వన్డే వరల్డ్ కప్ 2019: రికార్డులు బద్దలు... క్రికెటర్లే కాదు ఈసారి అభిమానులు కూడా

ఇంగ్లాండ్ వేదికన జరిగిన వన్డే ప్రపంచ కప్ మరో సూపర్ రికార్డును నమోదు చేసింది. ఈ టోర్నీలో పాల్గొన్న వివిధ దేశాలకు చెందిన ఆటగాళ్ళు అనేక రికార్డులను తమ ఖాతాలో  వేసుకున్నారు. అయితే అభిమానులు కూడా ఆటగాళ్ల బాటలోనే నడిచి ఓ అద్భుత ఘనత సాధించారు. ఇప్పటివరకు జరిగిన వన్డే ప్రపంచ కప్స్ అన్నింటిలోకెల్లా ఈసారి జరిగిన మెగా టోర్నీ అత్యంత ప్రజాదరణను పొంది గత రికార్డులను బద్దలుగొట్టింది. 

ఈ వరల్డ్ కప్ మ్యాచులను ప్రపంచ వ్యాప్తంగా దాదాపు 160 కోట్ల మంది వీక్షించినట్లు ఐసిసి ప్రకటించింది. ప్రత్యక్షంగా మైదానానికి ప్రత్యక్షంగా వచ్చినవారు,  టీవీలు, కంప్యూటర్లు, మొబైల్స్ ఇలా వివిధ మాద్యమాల ద్వారా ఈ టోర్నీ వీక్షించినవారి సంఖ్య  మొత్తాన్ని కలిపి లెక్కించినట్లు తెలిపింది. ఇలా ఇప్పటివరకు అత్యధికమంది వీక్షించిన టోర్నీగా ప్రపంచ కప్ 2019 నిలిచింది. 

ఇక ఈ  టోర్నీలో భారత్-పాక్ మ్యాచ్ ను అత్యధికమంది ప్రత్యక్షంగా వీక్షించినట్లు ఐసిసి తెలిపింది. ఈ మ్యాచ్ ను కేవలం టీవీల్లోనే 27 కోట్ల మంది చూడగా వివిధ యాప్ ల ద్వారా మరో 5 కోట్ల మంది చూశారట. మొత్తంగా 32 కోట్లమంది వీక్షకులతో ఈ మ్యాచ్ టాప్ లో నిలిచింది. 

ఈ  మెగా టోర్నీ 200 దేశాల్లో ప్రత్యక్షంగా ప్రసారమైనట్లు...  ఇందుకోసం 25  ప్రసార మాధ్యమాల సహకారం పొందామని ఐసిసి తెలిపింది. ఇలా ముందుగానే విస్తృత ప్రచారం కల్పించడం, అభిమానుల ఆసక్తి వెరసి ఈ వన్డే ప్రపంచ కప్ ఆల్ టైమ్ రికార్డును సాధించింది.