IPL 2023, KKR vs RR:ఐపీఎల్-16లో లీగ్ దశ మ్యాచ్ లు దాదాపు చివరి స్టేజ్ కు చేరుకున్నాయి. ఇకనుంచి ప్రతీ జట్టు ఆడబోయే మ్యాచ్ ఎంతో కీలకం. అటువంటి కీ ఫైట్ లో నేడు రాజస్తాన్-కోల్కతా లు పోటీ పడనున్నాయి.
ఐపీఎల్-16 లో లీగ్ దశ పోటీలు ముగింపునకు చేరుకున్నాయి. దాదాపు అన్ని జట్లూ 11 మ్యాచ్లు ఆడాయి. మరో మూడు మ్యాచ్ లే వారి ఖాతాలలో మిగిలున్న నేపథ్యంలో ఇకనుంచి ప్రతీ పోరూ డూ ఆర్ డై వంటిదే. నేడు కూడా రాజస్తాన్ రాయల్స్ - కోల్కతా నైట్ రైడర్స్ మధ్య అటువంటి పోరే జరుగనుంది. ఈడెన్ గార్డెన్ వేదికగా జరుగుతన్న ఈ మ్యాచ్ లో రాజస్తాన్ రాయల్స్ టాస్ గెలిచి మొదలు బౌలింగ్ చేయనుంది. కోల్కతా నైట్ రైడర్స్ బ్యాటింగ్ కు రానుంది.
ప్లేఆఫ్స్ రేసులో పోటీ పడుతున్న ఈ రెండు జట్లలో నేడు గెలిచిన విజేత ఆ దిశగా తమ స్థానాన్ని మరింత పటిష్టం చేసుకోనుంది. ఈ సీజన్ లో రాజస్తాన్ రాయల్స్ 11 మ్యాచ్ లు ఆడి ఐదు గెలిచి ఆరింట్లో ఓడి పది పాయింట్లతో ఐదో స్థానంలో ఉంది. కేకేఆర్ కూడా ఇవే పాయింట్లతో ఆరో స్థానంలో ఉంది.
ఈ సీజన్ ప్రారంభంలో ఆడిన మొదటి ఐదు మ్యాచ్ లలో నాలుగు గెలిచి ఒక దశలో టేబుల్ టాపర్లుగా ఉన్న రాజస్తాన్ తర్వాత గాడి తప్పింది. తర్వాతి ఆరు మ్యాచ్ లలో ఆ జట్టు ఏకంగా ఐదింట్లో ఓడి ప్లేఆఫ్స్ ఆశలను మరింత సంక్లిష్టం చేసుకుంది. గత మ్యాచ్ లో హైదరాబాద్ తో కూడా ఓడిన ఆ జట్టుకు కేకేఆర్ తో గెలవడం అత్యావశ్యకం. ఈ మ్యాచ్ గెలిస్తే సంజూ శాంసన్ సేన మూడో స్థానానికి వెళ్లొచ్చు.
ఇక ఇటీవలే పంజాబ్ తో మ్యాచ్ కు ముందు వరకూ పాయింట్ల పట్టికలో 8వ స్థానంలో ఉన్న కేకేఆర్.. ఆ మ్యాచ్ లో అనూహ్యమైన విజయాన్ని అందుకుని ఏకంగా ఐదో స్థానానికి ఎగబాకింది. నేడు కూడా రాజస్తాన్ ను ఓడిస్తే ప్రస్తుతం ఐదో స్థానంలో ఉన్న ఆ జట్టు నాలుగో స్థానానికి చేరే అవకాశాలు మెండుగా ఉంటాయి. మరి నితీశ్ రాణా గ్యాంగ్ తమ సొంత గ్రౌండ్ లో ఏం చేస్తారో చూడాలి.
తుది జట్లు :
కోల్కతా నైట్ రైడర్స్ : రహ్మనుల్లా గుర్బాజ్, జేసన్ రాయ్, వెంకటేశ్ అయ్యర్, నితీశ్ రాణా (కెప్టెన్), రింకూ సింగ్, ఆండ్రీ రసెల్, సునీల్ నరైన్, శార్దూల్ ఠాకూర్, అనుకుల్ రాయ్, హర్షిత్ రాణా, వరుణ్ చక్రవర్తి
రాజస్తాన్ రాయల్స్ : యశస్వి జైస్వాల్, జోస్ బట్లర్, సంజూ శాంసన్ (కెప్టెన్), జో రూట్, షిమ్రన్ హెట్మెయర్, ధ్రువ్ జురెల్, రవిచంద్రన్ అశ్విన్, ట్రెంట్ బౌల్ట్, సందీప్ శర్మ, కెఎం అసిఫ్, యుజ్వేంద్ర చాహల్
