గ్రీన్ ఇండియా ఛాలెంజ్ లో పాల్గొని ... మట్టి చేతులతో అందాల భామ నేహా ఫోజులు

హైదరాబాద్ : తెలంగాణ ప్రభుత్వం హరితహారం, టీఆర్ఎస్ ఎంపీ జోగినపల్లి సంతోష్ కుమార్ గ్రీన్ ఇండియా ఛాలెంజ్ కార్యక్రమాల ద్వారా పర్యావరణ పరిరక్షణకు యత్నిస్తున్నారు.  రాజకీయ, సినీ, వ్యాపార ప్రముఖులతో మొక్కలు నాటేలా... వాళ్లు మరికొందరికి మొక్కలు నాటాలంటూ ఛాలెంజ్ విసురుతూ గ్రీన్ ఇండియా ఛాలెంజ్ సక్సెస్ ఫుల్ గా సాగుతోంది. తాజాగా ఈ ఛాలెంజ్ లో  సినీనటి నేహా దేశ్ పాండే పాల్గొన్నారు. హైదరాబాద్ లో మొక్కలు నాటిన నేహా సహచర నటులు సోహెల్, సన్నీ, మోడల్ సాధన లకు మొక్కలు నాటాలంటూ ఛాలెంజ్ విసిరారు. 

ఈ సందర్భంగా నేహా మాట్లాడుతూ... గ్రీన్ ఇండియా ఛాలెంజ్ లో పాల్గొని మొక్కలు నాటడం చాలా ఆనందాన్ని ఇచ్చిందన్నారు. ప్రతిఒక్కరూ మొక్కలు నాటడమే కాదు వాటిని సంరక్షించాలని కోరారు. మనకెంతో ఇస్తున్న ఈ ప్రకృతికి తిరిగి ఎంతో కొంత ఇవ్వాలని... అందుకోసం మనవంతుగా మొక్కలు నాటాలని సూచించారు. గ్రీన్ ఇండియా ఛాలెంజ్ ద్వారా మొక్కలు నాటే అవకాశాన్ని కల్పించిన ఎంపీ సంతోష్ కుమార్ కు కృతజ్ఞతలు తెలుపుతున్నట్లు నేహా పేర్కొన్నారు.