వెంకటేష్‌ కి చాలా రోజుల తర్వాత పూర్వవైభవాన్ని తీసుకొచ్చిన చిత్రం `ఎఫ్‌2`. తన మార్క్ కామెడీని చాలా రోజుల తర్వాత చవిచూపించిందీ చిత్రం. అనిల్‌ రావిపూడి మార్క్ దర్శకత్వ ప్రతిభ, వెంకటేష్‌, వరుణ్‌ తేజ్‌ కాంబినేషన్‌లోని కామెడీ, తమన్నా, మెహరీన్‌ అందాలు ఈ సినిమాకి తిరుగులేని విజయాన్ని అందించాయి.  తాజాగా దీనికి సీక్వెల్‌గా `ఎఫ్‌3`ని తెరకెక్కించబోతున్నట్టు వెంకీ పుట్టిన రోజున ప్రకటించారు. ఆ వెంటనే పూజా కార్యక్రమాలు నిర్వహించారు. 

బుధవారం షూటింగ్‌ని ప్రారంభించారు. తొలి షెడ్యూల్‌, తొలిరోజు వెంకీమామ వెంకటేష్‌ పాల్గొనడం విశేషం. ఆయన షూటింగ్‌లో పాల్గొని చిత్ర బృందాన్ని సరదాగా నవ్వించినట్టు దర్శకుడు అనిల్‌రావిపూడి తెలిపారు. ఇందులో గత కాస్టింగే అయిన వరుణ్‌ తేజ్‌, తమన్నా, మెహరీన్‌ నటించనున్నారు. శ్రీ వెంకటేశ్వర క్రియేషన్స్ పతాకంపై దిల్‌రాజు నిర్మిస్తున్నారు. 

ఇదిలా ఉంటే ఇటీవల 50వ వసంతంలోకి అడుగుపెట్టిన దిల్‌రాజు బుధవారం ఏకంగా తాను నిర్మించే ఐదు సినిమాలను సెట్స్ పైకి తీసుకెళ్లారు. `ఎఫ్‌3`తోపాటు `వకీల్‌ సాబ్‌`, `థ్యాంక్యూ`, `పాగల్‌`, `హుషారు` డైరెక్టర్‌ హర్షతో తీయబోతున్న సినిమాని సెట్‌పైకి తీసుకెళ్లినట్టు శ్రీవెంకటేశ్వర క్రియేషన్స్ ప్రకటించింది. దిల్‌రాజు బ్యానర్‌లో రూపొందే ఐదు సినిమాలు ఏకకాలంలో సెట్‌లో ఉండటం విశేషం. 

మరోవైపు దిల్‌రాజు ఈ సమ్మర్‌లో రెండో పెళ్ళి చేసుకున్న విషయం తెలిసిందే. వైఘారెడ్డిని ఆయన నిజమాబాద్‌లోని వెంకటేశ్వర టెంపుల్‌లో అతికొద్ది మంది బంధుమిత్రుల సమక్షంలో వివాహం చేసుకున్నారు. అనంతరం ఇటీవల తన పుట్టిన రోజు సందర్భంగా సేవా కార్యక్రమాలు చేస్తానని చెప్పడం, ఇప్పుడు ఒకేసారి ఐదు సినిమాలు షూటింగ్‌లో ఉండటం రెండో పెళ్లి దిల్‌రాజుకి బాగా కలిసొచ్చిందనే చెప్పొచ్చు.