హైదరాబాద్ లో అరెస్ట్ చేసారు. ఇంతకూ ఆయనను ఏ కేసులో అరెస్ట్ చేసారో తెలుసా? 

Posani Krishna Murali Arrest

Posani Krishna Murali Arrest : ఆంధ్ర ప్రదేశ్ లో వైఎస్సార్ కాంగ్రెస్ నాయకుల అరెస్టుల పర్వం కొనసాగుతోంది. ఇటీవల మాజీ ఎమ్మెల్యే వల్లభనేని వంశీని అరెస్ట్ చేసినట్లే ఇప్పుడు ప్రముఖ సినీనటుడు, వైసిపి హయాంలో ఏపీ ఫిలిం డెవలప్ మెంట్ కార్పోరేషన్ గా పనిచేసిన పోసాని కృష్ణమురళిని పోలీసులు అరెస్ట్ చేసారు. రాయదుర్గంలోని మైహోం భుజా అపార్ట్ మెంట్ లో పోసాని ప్లాట్ కు వెళ్లిన ఏపీ పోలీసులు అదుపులోకి తీసుకున్నారు. 

గత వైసిపి పాలనలో పోసాని కృష్ణమురళి టిడిపి అధినేత చంద్రబాబు నాయుడు, ఆయన తనయుడు నారా లోకేష్, జనసేన అధ్యక్షులు పవన్ కల్యాణ్ పై అనుచిత వ్యాఖ్యలు చేసారు. దీంతో టిడిపి, జనసేన నాయకులు ఆయనపై పోలీసులకు ఫిర్యాదులు చేసారు. అయితే కూటమి ప్రభుత్వ ఏర్పాటుతర్వాత ఈ వ్యవహారాన్ని పోలీసులు సీరియస్ గా తీసుకున్నారు. దీంతో రాయచోటి పోలీసులు ఆయనను అదుపులోకి తీసుకున్నారు. 

ప్రస్తుతం పోసాని కృష్ణమురళిని హైదరాబాద్ నుండి ఆంధ్ర ప్రదేశ్ కు తరలిస్తున్నారు. ఈ అరెస్ట్ పై రాయదుర్గం పోలీసులకు ముందుగానే సమాచారం అందించి సహకారం తీసుకున్నారు ఏపీ పోలీసులు. పోసానిని ఏపీకి తరలించే సమయంలో కూడా తెలంగాణ పోలీసుల సహకారం తీసుకుంటున్నారు. పోసానిని రాజంపేటకు తరలించి విచారించనున్నట్లు తెలుస్తోంది. 

పోసానిని అరెస్ట్ చేసిన కేసు ఇదేనా? 

వైసిపి అధికారంలో ఉండగా పోసాని కృష్ణమురళి టిడిపి, జనసేన నాయకులపై తీవ్రస్థాయిలో విరుచుకుపడేవారు. ముఖ్యంగా చంద్రబాబు,లోకేష్, పవన్ కల్యాణ్ లపై అనుచిత వ్యాఖ్యలు చేసేవాడు. వారి వ్యక్తిగత విషయాలను ప్రస్తావిస్తూ అనుచిత వ్యాఖ్యలు చేసేవాడు. 

ఇలా గతంలో అధికారపార్టీ అండతో మాట్లాడి ఇప్పుడు చిక్కుల్లో పడ్డారు పోసాని. ఆయనపై అనేక కేసులు నమోదయ్యాయి... ఇలా అన్నమయ్య జిల్లా ఓబులవారిపల్లి పోలీస్ స్టేషన్ లో పలు సెక్షన్ల కింద కేసు నమోదయ్యింది. ఈ కేసులోనే ఆయనను అరెస్ట్ చేసినట్లు తెలుస్తోంది.

 పోసానిపై నాన్‌బెయిలబుల్‌ కేసులు నమోదు చేసారు పోలీసులు.. సెక్షన్‌ 196, 353(2), 111 రెడ్‌ విత్‌ 3(5) BNS సెక్షన్ల కింద ఆయనను అరెస్ట్ చేసారు. కులాల పేరుతో దూషించడం, ప్రజల్లో వర్గ విభేదాలు సృష్టించారని పోసానిపై ఈ కేసులు పెట్టారు. ఆయనను హైదరాబాద్ నుండి రాజంపేటకు తరలించి అడిషనల్‌ మెజిస్ట్రేట్‌ ఎదుట హాజరుపర్చనున్నారు.  

పోసాని కృష్ణమురళి అరెస్ట్ విషయాన్ని ఏపీ పోలీసులు చాలా గోప్యంగా ఉంచారు. బుధవారం ఉదయమే ఏపీ నుండి ఓ ఎస్సై, ఐదుగురు కానిస్టేబుల్స్ హైదరాబాద్ కు చేరుకున్నారు... పోసాని అరెస్ట్ గురించి రాయదుర్గం పోలీసులకు సమాచారం అందించారు. అయితే పోసాని ఇంట్లో ఉన్న సమయాన్ని చూసి ఒక్కసారిగా వెళ్ళి అరెస్ట్ చేసారు. 

అరెస్ట్ సమయంలో పోలీసులతో పోసాని వాగ్వాదం : 

వైసిపి హయాంలో పొలిటికల్ గా యాక్టివ్ గా ఉన్న పోసాని కూటమి అధికారంలోకి రాగానే సైలెన్స్ అయిపోయారు. ఇక తాను రాజకీయంగా దూరంగా ఉంటానని...ఫుల్ టైమ్ సినిమాలకే పరిమితం అవుతానని కూడా ప్రకటించారు. ప్రెస్ మీట్ పెట్టిమరీ ఈ విషయాన్ని ప్రకటించారు. 

ఈ సమయంలోనే కూటమి ప్రభుత్వం ఎక్కడ అరెస్ట్ చేస్తుందోనని భయపడే పోసాని కృష్ణమురళి ఈ ప్రకటన చేసారని ప్రచారం జరిగింది. ఇలా తాను రాజకీయాలలో జోక్యం చేసుకోనని ప్రకటించినా ఆయనను వదిలిపెట్టలేదు. ఎట్టకేలకు ఆయనను అరెస్ట్ చేసారు. 

అరెస్ట్ చేయడానికి ఇంట్లోకి వచ్చిన పోలీసులతో పోసాని కృష్ణమురళి వాగ్విదానికి దిగారు. ఇందుకు సంబంధించిన వీడియో ఒకటి బయటకు వచ్చింది. కొద్దిసేపు వాగ్వాదం తర్వాత పోసానిని ఇంట్లోంచి బయటకు తీసుకువచ్చిన పోలీసులు తమ వాహనంలో తరలించారు. 

పోసాని అరెస్ట్ వీడియో కోసం ఇక్కడ క్లిక్ చేయండి