విశాల్ డిటెక్టివ్ మూవీ రివ్యూ

తెలుగువాడైన తమిళ హీరో విశాల్ కు తమిళ ప్రేమతో పాటు తెలుగులో కూడా మంచి ఫాలోయింగ్ ఉంది. విశాల్ నటించిన తాజా చిత్రం ‘తుప్పరివాలన్’... తెలుగులో ‘డిటెక్టివ్’ పేరుతో ఈరోజే విడుదలైంది. తమిళంలో విశేష ఆదరణ పొందిన ఈ చిత్రం తెలుగు ఆడియన్స్ ను ఆకట్టుకుందా..

 

కథ :

పోలీసులకు కూడా సాధ్యం కాని కొన్ని కేసుల్ని సులభంగా పరిష్కరించే ఫేమస్ డిటెక్టివ్ అద్వైత భూషణ్ (విశాల్) ఒక చిన్న కేసును ఇన్వెటిగేట్ చేస్తుండగా అతనికి వరుస హత్యలకి సంబందించిన ఒక లింక్ దొరుకుతుంది. అదే సమయంలో పోలీసులు కూడా ఆ వరుస హత్యల వెనకున్న హంతకుల్ని పట్టుకోవడానికి సహాయం చేయమని అద్వైత భూషణ్ ని అడుగుతారు. అసలు ఆ వరుస హత్యలు ఎందుకు జరిగాయి, వాటిని ఎవరు, ఎందుకు చేశారు, డిటెక్టివ్ అద్వైత భూషణ్ ఆ కేసుని ఎలా ఇన్వెస్టిగేట్ చేశాడు, హంతకుల్ని ఎలా పట్టుకున్నాడు అనేదే కథ.

 

విశ్లేషణ :

తెలుగునాట పూర్తిస్థాయి డిటెక్టివ్ సినిమాలొచ్చి చాలా కాలమైంది. కాబట్టి ఇన్వెస్టిగేటివ్ తరహా సినిమాల్ని ఇష్టపడేవారికి ఈ సినిమా మంచి చాయిస్ గా నిలుస్తుంది. దర్శకుడు మిస్కిన్ డిటెక్టివ్ సినిమాకు స్క్రీన్ ప్లే ముఖ్యమనే సూత్రాన్ని బాగా గుర్తుపెట్టుకుని తీసుకున్న కథ చిన్నదే అయినా కథనాన్ని మాత్రం బాగానే రాసుకున్నాడు. కథనంలో అనవసరమైన పాత్రలకు, సంభాషణలకు చోటివ్వకుండా సినిమాను నడిపి ఆకట్టుకున్నాడు.

ముఖ్యంగా డిటెక్టివ్ వరుస హత్యల మిస్టరీని ఛేదించే పనిలోకి దిగినప్పటి నుండి కథనంలో అనేక మలుపులను ప్రవేశపెట్టి, ఉత్కంఠభరితమైన సన్నివేశాలతో సెకండాఫ్ ను బాగా డీల్ చేశాడు.

 

నటీనటులు:

హీరో విశాల్ డిటెక్టివ్ పాత్రకు చాలా వరకు న్యాయం చేశాడు. ప్రత్యేకమైన డ్రెస్సింగ్, బాడీ లాంగ్వేజ్ తో ఇంటెలిజెన్స్ ను ప్రదర్శిస్తూ, యాక్షన్ సన్నివేశాల్లో తన ట్రేడ్ మార్కును చూపిస్తూ మెప్పించాడు. హీరో స్నేహితుడిగా ప్రసన్న నటన కూడా చాలా బాగుంది. అను ఎమాన్యుయెల్, యాండ్రియా తమ పాత్రలకు తగు న్యాయం చేశారు.

 

సినిమా మొదటి అర్థభాగంలో డిటెక్టివ్ పాత్రను, హంతకుల్ని పరిచయం చేయడానికి మిస్కిన్ రాసిన సన్నివేశాలు బాగున్నా వాటిని చూపించడంలో ఆయన ప్లే చేసిన డ్రామా కొద్దిగా కన్ఫ్యూజన్ కు గురిచేసింది. నిజానికి అంత కాంప్లికేటెడ్ స్క్రీన్ ప్లే అవసరం లేదు కూడ. పైగా ఇంటర్వెల్ ముందు వరకు సినిమాలోని ప్రధాన సమస్య ఏమిటో తెలియకపోవడం, డిటెక్టివ్ కూడా అసలు కేసులోకి దిగకపోవడంతో కొంత నిరుత్సాహం కలిగింది.

 

దర్శకుడు మిస్కిన్ కథనల్లో కొంత ఎక్కువ స్వేచ్ఛనే తీసుకున్నారు. ముఖ్యంగా క్లైమాక్స్ లో మిస్కిన్ చూపిన కొన్ని అంశాలతో రాజీ పడటం కొంత కష్టంగానే ఉంటుంది. వారు హత్యలు చేస్తున్న హంతకుల ముఖ్య ఉద్దేశ్యం ఏమిటి, వాళ్ళ లక్ష్యం ఏమిటి అనే విషయాల్ని ఇంకొంత వివరంగా చూపించి ఉంటే బాగుండేది. అలాగే రెగ్యులర్ ఆడియన్సుకి కావాల్సిన కామెడీ, రొమాన్స్ వంటి అంశాలు ఈ సినిమాలు దొరకవు. ఈ చిత్రం ఒక సెట్ ఆఫ్ ఆడియన్సుకి మాత్రమే వర్కవుటవుతుంది.

 

సాంకేతిక విభాగం :

దర్శకుడు మిస్కిన్ ఒక డిటెక్టివ్ సినిమాకు ఎలాంటి ప్లే అవసరమో అలాంటి ప్లే రాసుకోవడంలో చాలా వరకు సక్సెస్ అయ్యాడు. హీరో పాత్రలో ఇంటెలిజెన్స్ ను అను క్షణం ప్రదర్శిస్తూ, ఉతకంఠభరితమైన పరిశోధనా సన్నివేశాలతో ఆకట్టుకున్నారాయన. కానీ ఫస్టాఫ్ చివరి వరకు సినిమా లక్ష్యమేమిటో చెప్పకుండా కొంత కన్ఫ్యూజన్ డ్రామాను నడిపి కొంత నిరుత్సాహపరిచారు. సినిమా ఆరంభంలో, ప్రీ క్లైమాక్స్, క్లైమాక్స్ లో డిటెక్టివ్, హంతకుల ప్రతిభను ప్రేక్షకులకి చూపించడానికి మిస్కిన్ రాసిన సన్నివేశాలు బాగున్నాయి. అర్రోల్ కొరెల్లి ఒక పూర్తిస్థాయి డిటెక్టివ్ థ్రిల్లర్ కు ఎలాంటి ప్రత్యేకమైన స్కోర్ కావాలో అలాంటిదాన్నే అందించి ప్రతి చోట మెప్పించాడు. కొరెల్లి నేపథ్య సంగీతం సినిమాకు చాలా సహాయపడింది. డిటెక్టివ్ సినిమాలకు ఎలాంటి స్కోర్ కావాలో అలంటి స్కోర్ నే అందించారు. ఒకసారి వినిపించిన స్కోర్ ను పదే పదే రిపీట్ చేయకుండా కొత్త కొత్త స్కోర్స్ వాడి ఆకట్టుకున్నారాయన. ఎడిటింగ్ విభాగం ఫస్టాఫ్ కథనంలో ఇంకాస్త క్లారిటీ ఉండేలా వర్క్ చేసుంటే బాగుండేది. కార్తీక్ వెంకట్రామన్ సినిమాటోగ్రఫి బాగుంది. హరి గుజ్జలపూడి నిర్మాణ విలువలు బాగున్నాయి.

 

ప్లస్ పాయింట్స్ :

విశాల్ నటన, కథ, స్క్రీన్ ప్లే, సంగీతం

 

మైనస్ పాయింట్స్ :

ఫస్టాఫ్ లో కొద్దిగా నెమ్మదించడం, ఎడిటింగ్ మరింత పదును పెట్టాల్సింది, తెలుగు సినిమాల్లో వుండాల్సిన మాస్ మసాలాలు లేకపోవడం

 

చివరగా :

ఇన్వెస్టిగేషన్ తరహా సినిమాల్ని, సస్పెన్స్ థ్రిల్లర్స్ ను ఇష్టపడే వారికి నచ్చుతుంది.