బ్లాక్బస్టర్ డైరెక్టర్ బోయపాటి శ్రీను డైరెక్షన్ లో ఇస్మార్ట్ హీరో్ రామ్ పోతినేని కాంబినేషన్ మూవీ ఓపెనింగ్ గ్రాండ్ గా జరిగింది. నిర్మాత శ్రీనివాసా చిట్టూరి నిర్మిస్తున్న పాన్ ఇండియా మూవీ పూజా కార్యక్రమాలతో ప్రారంభం అయ్యింది. మరి రెగ్యూలర్ షూటింగ్ ఎప్పుడు..?
ఇస్మార్ట్ శంకర్ సినిమాతో చాక్లెట్ బాయ్ ఇమేజ్ ను పక్కకు నెట్టి.. మాస్ హీరోగా అవతారం ఎత్తిన రామ్ పోతీనేని.. అప్పటి నుంచీ మాస్ కథలపైనే ఇంట్రెస్ట్ చూపిస్తున్నాడు. ఇక ఇస్మార్ట్ శంకర్ తరువాత రామ్ సినిమాలు పెద్దగా వర్కౌట్ అవ్వలేదు. దాంతో ఊరమాస్ డైరెక్టర్ బోయపాటి శ్రీనుతో.. పాన్ ఇండియా సినిమాను సెట్స్ ఎక్కిస్తున్నాడు రామ్. ఈమూవీ ఓపెనింగ్ ఈరోజు( జూన్ 1) ఘనంగా జరిగింది.
దర్శకులు బోయపాటి శ్రీను అడపా దడపా డిజాస్టర్స్ ఫేస్ చేసినా.. ఆయన సినిమా తీస్తే హీరోలకు మాస్ ఇమేజ్ వచ్చేస్తుంది. తెలుగు సినిమా ఇండస్ట్రీకి భద్ర, తులసి, సింహ, దమ్ము, లెజెండ్, సరైనోడు, జయ జానకి నాయక, అఖండ వంటి బ్లాక్ బస్టర్ సినిమాలను ఆయన అందించారు. భాషలకు అతీతంగా అన్ని వర్గాల ప్రేక్షకులను అలరించే విధంగా, కంటెంట్ బేస్డ్ కమర్షియల్ సినిమాలు తీశారు. సౌత్ టు నార్త్... ఆయన సినిమాలకు ఫ్యాన్స్ అన్ని భాషల్లోనూ ఉన్నారు. ఇప్పుడు ఉస్తాద్ రామ్ పోతినేని హీరోగా బోయపాటి శ్రీను పాన్ ఇండియా సినిమా ప్రారంభించారు.
బోయపాటి శ్రీను, రామ్ పోతినేని కాంబినేషన్లో పాన్ ఇండియా సినిమాను శ్రీనివాసా సిల్వర్ స్క్రీన్ పతాకంపై ప్రొడక్షన్ నెంబర్ 9గా ప్యాషనేట్ ప్రొడ్యూసర్ శ్రీనివాసా చిట్టూరి నిర్మిస్తున్నారు. ఈ రోజు పూజా కార్యక్రమాలతో సినిమా ప్రారంభం అయ్యింది. బోయపాటి శ్రీను దర్శకత్వం వహించిన అఖండ సినిమాకు ప్రేక్షకులు బ్రహ్మరథం పట్టడం, థియేటర్లకు మళ్ళీ పూర్వ వైభవం రావడంతో ఇండస్ట్రీ ఊపిరి పీల్చుకుంది. ఆ సినిమా తర్వాత బోయపాటి చేస్తున్న సినిమా ఇదే కావడం విశేషం. దర్శకుడిగా ఆయన 10వ సినిమా. హీరో రామ్ 20వ సినిమా ఇది. ది వారియర్ తర్వాత రామ్ నటిస్తున్న మూవీ ఇది.
ఇక ఈరోజు సినిమా ఓపెనింగ్ గ్రాండ్ గా జరిగింది. హీరో రామ్ మీద చిత్రీకరించిన ముహూర్తపు సన్నివేశానికి ప్రముఖ నిర్మాత బూరుగుపల్లి శివరామకృష్ణ కెమెరా స్విచ్ఛాన్ చేయగా, ప్రముఖ నిర్మాత స్రవంతి రవికిశోర్ క్లాప్ ఇచ్చారు. దర్శకులు బోయపాటి శ్రీను గౌరవ దర్శకత్వం వహించారు. ఈ ప్రారంభోత్సవ వేడుకలో దర్శకులు లింగుస్వామి, వెంకట్ ప్రభు స్క్రిప్ట్ అందజేశారు. ఈనెలలోనే రెగ్యూలర్ షూటింగ్ స్టార్ట్ చేయబోతున్నారు టీమ్.
ఈ సందర్భంగా నిర్మాత శ్రీనివాసా చిట్టూరి మాట్లాడుతూ బోయపాటి శ్రీను దర్శకత్వంలో సినిమా ప్రారంభించడం సంతోషంగా ఉంది. ది వారియర్ తర్వాత మా హీరో రామ్తో వెంటనే మరో సినిమా చేయడం ఆనందంగా ఉంది. మా సంస్థలో ప్రతిష్ఠాత్మక చిత్రమిది. భారీ బడ్జెట్ తో, హై టెక్నికల్ వాల్యూస్ తో ఈ సినిమా చేయబోతున్నాం. తెలుగు, తమిళ, హిందీ, కన్నడ, మలయాళ భాషల్లో భారీ ఎత్తున సినిమా విడుదల చేస్తాం అన్నారు.