దక్షిణాది స్టార్ హీరోయిన్ నయనతారకి ఈ మధ్య ఏదీ కలిసి రావడం లేదు.
దక్షిణాది స్టార్ హీరోయిన్ నయనతారకి ఈ మధ్య ఏదీ కలిసి రావడం లేదు. ఇటీవల ఆమె నటించిన 'ఐరా', 'మిస్టర్ లోకల్' వంటి చిత్రాలు ఫ్లాప్ అయ్యాయి. లేడీ ఓరియెంటెడ్ నేపధ్యంలో ఆమె నటించిన సస్పెన్స్, థ్రిల్లర్ సినిమా 'కొలైయుదీర్ కాలం' సినిమా విడుదలకు నోచుకోవడం లేదు.
మొదటినుండి ఈ సినిమాను కష్టాలు వెంటాడుతూనే ఉన్నాయి. మొదట యువన్ శంకర్ రాజా ఈ సినిమాకు సంగీత దర్శకుడిగా, నిర్మాణ భాగస్వామిగా ఉన్నారు. ఆ తరువాత ఆయన సినిమా నుండి తప్పుకున్నారు. ఇక ఇటీవల జరిగిన సినిమా ఆడియో ఆవిష్కరణ కార్యక్రమంలో సీనియర్ నటుడు రాధారవి.. నయనతారపై అనుచిత వ్యాఖ్యలు చేసి వివాదానికి దారి తీశారు.
ఈ వ్యవహారమంతా సద్దుమణిగి ఈ నెల 14న సినిమా విడుదల చేయడానికి సన్నాహాలు చేస్తోన్న సమయంలో మద్రాస్ హైకోర్టు ఈ సినిమాకి షాక్ ఇచ్చింది. వివరాల్లోకి వెళితే.. బాలాజీ మోహన్ అనే వ్యక్తి 'కొలైయుదీర్ కాలం' సినిమా టైటిల్ ను తాను రూ.10 లక్షలు చెల్లించి పొందానని, ఆ టైటిల్ హక్కులు తనకు చెందినవని మద్రాస్ హైకోర్టులో పిటిషన్ దాఖలు చేశారు.
తన టైటిల్ ను ఉపయోగించిన నయనతార చిత్ర విడుదలపై నిషేధం విధించాలని అందులో పేర్కొన్నారు. దీనిపై విచారించిన హైకోర్టు మంగళవారం నయనతార నటించిన ఈ సినిమా విడుదలపై స్టే విదిస్తూ ఉతర్వులు జారీ చేసింది. ఈ వ్యవహారంపై ఈ జూన్ 21లోగా వివరణ ఇవ్వాలంటూ ఆదేశాలు జారీ చేశారు.
