వైఎస్ వివేకానందరెడ్డి హత్య కేసులో ఆరోపణలు ఎదుర్కొంటున్న అవినాష్ రెడ్డిని సీబీఐ అరెస్ట్ చేసి.. వెంటనే విడుదల చేసింది. హైకోర్టు ఆదేశాల మేరకే ఇలా జరిగిందని తెలుస్తోంది.
హైదరాబాద్ : మాజీ మంత్రి వైఎస్ వివేకానంద రెడ్డి హత్య కేసులో నిందితుడుగా ఉన్న కడప ఎంపీ వైఎస్ అవినాష్ రెడ్డిని అరెస్టు చేసి.. కాసేపటికే విడుదల చేసినట్లుగా ఆలస్యంగా వెలుగు చూసింది. ఇటీవల సిబిఐ అవినాష్ రెడ్డిని అరెస్టు చేసింది. రూ. 5 లక్షల చొప్పున రెండు పూచీకత్తులను తీసుకుని వెంటనే విడుదల చేసినట్లుగా తెలుస్తోంది.
గత శనివారం జూన్ మూడవ తేదీన సిబిఐ కార్యాలయంలో అవినాష్ రెడ్డి విచారణకు హాజరయ్యారు. మే 31వ తేదీన హైకోర్టు అవినాష్ రెడ్డికి ముందస్తు బెయిలు మంజూరు చేసింది. ఈ సమయంలో సిబిఐ విచారణకు హాజరుకావాలని ఆదేశించింది. ఈ క్రమంలోనే జూన్ మూడవ తేదీన అవినాష్ రెడ్డి సిబిఐ విచారణకు హాజరవ్వడానికి సిబిఐ కార్యాలయానికి వచ్చాడు. ఈ సమయంలో అవినాష్ రెడ్డిని అరెస్టు చేసి.. ఆ తర్వాత విడుదల చేసినట్లుగా సమాచారం.
అఖిల ప్రియ భర్త భార్గవ్ రామ్ కు బెయిలు మంజూరు..
వైఎస్ఆర్ సీపీ నేత అవినాష్ రెడ్డికి వివేక హత్య కేసు దర్యాప్తులో సిబిఐ నోటీసులు జారీ చేసినప్పటి నుంచి అనేక నాటకీయ పరిణామాలు చోటు చేసుకుంటున్న సంగతి తెలిసిందే. అవినాష్ రెడ్డి మొదట విచారణకు హాజరయ్యారు. ఇదే కేసులో అవినాష్ రెడ్డి తండ్రి వైయస్ భాస్కర్ రెడ్డిని అరెస్టు చేశారు. ఆ తర్వాత.. తనను కూడా అరెస్ట్ చేస్తారన్న అనుమానంతో విచారణకు హాజరు కావడానికి ఏదో ఒక వంకతో వెనక్కు తగ్గుతున్నారు.
మే 16వ తేదీ నుంచి విచారణకు హాజరు కావడం లేదు. తల్లి ఆరోగ్యం బాగాలేదని. కర్నూలు ఆసుపత్రిలో చికిత్స తీసుకుంటుందని చెప్పారు. ఆ సమయంలో సిబిఐ బృందం కర్నూలు వెళ్లి అవినాష్ రెడ్డిని అరెస్టు చేయడానికి ప్రయత్నించింది కూడా. అవినాష్ రెడ్డి అనుచరులు ఆస్పత్రి ముందు పెద్ద ఎత్తున మొహరించడంతో.. ఉద్రిక్త వాతావరణం ఏర్పడింది.
దీంతో సిబిఎస్ స్థానిక ఎస్పీ సహాయం కోరగా.. శాంతిభద్రతల కారణం చెబుతూ పోలీసులు సిబిఐకి సహాయం చేయడానికి నిరాకరించడంతో వారు వెను తిరిగారు.ఇదే సమయంలో హైకోర్టుకు వేసవి సెలవులు రావడంతో అవినాష్ రెడ్డి సుప్రీంకోర్టును ఆశ్రయించారు. ముందస్తు బెయిల్ పిటిషన్ పై విచారణ జరిగేలా హైకోర్టును ఆదేశించాలని కోరారు.
సుప్రీంకోర్టు ఆదేశాల మేరకు వేసవి సెలవుల్లో తెలంగాణ హైకోర్టు అవినాష్ రెడ్డి ముందస్తు బెయిల్ పిటిషన్ పై సుదీర్ఘ వాదనలు విన్నది. ఆ తర్వాత మే 31వ తేదీన షరతులతో కూడిన బెయిలు మంజూరు చేస్తూ తీర్పు విలువరించింది. ఒకవేళ అవినాష్ రెడ్డిని అరెస్టు చేస్తే…వెంటనే పూచీకత్తులు తీసుకొని విడుదల చేయాలని కూడా హైకోర్టు స్పష్టం చేసింది. ఈ నేపథ్యంలోనే అవినాష్ రెడ్డి సిబిఐ కార్యాలయానికి విచారణ నిమిత్తం హాజరైనప్పుడు అరెస్టు చేసినట్లుగా తెలుస్తోంది.
సాంకేతికంగా అరెస్టు చేసి.. రెండు పూచీకత్తులు తీసుకుని విడుదల చేసింది. అయితే ఈ విషయాన్ని అవినాష్ రెడ్డి గాని, సిబిఐ గాని వెల్లడించలేదు. అరెస్టు విషయం.. విడుదల విషయం గోప్యంగా ఉంచారు. అంతకుముందు వివేకానంద రెడ్డి హత్య కేసులో అప్రూవర్ గా మారిన దస్తగిరి విషయంలో కూడా సిబిఐ ఇలాగే వ్యవహరించింది. 2021 అక్టోబర్ 22న దస్తగిరికి న్యాయస్థానం షరతులతో కూడిన ముందస్తు బెయిల్ మంజూరు చేసింది.
ఆ తర్వాత అక్టోబర్ 23వ తేదీన సిబిఐ అధికారులు దస్తగిరిని అరెస్టు చేశారు. రూ.20 వేల పూచీకత్తు తీసుకుని వెంటనే విడుదల చేశారు. ఇలాగే అవినాష్ రెడ్డి విషయంలోను జరిగింది.
