దీపోత్సవం 2024 సందర్భంగా సీఎం యోగి అయోధ్య ప్రజలను ఉద్దేశించి మాట్లాడుతూ ఎమోషనల్ అయ్యారు. లోక్ సభ ఎన్నికల ఫలితాలను గుర్తుచేసుకుని ఆసక్తికర కామెంట్స్ చేసారు.
అయోధ్య : ముఖ్యమంత్రి యోగి ఆదిత్యనాథ్ బుధవారం రామజన్మభూమి అయోధ్యలో నిర్వహించిన దీపోత్సవ వేడుకలో పాల్గొన్నారు. ముందుగా అయోధ్య బాలరాముడిని దర్శించుకుని ప్రత్యేక పూజలు చేసారు యోగి. అనంతరం ఆ రామయ్య సన్నిధిలోనే దీపాలను వెలిగించి దీపోత్సవ కార్యక్రమాన్ని ప్రారంభించారు. అనంతరం అట్టహాసంగా నిర్వహించిన సరయు నది హారతి కార్యక్రమంలో పాల్గొన్నారు.
దీపోత్సవంలో భాగంగా వెలిగించిన లక్షలాది దీపాల వెలుగులతో అయోధ్య ధగధగా మెరిసిపోయింది. ఇలా లక్షల దీపాలను వెలిగించి వైభవంగా నిర్వహించిన ఈ దీపోత్సవ వేడుక గిన్నిస్ బుక్ రికార్డు సాధించింది. స్వయంగా యోగి ఆదిత్యనాథ్ ఈ గిన్నిస్ రికార్డును అందుకున్నారు.
అనంతరం అయోధ్యలోని రామకథా పార్కులో జరిగిన బహిరంగ సభలో ప్రజలను ఉద్దేశించి సీఎం యోగి ప్రసంగించారు. ఈ సందర్భంగా ఆయన లోక్సభ ఎన్నికల్లో అయోధ్యలోనూ బిజెపి అభ్యర్థి ఓటమి పట్ల బాధ వ్యక్తం చేశారు. గద్గద స్వరంలో ప్రజలను ఉద్దేశించి మాట్లాడుతూ, అయోధ్య కోసం బిజెపి డబుల్ ఇంజిన్ ప్రభుత్వం ఇచ్చిన హామీలన్నీ నెరవేర్చిందని గుర్తుచేసారు. కానీ అయోధ్య ప్రజలు మాత్రం ఇంతచేసిన బిజెపిని ఓడించడం బాధించిందన్నారు. మళ్ళీ అయోధ్య వంతు వచ్చింది... సీతా మాత అగ్నిపరీక్ష మళ్ళీ మళ్ళీ జరగకూడదని, ఈ శాపం నుండి బయటపడాలని ఆయన అన్నారు.
దీపోత్సవం మొదటి కార్యక్రమాన్ని గుర్తుచేసుకుంటూ సీఎం యోగి, అప్పట్లో రామకథా మండపం చిన్నదని, 'యోగీ జీ ఒక్క పని చెయ్యండి, మందిరం కట్టండి' అనే నినాదం వినిపించేదని అన్నారు. మీరు వెలిగించే దీపాలు కేవలం దీపాలు కావని, సనాతన ధర్మ విశ్వాసానికి ప్రతీకలని, శ్రీరాముడి అనుగ్రహం తప్పక కురుస్తుందని అప్పట్లో చెప్పానని గుర్తుచేసుకున్నారు. ప్రపంచం మొత్తం కరోనా మహమ్మారితో అల్లాడిపోతున్న సమయంలో 5 ఆగస్టు 2020న అయోధ్యలో శ్రీరామ మందిర శంకుస్థాపన చేసిన ప్రధాని మోదీ దూరదృష్టికి కృతజ్ఞులమని యోగి ఆదిత్యనాథ్ అన్నారు.
ఈ సంవత్సరం అయోధ్యకు అద్భుతమైనది, అపురూపమైనదని యోగి ఆదిత్యనాథ్ అన్నారు. 22 జనవరి 2024న 500 ఏళ్ల నిరీక్షణకు తెరదించుతూ భగవాన్ శ్రీరాముడు తన జన్మభూమిలో కొలువైనాడని గుర్తుచేసారు. ఎప్పుడూ మీ మార్గం నుండి వైదొలగకండి, పోరాట మార్గంలో నడవండి, విజయం తప్పక సిద్ధిస్తుందనే సందేశాన్ని ఆ అయోధ్య రామయ్య ఇచ్చారని అన్నారు. రామజన్మభూమి ఉద్యమం కోసం, ప్రభు శ్రీరాముడి అనుగ్రహం కోసం తమ జీవితాలను అంకితం చేసిన వారందరినీ స్మరించుకోవడానికి ఇదే సరైన సమయమని, పూజ్య సన్యాసులందరికీ నమస్కారమని అన్నారు.
రామమందిర నిర్మాణం కోసం తమ ప్రాణాలను అర్పించిన మూడున్నర లక్షల మంది అమరులను స్మరించుకోవాల్సిన సమయం ఇదని ముఖ్యమంత్రి అన్నారు. వారి సంకల్పం నెరవేరింది. రామాలయంలో రామ్ లల్లా కొలువయ్యారు. ఇది దీపోత్సవం తర్వాత వచ్చిన మొదటి సందర్భం. ఇంతకు ముందు మేము మాట్లాడేవాళ్ళం, కానీ ఇప్పుడు చేసి చూపించామని సీఎం యోగి అన్నారు.
2017 కంటే ముందు అయోధ్యలో విద్యుత్తు లేదు, రోడ్లు, ఘాట్లు, మఠాలు, మందిరాల పరిస్థితి ఏమిటో అందరికీ తెలుసు. 2017 కంటే ముందు భగవంతుడిని నిర్లక్ష్యం చేసిన వారు, భగవంతుడి ఉనికినే ప్రశ్నించిన వారు, సనాతన ధర్మాన్ని, మీ వారసత్వాన్ని ప్రశ్నించారన్నారు.
అయోధ్యను ప్రపంచంలోనే అత్యంత అందమైన నగరంగా తీర్చిదిద్దుతామని ఈ వేదిక నుండే చెప్పామని ముఖ్యమంత్రి అన్నారు. నేడు ఇక్కడ 31 వేల కోట్ల రూపాయల ప్రాజెక్టులు పూర్తయ్యాయి... ఇంకా కొన్ని పూర్తి కావస్తున్నాయి. సనాతన ధర్మం, మన వారసత్వమని యోగి అన్నారు. అభివృద్ధికి అయోధ్య ఒక ప్రారంభమన్నారు.. నేడు కాశీ, అయోధ్య వెలిగిపోతున్నాయి.... ఇక్కడ భారీ కార్యక్రమాలు జరుగుతున్నాయన్నారు.
అయోధ్య మారిన రూపురేఖలు ప్రపంచాన్ని ఆకర్షిస్తున్నాయని యోగి అన్నారు. అయోధ్యలో ధర్మ పథ్, రామ్ పథ్, జన్మభూమి పథ్, భక్తి పథ్ అనే నాలుగు లేన్ల రోడ్లు ఉంటాయని ఎవరూ ఊహించలేదు. ముందు ప్రజలను వేసవిలో విద్యుత్తు కోసం ఇబ్బంది పెట్టేవారు, రామ్ కి పైడీలో మురికి నీటిలో స్నానం చేయమని బలవంతం చేసేవారు. మేము రామ్ కి పైడీలో సరయు జలాలను ప్రవహింపజేశాము. అయోధ్యను దేశంలోనే మొట్టమొదటి సోలార్ సిటీగా మార్చాము. వేల సంవత్సరాల క్రితం భగవాన్ శ్రీరాముడు పుష్పక విమానంలో అయోధ్యకు వచ్చారని, ఆ తర్వాత అయోధ్యలో విమానం దిగలేదని, మోదీజీ కృపతో అయోధ్యలో ఇంటర్నేషనల్ విమానాశ్రయం నిర్మితమైందని యోగి చమత్కరించారు.
పని చేయని వారు ముందు రామ్ ఉత్సవంపై ప్రశ్నలు లేవనెత్తారని, తర్వాత రామభక్తులపై కాల్పులు జరిపారని, తర్వాత అభివృద్ధి కార్యక్రమాలకు అడ్డంకులు సృష్టించి రైతులను దోపిడీ చేస్తున్నామని అన్నారని ముఖ్యమంత్రి అన్నారు. నాలుగు లేన్ల రోడ్డు నిర్మించామని వ్యాపారులను దోపిడీ చేస్తున్నామని అన్నారు. నాలుగు లేన్ల రోడ్డు నిర్మించకపోతే ఇక్కడ లక్షలాది మంది భక్తులు దర్శనం చేసుకునేవారా? ఇలాంటి వారు అభివృద్ధికి అడ్డంకులు. యూపీని మాఫియా రహితంగా, సురక్షిత రాష్ట్రంగా మార్చినట్లే ఈ అడ్డంకులను తొలగిస్తామని సీఎం యోగి అన్నారు.
సనాతన ధర్మంపై మళ్ళీ మళ్ళీ ప్రశ్నలు లేవనెత్తే వారికి, సనాతన ధర్మం ఎవరికీ హాని చేయలేదని, అందరినీ ఆదరించిందని తెలుసుకోవాలని అన్నారు. ప్రపంచంలో ఏ మతం, సంప్రదాయం అనుసరించే వారికైనా కష్టకాలంలో సనాతన ధర్మమే అభివృద్ధి చెందడానికి, ముందుకు సాగడానికి అవకాశం ఇచ్చింది. కానీ సెక్యులరిజం పేరుతో రాజకీయాలు చేసే వారు సనాతన ధర్మంపై దాడి చేస్తూ, భారతదేశంలో నక్సలిజం, ఉగ్రవాదాన్ని ప్రోత్సహించాలనుకుంటున్నారని ఆందోళన వ్యక్తం చేసారు.
మానవత్వానికి, అభివృద్ధికి అడ్డం వచ్చే వారికి యూపీలో మాఫియాకు ఏం జరిగిందో అదే జరుగుతుందని ముఖ్యమంత్రి అన్నారు. రామయ్య లక్ష్యాన్ని పూర్తి చేయకుండా మేము విశ్రాంతి తీసుకోబోమని, సనాతన ధర్మానికి అడ్డంకులను తొలగించే వరకు మేము విశ్రాంతి తీసుకోబోమని హెచ్చరించారు.
22 జనవరి నాడు ప్రపంచంలోని సనాతన ధర్మాన్ని అవలంబించే అందరూ భారతదేశం ప్రజాస్వామ్య శక్తిని చాటి చెప్పడం పట్ల సంతోషం వ్యక్తం చేశారని ముఖ్యమంత్రి అన్నారు. న్యాయవ్యవస్థ తీర్పును ఎలా అమలు చేయాలో అయోధ్య అద్భుతమైన ఉదాహరణ అన్నారు. భగవంతుడి ఉనికినే ప్రశ్నించిన వారు, రామ్ లేదా సనాతన ధర్మంపైనే కాదు, మన ధర్మం, మన పూర్వీకులపై ప్రశ్నలు లేవనెత్తారని, అయినా మనం మౌనంగా ఉన్నామని యోగి అన్నారు.
యూపీ దేశంలో అత్యధిక జనాభా కలిగిన రాష్ట్రమని ముఖ్యమంత్రి అన్నారు. ఇది అభివృద్ధి చెందితే భారతదేశం అభివృద్ధి చెందుతుంది. వారసత్వం, అభివృద్ధి అద్భుతంగా సమన్వయం కావడానికి కాశీ, అయోధ్య, మధుర, వృందావన్, బర్సాన, కౌశాంబి, కుషినగర్ వంటి ప్రదేశాల్లో నిరంతరం కార్యక్రమాలు జరుగుతున్నాయి. ఈ డబుల్ ఇంజిన్ ప్రభుత్వం నైమిశారణ్య, శుక్తీర్థ అభివృద్ధి కోసం కృషి చేస్తోందన్నారు.
ఆరోగ్యం, విద్య, అభివృద్ధి, ఉపాధి కోసం కార్యక్రమాలు జరుగుతున్నాయి. భద్రత గురించి చెప్పనక్కర్లేదు. పెద్ద పెద్ద మాఫియా, గూండాలు, దుండగులపై బజరంగ్ బలి గద పడితే, ఖర, దూషణ వంటి రాక్షసులు ఎలా విలవిలలాడిపోయారో అలాగే వారు కూడా విలవిలలాడిపోయారని అన్నారు. అయోధ్యలో ఉన్నట్లే కాశీ, మధురలో కూడా ఉండాలి. అన్ని చోట్లా అభివృద్ధే కనిపించాలి... ఎక్కడా దారిద్య్రం, దుఃఖం ఉండకూడదనే దిశగా అడుగులు వేస్తున్నామన్నారు.
ఈ కార్యక్రమంలో కేంద్ర పర్యాటక, సాంస్కృతిక శాఖ మంత్రి గజేంద్ర సింగ్ షెకావత్, డిప్యూటీ సీఎం బ్రజేష్ పాఠక్, క్యాబినెట్ మంత్రి సూర్య ప్రతాప్ షాహి, స్వతంత్ర దేవ్ సింగ్, జైవీర్ సింగ్, సతీష్ చంద్ర శర్మ, ఎమ్మెల్యే వేద్ ప్రకాష్ గుప్తా, జిల్లా పరిషత్ అధ్యక్షురాలు రోలీ సింగ్, మేయర్ మహంత్ గిరీష్ పతి త్రిపాఠి, ఎమ్మెల్సీ హరిఓం పాండే, జగద్గురు రామానుజాచార్య స్వామి రాఘవాచార్య జీ మహారాజ్, విశ్వేష్ ప్రపన్న జీ మహారాజ్, రామ్ దినేశాచార్య జీ మహారాజ్, మణిరామ్ దాస్ చావనీ మహంత్ కమల్ నయన్ దాస్, అవధేష్ దాస్, రాజ్ కుమార్ దాస్, దేవేంద్ర ప్రసాద్ ఆచార్య, భరత్ దాస్, ధర్మ దాస్, మహంత్ సంతోష్ దాస్, రామ్ దాస్ జీ మహారాజ్ వంటి అయోధ్య పూజ్య సన్యాసులు, అధికారులు పాల్గొన్నారు.