శాసనమండలిలో ముగిసిన చర్చ: సెలెక్ట్ కమిటీకి టీడీపీ పట్టు, వద్దన్న వైసీపీ

ఏపీ శాసనమండలిలో  పాలనా వికేంద్రీకరణ, సీఆర్‌డీఏ బిల్లులపై చర్చ పూర్తైన తర్వాత సెలెక్ట్ కమిటీకి పంపాలని  టీడీపీ డిమాండ్ చేసింది. 

apm legislative council

అమరావతి: పాలనా వికేంద్రీకరణ బిల్లు, సీఆర్‌డీఏ రద్దు బిల్లులపై బుధవారం నాడు సాయంత్రం చర్చ ముగిసింది. అయితే ఈ రెండు బిల్లులను సెలెక్ట్ కమిటీకి పంపాలని టీడీపీ సభ్యులు డిమాండ్ చేశారు. సెలెక్ట్ కమిటీకి పంపాల్సిన అవసరం లేదని మంత్రి బుగ్గన రాజేంద్రనాథ్ రెడ్డి స్పష్టం చేశారు.

బుధవారం నాడు ఉదయం నుండి పాలనా వికేంద్రీకరణ బిల్లు, సీఆర్‌డీఏ రద్దు బిల్లులపై చర్చ ప్రారంభమైంది. పడీఎఫ్ ఎమ్మెల్సీ లక్ష్మణరావు ప్రారంభించారు. ఆ తర్వాత పలు పార్టీల సభ్యులు చర్చలో పాల్గొని తమ అభిప్రాయాలను తెలిపారు. బుధవారం నాడు సాయంత్రానికి ఈ విషయమై చర్చలు పూర్తయ్యాయి.

చర్చ ముగిసిన తర్వాత ఈ బిల్లులను సెలెక్ట్ కమిటీకి పంపాలని టీడీపీ సభ్యుడు యనమల రామకృష్ణుడు కోరారు. అయితే సెలెక్ట్ కమిటీకి పంపాల్సిన అవసరం లేదని మంత్రి బుగ్గన రాజేంద్రనాథ్ రెడ్డి అభిప్రాయపడ్డారు.

ఈ విషయమై టీడీపీ, వైసీపీ సభ్యుల మధ్య వాగ్వాదం చోటు చేసుకొంది. సెలెక్ట్ కమిటీకి పంపాలని టీడీపీ సభ్యులు పట్టుబట్టారు. ఈ రెండు బిల్లులను సెలెక్ట్ కమిటీకి పంపాలా వద్దా అనే విషయమై ఓటింగ్ నిర్వహించాలని టీడీపీ ఎమ్మెల్సీ యనమల రామకృష్ణుడు కోరారు.

ఈ రెండు బిల్లులపై సవరణలు కోరుతూ తనకు టీడీపీ సభ్యులు నోటీసులు ఇచ్చారని శాసనమండలి ఛైర్మెన్ ఎంఏ షరీఫ్ సభలో ప్రకటించారు. దీంతో శాసనమండలి ఛైర్మెన్ షరీప్ తీరుపై అధికార పార్టీ తీవ్ర ఆగ్రహం వ్యక్తం చేసింది.