విజయ్ ఆంటోని నెమ్మదిగా తెలుగులో తన మార్కెట్ని పెంచుకుంటున్నారు. ఇటీవల ఆయన `బిచ్చగాడు 2`తో బంపర్ హిట్ని అందుకున్నారు. ఈ సినిమా తెలుగులో బాగా ఆడింది. ఇప్పుడు `హత్య` సినిమాతో వస్తున్నారు.
`బిచ్చగాడు` సినిమాతో తెలుగులో మంచి మార్కెట్ ఏర్పర్చుకున్నాడు విజయ్ ఆంటోని. ఆ తర్వాత ఆయన సినిమాలు తెలుగులో ఆడలేదు. మళ్లీ ఇటీవల `బిచ్చగాడు 2`తో ఆకట్టుకున్నాడు. ఈ సినిమా తెలుగులో మంచి ఆదరణ పొందింది. ఈ సినిమా తెలుగు స్టేట్స్ లో 16కోట్ల గ్రాస్ని వసూలు చేసిందంటే మామూలు విషయం కాదు. సుమారు 9కోట్ల షేర్ని రాబట్టింది. ఈ నేపథ్యంలో విజయ్ ఆంటోని సినిమాలకు మంచి క్రేజ్ ఏర్పడింది. ఆ ప్రభావం ఇప్పుడు ఆయన్నుంచి వస్తోన్న `హత్య` సినిమాపై ఉంది. ఈ చిత్రాన్ని మంచి రేటుకి తెలుగు రిలీజ్ రైట్స్ అమ్ముడు పోయాయి.
రెండు తెలుగు రాష్ట్రాల హక్కులను సురేష్ ప్రొడక్షన్స్, ఏసియన్ సినిమాస్ సొంతం చేసుకుంది. ఈ రెండు డిస్ట్రిబ్యూషన్ సంస్థలు కలిసి `హత్య` సినిమాను జూలై 21న భారీ ఎత్తున రిలీజ్ చేయబోతోన్నారు. అయితే సుమారు మూడు, నాలుగు కోట్లకి తెలుగు రైట్స్ దక్కించుకున్నట్టు తెలుస్తుంది. దీంతో ఈసినిమాపై మంచి బజ్ ఏర్పడింది. విజయ్ ఆంటోని హీరోగా నటిస్తున్న ఈ మూవీ సరికొత్త లైన్తో క్రైమ్ థ్రిల్లర్ బ్యాక్ డ్రాప్లో తెరకెక్కిందని చిత్ర బృందం తెలిపింది. `ఇన్వెస్టిగేటివ్ థ్రిల్లర్ నేపథ్యంలో సాగే ఈ సినిమాలో విజయ్ ఆంటోని డిటెక్టివ్ పాత్రలో కనిపించనున్నారు. రితికా సింగ్, మీనాక్షి చౌదరిలు హీరోయిన్లుగా నటించారు. ఇటీవల రిలీజ్ చేసిన ట్రైలర్కు ఆడియన్స్ నుంచి మంచి రెస్పాన్స్ వచ్చింది` అని పేర్కొన్నారు.
రీసెంట్గా ఈ మూవీ నుంచి రిలీజ్ చేసిన ఎవరు నువ్వు? అంటూ సాగే లిరికల్ వీడియోకు మంచి రెస్పాన్స్ వచ్చింది. బాలాజీ కుమార్ దర్శకత్వంలో తెరకెక్కిన హత్య మూవీలో విజయ్ ఆంటోని కంప్లీట్ మేకోవర్తో.. సరికొత్త కొత్త లుక్లో కనిపించనున్నారు. లోటస్ పిక్చర్స్తో కలిసి ఇన్ఫినిటీ ఫిల్మ్ వెంచర్స్ హత్య మూవీని నిర్మిస్తోంది. కమల్ బోరా, జి.ధనుంజయన్, ప్రదీప్ బి, పంకజ్ బోరా, విక్రమ్ కుమార్, తాన్ శ్రీ దొరైసింగం పిళ్లై, సిద్ధార్థ్ శంకర్, ఆర్విఎస్ అశోక్ కుమార్ ప్రొడ్యూసర్లుగా వ్యవహరిస్తున్నారు.
ఈ చిత్రంలో మురళీ శర్మ, మీనాక్షి చౌదరి, జాన్ విజయ్, రాధిక శరత్కుమార్, సిద్ధార్థ్ శంకర్, అర్జున్ చిదంబరం, కిషోర్ కుమార్, సంకిత్ బోరా తదితరులు కీలక పాత్రలు పోషిస్తున్నారు. శివకుమార్ విజయన్ సినిమాటోగ్రఫీ అందిస్తుండగా.. ఆర్కే సెల్వ ఎడిటింగ్ బాధ్యతలు నిర్వహిస్తున్నారు.
