ప్రజలు తిరగబడతారు.. ఎన్నికలు తథ్యం: బీజేపీ లక్ష్మణ్

రాష్ట్రంలో ప్రజలు తిరగబడితే ఎన్నికలు ఎప్పుడైనా రావొచ్చని లక్ష్మణ్ అభిప్రాయపడ్డారు. కార్మికులు, ఉద్యోగులు, ఉపాధ్యాయులను కేసీఆర్ బెదిరింపులకు గురిచేస్తున్నారని ఆయన ఆరోపించారు.

కొత్త మున్సిపల్ చట్టంపై తెలంగాణ బీజేపీ అధ్యక్షుడు డాక్టర్ లక్ష్మణ్ తీవ్ర స్థాయిలో మండిపడ్డారు. మంగళవారం రాష్ట్ర బీజేపీ కార్యాలయంలో మీడియాతో మాట్లాడిన ఆయన.. కొత్త పురపాలక చట్టంపై గవర్నర్‌కు ఫిర్యాదు చేస్తామని తెలిపారు.

మజ్లిస్ కోసం టీఆర్ఎస్ సర్కార్ కొత్త పురపాలక చట్టాన్ని తీసుకొస్తొందని లక్ష్మణ్ ఆరోపించారు. కేసీఆర్, కేటీఆర్‌లకు బీజేపీ అంటే భయం పట్టుకుందని తాము అసెంబ్లీలో లేకపోయినా తలచుకుంటున్నారని ఆయన ఎద్దేవా చేశారు.

రాష్ట్రంలో ప్రజలు తిరగబడితే ఎన్నికలు ఎప్పుడైనా రావొచ్చని లక్ష్మణ్ అభిప్రాయపడ్డారు. కార్మికులు, ఉద్యోగులు, ఉపాధ్యాయులను కేసీఆర్ బెదిరింపులకు గురిచేస్తున్నారని ఆయన ఆరోపించారు.

హుజూర్‌నగర్‌ ఉపఎన్నికకు సంబంధించి మాట్లాడుతూ.. టికెట్ కోసం ఎనిమిది మంది పోటీపడుతున్నారని లక్ష్మణ్ వెల్లడించారు.

తెలంగాణ కోసం బలిదానం చేసుకున్న శ్రీకాంతాచారి తల్లి శంకరమ్మను తాము కలవలేదని.. ఆమె కూడా బీజేపీని సంప్రదించలేదని లక్ష్మణ్ స్పష్టం చేశారు. అభ్యర్ధుల జాబితాను పార్టీ జాతీయాధ్యక్షుడు అమిత్ షాకు పంపుతామని ఆయన పేర్కొన్నారు.