ICC World cup 2023: రోహిత్ శర్మ సెంచరీ మిస్! ఐదో వికెట్ కోల్పోయిన టీమిండియా...

ఇంగ్లాండ్‌తో జరుగుతున్న వన్డే వరల్డ్ కప్ మ్యాచ్‌లో టీమిండియా, 164 పరుగులకే 5 వికెట్లు కోల్పోయింది. 101 బంతుల్లో 10 ఫోర్లు, 3 సిక్సర్లతో 87 పరుగులు చేసిన రోహిత్ శర్మ, అదిల్ రషీద్ బౌలింగ్‌లో భారీ షాట్‌కి ప్రయత్నించి లివింగ్‌స్టోన్‌కి క్యాచ్ ఇచ్చి అవుట్ అయ్యాడు..

టాస్ ఓడి బ్యాటింగ్ మొదలెట్టిన టీమిండియా 40 పరుగులకే 3 వికెట్లు కోల్పోయి పీకల్లోతు కష్టాల్లో పడింది. 
13 బంతుల్లో ఓ ఫోర్‌తో 9 పరుగులు చేసిన శుబ్‌మన్ గిల్, క్రిస్ వోక్స్ బౌలింగ్‌లో క్లీన్ బౌల్డ్ అయ్యాడు. 26 పరుగుల వద్ద తొలి వికెట్ కోల్పోయింది టీమిండియా.  

మొదటి 9 బంతుల్లో పరుగులేమీ చేయలేకపోయిన విరాట్ కోహ్లీ.. డేవిడ్ విల్లే బౌలింగ్‌లో షాట్‌కి ప్రయత్నించి బెన్ స్టోక్స్‌కి క్యాచ్ ఇచ్చి అవుట్ అయ్యాడు. 27 పరుగుల వద్ద రెండో వికెట్ కోల్పోయింది టీమిండియా. వన్డే వరల్డ్ కప్‌ మ్యాచ్‌లో విరాట్ కోహ్లీ డకౌట్ కావడం ఇదే తొలిసారి..

విరాట్ కోహ్లీ కెరీర్‌లో ఇది 34వ డకౌట్. అత్యధిక సార్లు డకౌట్ అయిన టాపార్డర్ బ్యాటర్‌గా సచిన్ టెండూల్కర్ రికార్డును సమం చేశాడు విరాట్ కోహ్లీ. 16 బంతుల్లో 4 పరుగులు చేసిన శ్రేయా్ అయ్యర్, క్రిస్ వోక్స్ బౌలింగ్‌లో మార్క్‌ వుడ్‌కి క్యాచ్ ఇచ్చి అవుట్ అయ్యాడు.

40 పరుగులకే 3 వికెట్లు కోల్పోయింది టీమిండియా. ఈ దశలో కెఎల్ రాహుల్, రోహిత్ శర్మ కలిసి నాలుగో వికెట్‌కి 91 పరుగుల అమూల్యమైన భాగస్వామ్యం నెలకొల్పారు. 58 బంతుల్లో 3 ఫోర్లతో 39 పరుగులు చేసిన కెఎల్ రాహుల్, డేవిడ్ విల్లే బౌలింగ్‌లో జానీ బెయిర్‌స్టోకి క్యాచ్ ఇచ్చి అవుట్ అయ్యాడు..

సూర్యకుమార్ యాదవ్, రోహిత్ శర్మ కలిసి ఐదో వికెట్‌కి 33 పరుగులు జోడించారు. అంతర్జాతీయ క్రికెట్‌లో 18 వేల పరుగులు పూర్తి చేసుకున్న రోహిత్ శర్మ, ఈ ఫీట్ సాధించిన ఐదో భారత క్రికెటర్‌గా నిలిచాడు. సచిన్ టెండూల్కర్, విరాట్ కోహ్లీ, రాహుల్ ద్రావిడ్, సౌరవ్ గంగూలీ మాత్రమే రోహిత్ శర్మ కంటే ముందున్నారు..

2023లో వన్డేల్లో 1000 పరుగులు కూడా పూర్తి చేసుకున్న రోహిత్ శర్మ, 13 పరుగుల తేడాలో సెంచరీని మిస్ చేసుకున్నాడు. 38 ఓవర్లు ముగిసే సమయానికి 5 వికెట్ల నష్టానికి 171 పరుగులు చేసింది టీమిండియా.. 

మరిన్ని ఇంట్రెస్టింగ్ అప్ డేట్స్ కోసం క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి

• ICC World cup 2023
• India vs England