థ్రిల్లర్‌కే అమ్మ మొగుడు లాంటి మ్యాచ్... ఉత్కంఠపోరులో టీమిండియా ఘన విజయం...

దాయాదుల మధ్య సమరం క్రికెట్ ఫ్యాన్స్‌కి కావాల్సినంత మజాని అందించింది. ఆధిక్యం చేతులు మారుతూ ఆఖరి ఓవర్ ఆఖరి బంతి వరకూ  ఉత్కంఠభరితంగా సాగిన మ్యాచ్‌లో భారత జట్టు 4 వికెట్ల తేడాతో విజయం అందుకుంది. విరాట్ కోహ్లీ వీరోచిత పోరాటంతో గత వరల్డ్ కప్‌లో ఎదురైన ప్రతీకారానికి బదులు తీర్చుకుంది.

160 పరుగుల లక్ష్యఛదనలో 31 పరుగులకే 4 వికెట్లు కోల్పోయి పీకల్లోతు కష్టాల్లో పడింది భారత జట్టు. 8 బంతుల్లో 4 పరుగులు చేసిన కెఎల్ రాహుల్, నసీం షా బౌలింగ్‌లో అవుట్ కాగా 7 బంతుల్లో 4 పరుగులు చేసిన రోహిత్ శర్మ, హారీస్ రౌఫ్ బౌలింగ్‌లో పెవిలియన్ చేరాడు....

10 బంతుల్లో 2 ఫోర్లతో 15 పరుగులు చేసిన సూర్యకుమార్ యాదవ్ కూడా హారీస్ రౌఫ్ బౌలింగ్‌లోనే పెవిలియన్ చేరగా బ్యాటింగ్ ఆర్డర్‌లో ప్రమోషన్ పొందిన అక్షర్ పటేల్ 3 బంతుల్లో 2 పరుగులు చేసి రనౌట్ అయ్యాడు. ఈ దశలో హార్ధిక్ పాండ్యా, విరాట్ కోహ్లీ కలిసి అద్భుతంగా పోరాడారు.

ఆఖరి 5 ఓవర్లలో టీమిండియా విజయానికి 60 పరుగులు రావాల్సి రాగా 16వ ఓవర్ వేసిన హారీస్ రౌఫ్ 6 పరుగులు మాత్రమే ఇచ్చాడు. దీంతో ఆఖరి 4 ఓవర్లలో ఇండియా విజయానికి 54 పరుగులు కావాల్సి వచ్చాయి. నసీం షా వేసిన 17వ ఓవర్‌లో కేవలం 6 పరుగులు మాత్రమే వచ్చాయి...

ఆఖరి 3 ఓవర్లలో 48 పరుగులు కావాల్సి రాగా షాహీన్ ఆఫ్రిదీ వేసిన ఇన్నింగ్స్ 18వ ఓవర్‌లో 3 ఫోర్లు బాదిన విరాట్ కోహ్లీ, హాఫ్ సెంచరీ పూర్తి చేసుకున్నాడు. ఆ ఓవర్‌లో 17 పరుగులు రావడంతో ఆఖరి 2 ఓవర్లలో ఇండియా విజయానికి 31 పరుగులు కావాల్సి వచ్చాయి...

హారీస్ రౌఫ్ వేసిన ఇన్నింగ్స్ 19వ ఓవర్‌లో మొదటి  4 బంతుల్లో 3 పరుగులు మాత్రమే వచ్చాయి. అయితే ఐదో బంతికి సిక్సర్ బాదిన విరాట్ కోహ్లీ, ఆఖరి బంతిని కూడా పెవిలియన్ బయట పడేశాడు. దీంతో ఇండియా విజయానికి ఆఖరి ఓవర్‌లో 16 పరుగులు కావాల్సి వచ్చాయి...

37 బంతుల్లో ఓ ఫోర్, 2 సిక్సర్లతో 40 పరుగులు చేసిన హార్ధిక్ పాండ్యా, ఆఖరి ఓవర్ తొలి బంతికి హార్ధిక్ పాండ్యా భారీ షాట్‌కి ప్రయత్నించి అవుట్ అయ్యాడు. రెండో బంతికి కార్తీక్ సింగిల్ తీయగా ఆ తర్వాతి బంతికి 2 పరుగులు వచ్చాయి. నాలుగో బంతికి విరాట్ కోహ్లీ సిక్సర్ బాదాడు. అది నో బాల్ కావడంతో ఆఖరి 3 బంతుల్లో 6 పరుగులు కావాల్సి వచ్చాయి... మహ్మద్ నవాజ్ వైడ్ వేయడంతో 3 బంతుల్లో 5 పరుగులు కావాల్సి వచ్చాయి... 

నాలుగో బంతి వికెట్‌కి తగిలిన వెంటనే విరాట్ కోహ్లీ, దినేశ్ కార్తీక్ 3 పరుగులు తీశారు. దీంతో ఆఖరి 2 బంతుల్లో 2 పరుగులు కావాల్సి వచ్చాయి. ఆఖరి ఓవర్ ఐదో బంతికి దినేశ్ కార్తీక్ స్టంపౌట్ రూపంలో పెవిలియన్ చేరాడు. ఆఖరి బంతికి భారత జట్టు విజయానికి 2 పరుగులు కావాల్సి వచ్చాయి...

మహ్మద్ నవాజ్ మరో వైడ్ వేయడంతో ఇరు జట్ల స్కోర్లు సమం అయ్యాయి. ఆఖరి బంతికి అశ్విన్ ఫోర్ బాది టీమిండియాకి విజయాన్ని అందించాడు.. 53 బంతుల్లో 6 ఫోర్లు, 4 సిక్సర్లతో 82 పరుగులు చేసిన విరాట్ కోహ్లీ నాటౌట్‌గా నిలవగా రవిచంద్రన్ అశ్విన్ ఆఖరి బంతికి ఫోర్ బాది మ్యాచ్‌ని ముగించాడు. 

అంతకుముందు టాస్ ఓడి తొలుత బ్యాటింగ్ చేసిన పాకిస్తాన్‌, నిర్ణీత 20 ఓవర్లలో 8 వికెట్లు కోల్పోయి 159 పరుగులు చేసింది. బాబర్ ఆజమ్ గోల్డెన్ డకౌట్ కాగా, మహ్మద్ రిజ్వాన్ 4 పరుగులు చేసి పెవిలియన్ చేరాడు. 15 పరుగులకే ఓపెనర్లు ఇద్దరినీ కోల్పోయింది పాకిస్తాన్. 10 ఓవర్లు ముగిసే సమయానికి 2 వికెట్ల నష్టానికి 60 పరుగులు మాత్రమే చేయగలిగింది పాకిస్తాన్.  

మూడో వికెట్‌కి 76 పరుగుల భాగస్వామ్యం నెలకొల్పిన ఇఫ్తికర్ అహ్మద్, 34 బంతుల్లో 2 ఫోర్లు, 4 సిక్సర్లతో 51 పరుగులు చేసి మహ్మద్ షమీ బౌలింగ్‌లో ఎల్బీడబ్ల్యూగా అవుట్ అయ్యాడు. ఆ తర్వాతి ఓవర్‌లో 6 బంతుల్లో ఓ ఫోర్‌తో 5 పరుగులు చేసిన షాదబ్ ఖాన్, సూర్యకుమార్ యాదవ్‌కి క్యాచ్ ఇచ్చి పెవిలియన్ చేరాడు...

అదే ఓవర్ 4 బంతుల్లో 2 పరుగులు చేసిన హైదర్ ఆలీ కూడా హార్ధిక్ పాండ్యా ఓవర్‌లో ఆఖరి బంతికి సూర్యకుమార్ యాదవ్‌కే క్యాచ్ ఇచ్చి అవుట్ అయ్యాడు. 91/2 వద్ద ఉన్న పాకిస్తాన్ స్కోరు, 10 బంతుల వ్యవధిలో 98/5కి చేరుకుంది...

హార్ధిక్ పాండ్యా బౌలింగ్‌లో రెండు ఫోర్లు బాదిన మహ్మద్ నవాజ్, 9 పరుగులు చేసి హార్ధిక్ పాండ్యా బౌలింగ్‌లో దినేశ్ కార్తీక్‌కి క్యాచ్ ఇచ్చి పెవిలియన్ చేరాడు. 4 ఓవర్లలో 30 పరుగులిచ్చిన హార్ధిక్ పాండ్యా 3 వికెట్లు తీశాడు... 3 బంతుల్లో 2 పరుగులు చేసిన అసిఫ్ ఆలీ, అర్ష్‌దీప్ సింగ్ బౌలింగ్‌లో దినేశ్ కార్తీక్‌కి క్యాచ్ ఇచ్చి అవుట్ అయ్యాడు. షాన్ మసూద్ 52 పరుగులు చేసి నాటౌట్‌గా నిలిచాడు.

మరిన్ని ఇంట్రెస్టింగ్ అప్ డేట్స్ కోసం క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి

• India vs Pakistan
• Virat Kohli
• T20 World cup 2022