ICC World cup 2023: ఇబ్రహీం జాద్రాన్ రికార్డు సెంచరీ... ఆస్ట్రేలియా ముందు భారీ టార్గెట్ పెట్టిన ఆఫ్ఘాన్..
వన్డే వరల్డ్ కప్‌లో సెంచరీ చేసిన మొట్టమొదటి ఆఫ్ఘాన్ క్రికెటర్‌గా రికార్డు క్రియేట్ చేసిన ఇబ్రహీం జాద్రాన్...
ఐసీసీ మెన్స్ వన్డే వరల్డ్ కప్ 2023 టోర్నీని ఎలాంటి అంచనాలు లేకుండా ఆరంభించింది ఆఫ్ఘనిస్తాన్. 2019 ప్రపంచ కప్‌లో లీగ్ స్టేజీలో 9కి 9 మ్యాచులు ఓడిపోయిన ఆఫ్ఘనిస్తాన్, 2023 వన్డే వరల్డ్ కప్‌లో మొదటి 7 మ్యాచుల్లో 4 విజయాలు అందుకుంది. తాజాగా ముంబైలో ఆస్ట్రేలియాతో జరుగుతున్న మ్యాచ్‌లో రికార్డు స్కోరుతో దుమ్మురేపింది ఆఫ్ఘాన్..
టాస్ గెలిచి బ్యాటింగ్ ఎంచుకున్న ఆస్ట్రేలియా, నిర్ణీత 50 ఓవర్లలో 5 వికెట్లు కోల్పోయి 291 పరుగుల భారీ స్కోరు చేసింది. 25 బంతుల్లో 2 ఫోర్లతో 21 పరుగులు చేసిన రెహ్మనుల్లా గుర్భాజ్, హజల్‌వుడ్ బౌలింగ్‌లో అవుట్ అయ్యాడు..
44 బంతుల్లో ఓ ఫోర్‌తో 30 పరుగులు చేసిన రెహ్మత్ షా, మ్యాక్స్వెల్ బౌలింగ్‌లో అవుట్ అయ్యాడు. కెప్టెన్ హస్మతుల్లా షాహిదీ 43 బంతుల్లో 2 ఫోర్లతో 26 పరుగులు చేసి మిచెల్ స్టార్క్ బౌలింగ్‌లో క్లీన్ బౌల్డ్ అయ్యాడు..
అజ్మతుల్లా ఓమర్‌జాయ్ 18 బంతుల్లో ఓ ఫోర్, 2 సిక్సర్లతో 22 పరుగులు చేయగా మహ్మద్ నబీ 10 బంతుల్లో ఓ సిక్సర్‌తో 12 పరుగులు చేశాడు. ఓపెనర్‌గా వచ్చిన ఇబ్రహీం జాద్రాన్ 143 బంతుల్లో 8 ఫోర్లు, 3 సిక్సర్లతో 129 పరుగులు చేశాడు. వన్డే వరల్డ్ కప్‌లో సెంచరీ చేసిన మొట్టమొదటి ఆఫ్ఘాన్ క్రికెటర్‌గా రికార్డు క్రియేట్ చేశాడు ఇబ్రహీం జాద్రాన్..
ఆస్ట్రేలియాపై వరల్డ్ కప్ మ్యాచ్‌లో మూడో అత్యధిక స్కోరు నమోదు చేసిన బ్యాటర్‌గా నిలిచాడు ఇబ్రహీం జాద్రాన్. ఇంతకుముందు నెదర్లాండ్స్ బ్యాటర్ నీల్ జాన్సన్ 132, న్యూజిలాండ్ బ్యాటర్ క్రిస్ హారీస్ 130 పరుగులు చేశారు. రషీద్ ఖాన్ 18 బంతుల్లో 2 ఫోర్లు, 3 సిక్సర్లతో 35 పరుగులు చేసి నాటౌట్‌గా నిలిచాడు. క్రీజులోకి వచ్చిన ఆఫ్ఘాన్ బ్యాటర్లు అందరూ డబుల్ డిజిట్ స్కోర్లు నమోదు చేశారు. జోష్ హజల్‌వుడ్ 2 వికెట్లు తీయగా మిచెల్ స్టార్క్, గ్లెన్ మ్యాక్స్వెల్, ఆడమ్ జంపా తలా ఓ వికెట్ తీశారు..
