ఐపీఎల్ 2022: ఆఖర్లో మెరుపులు మెరిపించిన ఆండ్రే రస్సెల్... 25 బంతుల్లో 4 ఫోర్లు, 4 సిక్సర్లతో 49 పరుగుల చేసిన రస్సెల్... మూడు వికెట్లు తీసిన నటరాజన్... 

ఐపీఎల్‌ 2022 సీజన్‌లో కేకేఆర్ ఫించ్ హిట్టర్ ఆండ్రే రస్సెల్ మరోసారి మెరుపులు మెరిపించాడు. 25 బంతుల్లో 4 ఫోర్లు, 4 సిక్సర్లతో 49 పరుగులు చేసి అజేయంగా నిలిచిన రస్సెల్, కోల్‌కత్తాకి మంచి స్కోరు అందించాడు. 

టాస్ ఓడి తొలుత బ్యాటింగ్ చేసిన కోల్‌కత్తా నైట్‌రైడర్స్, నిర్ణీత 20 ఓవర్లలో 8 వికెట్లు కోల్పోయి 175 పరుగులు చేసింది. సన్‌రైజర్స్ హైదరాబాద్ బౌలర్లు కట్టుదిట్టమైన లైన్ అండ్ లెంగ్త్‌తో బౌలింగ్ చేయడంతో కేకేఆర్ బ్యాటర్లు పరుగులు చేయడానికి ఇబ్బంది పడ్డారు...

అజింకా రహానే స్థానంలో కేకేఆర్ తరుపున ఆరంగ్రేటం చేసిన ఆరోన్ ఫించ్ 5 బంతుల్లో ఓ సిక్సర్‌తో 7 పరుగులు చేసి అవుట్ అయ్యాడు. వెంకటేశ్ అయ్యర్ 13 బంతుల్లో ఓ ఫోర్‌తో 6 పరుగులు చేసి నటరాజన్ బౌలింగ్‌లో క్లీన్ బౌల్డ్ అయ్యాడు. ఆ తర్వాతి బంతికి క్రీజులోకి వచ్చిన సునీల్ నరైన్ మొదటి బంతికి సిక్సర్ బాది, రెండో బంతికి అవుట్ అయ్యాడు...

6 పరుగులు చేసిన సునీల్ నరైన్, నట్టూ బౌలింగ్‌లో శశాంక్ సింగ్‌కి క్యాచ్ ఇచ్చి పెవిలియన్ చేరాడు. 31 పరుగులకే 3 వికెట్లు కోల్పోయింది కోల్‌కత్తా నైట్ రైడర్స్. ఈ దశలో శ్రేయాస్ అయ్యర్, నితీశ్ రాణా కలిసి నాలుగో వికెట్‌కి 39 పరుగుల భాగస్వామ్యం నెలకొల్పారు.

25 బంతుల్లో 3 ఫోర్లతో 28 పరుగులు చేసిన శ్రేయాస్ అయ్యర్, ఉమ్రాన్ మాలిక్‌ బౌలింగ్‌లో క్లీన్ బౌల్డ్ అయ్యాడు. 7 బంతుల్లో ఓ సిక్సర్‌తో 7 పరుగులు చేసిన షెల్డన్ జాక్సన్ కూడా ఉమ్రాన్ మాలిక్ బౌలింగ్‌లో నట్టూకి క్యాచ్ ఇచ్చి అవుట్ అయ్యాడు...

మరో ఎండ్‌లో నితీశ్ రాణా 32 బంతుల్లో హాఫ్ సెంచరీ పూర్తి చేసుకున్నాడు. నితీశ్ రాణాకి ఐపీఎల్‌లో 19 ఇన్నింగ్స్‌ల తర్వాత వచ్చిన హాఫ్ సెంచరీ కావడం విశేషం. 36 బంతుల్లో 6 ఫోర్లు, 2 సిక్సర్లతో 54 పరుగులు చేసిన నితీశ్ రాణా, నటరాజన్ బౌలింగ్‌లో నికోలస్ పూరన్‌కి క్యాచ్ ఇచ్చి అవుట్ అయ్యాడు.

అంపైర్ నాటౌట్‌గా ప్రకటించినా రివ్యూకి వెళ్లిన సన్‌రైజర్స్‌కి అనుకూలంగా ఫలితం వచ్చింది. 3 బంతుల్లో 3 పరుగులు చేసిన ప్యాట్ కమ్మిన్స్, భువీ వేసిన 19వ ఓవర్‌లో మార్కో జాన్సెన్‌కి క్యాచ్ ఇచ్చి అవుట్ అయ్యాడు. యార్కర్లతో ఆండ్రే రస్సెల్‌ని ఇబ్బంది పెట్టిన భువనేశ్వర్ కుమార్, 19వ ఓవర్‌లో 8 పరుగులు మాత్రమే ఇచ్చాడు. 

16వ ఓవర్‌లో 2 పరుగులు మాత్రమే ఇచ్చిన ఉమ్రాన్ మాలిక్, 4 ఓవర్లలో 27 పరుగులిచ్చి 2 వికెట్లు తీయగా మార్కో జాన్సెన్ ఓ వికెట్ తీశాడు. టి నటరాజన్ 4 ఓవర్లలో 37 పరుగులిచ్చి 3 వికెట్లు పడగొట్టాడు. ఐపీఎల్ 2022 సీజన్‌లో 11 వికెట్లు పూర్తి చేసుకున్న నట్టూ, పర్పుల్ క్యాప్ రేసులో చాహాల్ తర్వాతి స్థానంలో నిలిచాడు. 

Scroll to load tweet…

ఐపీఎల్‌లో ఎదుర్కొన్న మొదటి బంతికే ఫోర్ బాదిన ఆమన్ ఖాన్, సుచిత్ బౌలింగ్‌లో క్లీన్ బౌల్డ్ అయ్యాడు. ఆఖరి ఓవర్‌ ఆఖరి మూడు బంతుల్లో వరుసగా 6,6, 4 బాదిన ఆండ్రే రస్సెల్ 16 పరుగులు రాబట్టి కేకేఆర్‌కి మంచి స్కోరు అందించాడు.