ICC World cup 2023: డేవిడ్ వార్నర్- మిచెల్ మార్ష్ సెంచరీలు... పాక్ బౌలర్లకు చుక్కలు చూపిస్తున్న ఆసీస్...
Pakistan vs Australia: సెంచరీలు చేసుకున్న డేవిడ్ వార్నర్, మిచెల్ మార్ష్.. క్యాచ్ డ్రాప్‌లు, మిస్ ఫీల్డింగ్స్‌తో భారీ మూల్యం చెల్లించుకున్న పాకిస్తాన్..
ఐసీసీ వన్డే వరల్డ్ కప్ 2023 టోర్నీని రెండు వరుస పరాజయాలతో మొదలెట్టింది ఆస్ట్రేలియా. శ్రీలంకపై గెలిచి బోణీ కొట్టిన ఆస్ట్రేలియా, బెంగళూరులో పాకిస్తాన్‌తో జరుగుతున్న మ్యాచ్‌లో భారీ స్కోరు దిశగా పరుగులు పెడుతోంది. టాస్ గెలిచిన పాకిస్తాన్, బౌలింగ్ ఎంచుకుంది. ఇన్నింగ్స్ మొదటి బంతికే డేవిడ్ వార్నర్ అవుట్ కోసం రివ్యూ కోరుకుంది పాకిస్తాన్..
అయితే రిప్లైలో బంతి, బ్యాటుకి తగులుతున్నట్టు స్పష్టంగా కనిపించడంతో రివ్యూ కోల్పోయింది. డేవిడ్ వార్నర్ 10 పరుగుల వద్ద ఉన్నప్పుడు షాహీన్ ఆఫ్రిదీ బౌలింగ్‌లో ఇచ్చిన క్యాచ్‌ని ఉసామా మిర్ జారవిడిచాడు. అప్పటి నుంచి పాకిస్తాన్‌కి అవకాశం ఇవ్వకుండా బౌండరీల మోత మోగించారు ఆస్ట్రేలియా ఓపెనర్లు..
ఇన్నింగ్స్ ఏడో ఓవర్‌లో షాహీన్ ఆఫ్రిదీ బౌలింగ్‌లో మిచెల్ మార్ష్ మెయిడిన్ ఇచ్చాడు. 7 ఓవర్లు ముగిసే సమయానికి 37 పరుగులే చేసిన ఆస్ట్రేలియా, ఆ తర్వాత స్పీడ్ పెంచింది. హారీస్ రౌఫ్ వేసిన మొదటి ఓవర్‌లో 4, 6, 1, 4, 4, 4 బాదిన ఆస్ట్రేలియా ఓపెనర్లు 24 పరుగులు రాబట్టారు.. ఆ తర్వాత ఇఫ్తికర్ అహ్మద్ బౌలింగ్‌లోనూ 6, 1, 4, 4 రావడంతో 15 పరుగులు వచ్చేశాయి..
10 ఓవర్లు ముగిసే సమయయానికి వికెట్ నష్టపోకుండా 82 పరుగులు చేసింది ఆస్ట్రేలియా. 20 ఓవర్లు ముగిసే సమయానికి 149 పరుగులు చేసిన ఆసీస్, ఆ తర్వాత మరింత వేగం పెంచింది. డేవిడ్ వార్నర్ 85 బంతుల్లో సెంచరీ పూర్తి చేసుకున్నాడు..
వన్డేల్లో డేవిడ్ వార్నర్‌కి ఇది 21వ సెంచరీ కాగా, పాకిస్తాన్‌పై వరుసగా నాలుగో వన్డే సెంచరీ. వన్డే వరల్డ్ కప్స్‌లో ఐదో సెంచరీ. వార్నర్ సెంచరీ చేసిన తర్వాతి బంతికే ఫోర్ బాది సెంచరీ అందుకుననాడు మిచెల్ మార్ష్. మిచెల్ మార్ష్‌కి ఇది రెండో వన్డే సెంచరీ కాగా నేడు అతని పుట్టిన రోజు కూడా కావడం విశేషం. పుట్టిన రోజున సెంచరీ చేసిన ఆరో బ్యాటర్‌గా నిలిచాడు మిచెల్ మార్ష్..
రికీ పాంటింగ్ (1743 పరుగులు ) తర్వాత వరల్డ్ కప్‌లో అత్యధిక పరుగులు చేసిన ఆస్ట్రేలియా బ్యాటర్‌గా నిలిచాడు డేవిడ్ వార్నర్. సెంచరీ తర్వాత ఉసామా మిర్ బౌలింగ్‌లో డేవిడ్ వార్నర్ ఇచ్చిన క్యాచ్‌ని అబ్దుల్లా షెఫీక్ అందుకోలేకపోయాడు. ఆ ఓవర్‌లో 4, 6, 4,4 బాదిన డేవిడ్ వార్నర్ 19 పరుగులు రాబట్టాడు..
తొలి వికెట్‌కి 259 పరుగుల భారీ భాగస్వామ్యం జోడించిన తర్వాత తొలి వికెట్ కోల్పోయింది ఆస్ట్రేలియా. 108 బంతుల్లో 10 ఫోర్లు, 9 సిక్సర్లతో 121 పరుగులు చేసిన మిచెల్ మార్ష్, షాహీన్ ఆఫ్రిదీ బౌలింగ్‌లో ఉసామా మిర్‌కి క్యాచ్ ఇచ్చి అవుట్ అయ్యాడు.
