ఐపీఎల్ 2022 సీజన్‌లో 8వ విజయంతో ప్లేఆఫ్స్‌కి అర్హత సాధించిన మొట్టమొదటి జట్టుగా నిలిచిన గుజరాత్ టైటాన్స్... ఆర్‌సీబీకి హ్యాట్రిక్ ఓటమి... 

విరాట్ కోహ్లీ హాఫ్ సెంచరీతో కమ్‌బ్యాక్ ఇచ్చినా ఆర్‌సీబీని కాపాడలేకపోయాడు. వరుసగా మూడో మ్యాచ్‌లోనూ ఓడిన రాయల్ ఛాలెంజర్స్ బెంగళూరు, హ్యాట్రిక్ పరాజయాలతో ప్లేఆఫ్స్ అవకాశాలను సంక్లిష్టం చేసుకోగా... 9 మ్యాచుల్లో 8వ విజయాన్ని అందుకున్న గుజరాత్ టైటాన్స్... ఐపీఎల్ 2022 సీజన్‌లో ప్లేఆఫ్స్‌కి అర్హత సాధించిన మొట్టమొదటి జట్టుగా నిలిచింది... 

171 పరుగుల లక్ష్యఛేదనలో గుజరాత్ టైటాన్స్‌కి శుభారంభం అందించారు ఓపెనర్లు. తొలి వికెట్‌కి 51 పరుగుల భాగస్వామ్యం నెలకొల్పిన తర్వాత 22 బంతుల్లో 4 ఫోర్లతో 29 పరుగులు చేసిన వృద్ధిమాన్ సాహా, హసరంగ బౌలింగ్‌లో అవుట్ అయ్యాడు...

28 బంతుల్లో 3 ఫోర్లు, ఓ సిక్సర్‌తో 31 పరుగులు చేసిన శుబ్‌మన్ గిల్, షాబాజ్ అహ్మద్ బౌలింగ్‌లో ఎల్బీడబ్ల్యూగా అవుట్ అయ్యాడు. అంతకుముందు బంతికే గిల్, వికెట్ కీపర్ క్యాచ్ ద్వారా అవుట్ అయినా అనుజ్ రావత్ బెయిల్స్ దాటకముందే బంతిని అందుకోవడంతో నో బాల్‌గా ప్రకటించాడు అంపైర్...

కెప్టెన్ హార్ధిక్ పాండ్యా 5 బంతుల్లో 3 పరుగులు చేసి షాబాజ్ అహ్మద్ బౌలింగ్‌లోనే పెవిలియన్ చేరగా 14 బంతుల్లో 2 ఫోర్లతో 20 పరుగులు చేసిన సాయి సుదర్శన్, హసరంగ బౌలింగ్‌లో అవుట్ అయ్యాడు.

ఆ తర్వాత రాహుల్ తెవాటియా, డేవిడ్ మిల్లర్ కలిసి స్కోరు బోర్డును పరుగులు పెట్టించారు. మూడు సార్లు రాహుల్ తెవాటియా అవుట్ కోసం డీఆర్‌ఎస్ తీసుకున్నా, అదృష్టం ఆర్‌సీబీకి ఏ మాత్రం కలిసి రాలేదు. 

గుజరాత్ టైటాన్స్ విజయానికి 3 ఓవర్లలో 36 పరుగులు కావాల్సిన దశలో జోష్ హజల్‌వుడ్ వేసిన 17వ ఓవర్‌లో ఏకంగా 17 పరుగులు వచ్చాయి. హర్షల్ పటేల్ వేసిన 19వ ఓవర్‌లో ఆఖరి బంతికి సిక్సర్ బాదిన తెవాటియా 12 పరుగులు రాబట్టాడు. దీంతో ఆఖరి ఓవర్‌లో టైటాన్స్ విజయానికి 7 పరుగులు మాత్రమే కావాల్సి వచ్చింది. 

డేవిడ్ మిల్లర్ ఓ ఫోర్, రాహుల్ తెవాటియా ఓ ఫోర్ బాది మ్యాచ్‌ని ముగించారు. డేవిడ్ మిల్లర్ 24 బంతుల్లో 4 ఫోర్లు, ఓ సిక్సర్‌తో 39 పరుగులు చేయగా రాహుల్ తెవాటియా 25 బంతుల్లో 5 ఫోర్లు, 2 సిక్సర్లతో 43 పరుగులు చేసి అజేయంగా నిలిచాడు. 

టాస్ గెలిచి బ్యాటింగ్ ఎంచుకున్న రాయల్ ఛాలెంజర్స్ బెంగళూరు, నిర్ణీత 20 ఓవర్లలో 6 వికెట్లు కోల్పోయి 170 పరుగులు చేయగలిగింది. రెండో ఓవర్‌లో కెప్టెన్ ఫాఫ్ డుప్లిసిస్ డకౌట్ కావడంతో 11 పరుగుల వద్ద తొలి వికెట్ కోల్పోయింది రాయల్ ఛాలెంజర్స్ బెంగళూరు. 

అయితే ఇన్నింగ్స్ నిర్మించే బాధ్యతను తీసుకున్న విరాట్, యంగ్ ప్లేయర్ రజత్ పటిదార్‌తో కలిసి 99 పరుగుల భాగస్వామ్యం నెలకొల్పాడు... అల్జెరీ జోసఫ్ వేసిన 5వ ఓవర్‌లో రెండు వరుస ఫోర్లు బాదిన విరాట్ కోహ్లీ, ఫర్గూసన్ వేసిన 10వ ఓవర్‌లో ఓ సిక్సర్, ఫోర్ బాదాడు.. 45 బంతుల్లో 4 ఫోర్లు, 2 సిక్సర్లతో హాఫ్ సెంచరీ పూర్తి చేసుకున్నాడు విరాట్ కోహ్లీ...

ఐపీఎల్‌లో 15 ఇన్నింగ్స్‌ల తర్వాత విరాట్ కోహ్లీ చేసిన మొట్టమొదటి హాఫ్ సెంచరీ ఇదే. ఇంతకుముందు 2009-10 సీజన్ల మధ్య హాఫ్ సెంచరీ చేయడానికి 18 ఇన్నింగ్స్‌ల గ్యాప్ తీసుకున్నాడు విరాట్ కోహ్లీ...

ఐపీఎల్ కెరీర్‌లో విరాట్ కోహ్లీకి ఇది 43వ హాఫ్ సెంచరీ. ఈ ఇన్నింగ్స్‌లో కొట్టిన రెండు సిక్సర్లతో టీ20ల్లో అత్యధిక సిక్సర్లు బాదిన భారత బ్యాటర్‌గా రెండో స్థానంలో నిలిచాడు విరాట్ కోహ్లీ...

రోహిత్ శర్మ టీ20 కెరీర్‌లో 429 సిక్సర్లతో టాప్‌లో నిలవగా, భారత మాజీ సారథి విరాట్ కోహ్లీ 326 సిక్సర్లు పూర్తి చేసుకున్నాడు. భారత మాజీ క్రికెటర్ సురేష్ రైనా 325 సిక్సర్లతో తర్వాతి స్థానంలో నిలిచాడు.

మరో ఎండ్‌లో వన్‌డౌన్‌లో వచ్చిన రజత్ పటిదార్ 30 బంతుల్లో 5 ఫోర్లు, 2 సిక్సర్లతో హాఫ్ సెంచరీ పూర్తి చేసుకున్నాడు. పటిదార్‌కి ఇదే మొట్టమొదటి హాఫ్ సెంచరీ... 32 బంతుల్లో 52 పరుగులు చేసిన పటిదార్, ప్రదీప్ సాంగ్వాన్ బౌలింగ్‌లో అవుట్ అయ్యాడు...

53 బంతుల్లో 6 ఫోర్లు, ఓ సిక్సర్‌తో 58 పరుగులు చేసిన విరాట్ కోహ్లీ, మహ్మద్ షమీ బౌలింగ్‌లో క్లీన్‌బౌల్డ్ అయ్యాడు. బీభత్సమైన ఫామ్‌లో ఉన్న దినేశ్ కార్తీక్ 3 బంతుల్లో 2 పరుగులు చేసి రషీద్ ఖాన్ బౌలింగ్‌లో అవుట్ అయ్యాడు. 18 బంతుల్లో 3 ఫోర్లు, 2 సిక్సర్లతో 33 పరుగులు చేసిన గ్లెన్ మ్యాక్స్‌వెల్, లూకీ ఫర్గూసన్ బౌలింగ్‌లో పెవిలియన్ చేరాడు...


ఆఖర్లో మహిపాల్ లోమ్రోర్ 6 బంతుల్లో ఓ ఫోర్, ఓ సిక్సర్‌తో 10 పరుగులు, షాబాజ్ అహ్మద్ పరుగులు చేయడంతో ఈ మాత్రం స్కోరు అయినా చేయగలిగింది ఆర్‌సీబీ.