వైఎస్ వివేకా హత్య కేసులో పెద్ద చేపలు తాడేపల్లి ప్యాలెస్‌లో ఉన్నాయి.. బీటెక్ రవి

btech ravi

మాజీ మంత్రి వైఎస్ వివేకానందరెడ్డి హత్య కేసులో వైసీపీ ఎంపీ వైఎస్ అవినాష్ రెడ్డి తండ్రి వైఎస్ భాస్కర్ రెడ్డిని సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) ఆదివారం ఉదయం అరెస్ట్ చేసింది. ఈ పరిణామాలపై తెలుగుదేశం పార్టీ నేత బీటెక్ రవి స్పందించారు. వైఎస్ వివేకా హత్య కేసులో వైఎస్ భాస్కర్ రెడ్డి, వైఎస్ అవినాష్ రెడ్డిలు చిన్న చేపలు మాత్రమేనని.. పెద్ద చేపలు తాడేపల్లి ప్యాలెస్‌లో ఉన్నాయని ఆరోపించారు. వైఎస్ భాస్కర్ రెడ్డి అరెస్ట్‌తో కొంతవరకు న్యాయం జరిగిందని భావిస్తున్నామని అన్నారు. 

వైఎస్ వివేకానందరెడ్డి కుమార్తె సునీత పోరాటానికి ఈరోజు కొంత న్యాయం జరిగినట్టుగా అనిపించిందని బీటెక్ రవి పేర్కొన్నారు. వైఎస్ భాస్కర్ రెడ్డి అరెస్ట్‌పై టీడీపీ శ్రేణులు ఎవరు సోష్ మీడియాలో రెచ్చగొట్టే ప్రకటనలు చేయొద్దని కోరారు. పులివెందులలో తెలుగుదేశం పార్టీ జెండా ఎగిరే రోజులు చాలా దగ్గరలోనే ఉన్నాయని బీటెక్ రవి ధీమా వ్యక్తం చేశారు. 

ఇదిలా ఉంటే.. వివేకా హత్య కేసులో సీబీఐ దూకుడు పెంచింది. కడప ఎంపీ వైఎస్ అవినాష్ రెడ్డి సన్నిహితుడు గజ్జల ఉదయ్ కుమార్ రెడ్డిని సీబీఐ అధికారులు శుక్రవారం అరెస్ట్ చేసిన సంగతి తెలిసింది. ఇది జరిగిన 48 గంట్లలోనే అవినాష్ రెడ్డి తండ్రి భాస్కర్ రెడ్డిని సీబీఐ అధికారులు అరెస్ట్ జరిగింది. ఆదివారం తెల్లవారుజామున పులివెందులలోని వైఎస్‌ భాస్కర్ రెడ్డి నివాసానికి రెండు వాహనాల్లో చేరుకున్న సీబీఐ అధికారులు భాస్కర్‌రెడ్డిని అదుపులోకి తీసుకుని ఆయన కుటుంబ సభ్యులకు అరెస్ట్‌ మెమో అందజేశారు. భాస్కర్ రెడ్డిని ఐపీసీ 302, 120 (బి), 201 సెక్షన్ల కింద అరెస్టు చేశారు.

అనంతరం భాస్కర్ రెడ్డిని కట్టుదిట్టమైన భద్రత మధ్య సీబీఐ కోర్టులో హాజరుపరిచేందుకు హైదరాబాద్‌కు తరలించేందుకు సీబీఐ అధికారులు ఏర్పాట్లు చేశారు. సాయంత్రంలోపు భాస్కర్ రెడ్డిని సీబీఐ కోర్టులో హాజరుపరిచే అవకాశం ఉంది. ఇక, భాస్కర్‌రెడ్డి అరెస్ట్‌ వార్త తెలుసుకున్న వైఎస్‌ఆర్‌సీపీ కార్యకర్తలు, అనుచరులు పెద్ద ఎత్తున ఆయన నివాసం వద్దకు చేరుకున్నారు. 

వైఎస్‌ భాస్కర్‌రెడ్డి అరెస్టు నేపథ్యంలో వైఎస్సార్ జిల్లా వ్యాప్తంగా వైసీపీ నిరసన కార్యక్రమం చేపట్టింది. భాస్కర్‌రెడ్డిని అరెస్టు చేసిన వెంటనే పులివెందులలో దుకాణాలను మూసివేశారు.