మనోహరాచారిని తన్నింది నేను కాదు.. అసద్

మనోహరాచారిని తన్నినట్టు సీసీటీవీలో కనిపిస్తున్న యువకుడు.. ఎర్రగడ్డ డివిజన్‌ జహరా గుల్హన్‌ నూర్‌ బాగ్‌బస్తీకి చెందిన అసద్‌ అని ప్రచారం జరిగింది.

నడి రోడ్డుపై కూతురు, అల్లుడిపై ఇటీవల ఓ వ్యక్తి దాడి చేసిన సంగతి అందరికీ గుర్తుండే ఉంటుంది. మనోహరాచారి అనే వ్యక్తి.. తన కూతురు వేరే కులస్థుడిని ప్రేమించి పెళ్లి చేసుకుందనే కారణంతో నడి రోడ్డుపై కొబ్బరిబోండాలు నరికే కత్తితో కూతురు, అల్లుడిపై దాడి చేశాడు. ఈ ఘటనలో కూతురు మాధవి ప్రస్తుతం ఆస్పత్రిలో చికిత్స పొందుతుండగా.. అల్లుడు స్వల్ప గాయాలతో బయటపడ్డాడు.

అయితే.. ఈ ఘటనలో ఓ వ్యక్తి హీరో అయ్యాడు. మనోహరాచారి కూతురిపై దాడి చేస్తున్న సమయంలో ఓ వ్యక్తి అతనిని కాలితో తన్నాడు. ఆ సమయంలో అతను మనోహరాచారిని అలా అడ్డుకోకుంటే.. ఈ పాటికి మాధవి కన్నుమూసి ఉండేది. అతను అలా దాడిచేయడం వల్లే మనోహరాచారి అక్కడి నుంచి పారిపోయాడు. మనోహరాచారిని తన్నినట్టు సీసీటీవీలో కనిపిస్తున్న యువకుడు.. ఎర్రగడ్డ డివిజన్‌ జహరా గుల్హన్‌ నూర్‌ బాగ్‌బస్తీకి చెందిన అసద్‌ అని ప్రచారం జరిగింది.

‘యువతిని రక్షించేందుకు ఒక యువకుడు ప్రాణాలకు తెగించాడు. సంఘటనా స్థలంలో చాలా మంది ఉన్నా.. విచక్షణారహితంగా నరుకుతుంటే చూస్తే ఉన్నారే తప్ప, ఎవరూ స్పందించలేదు. ఈ క్రమంలో మనోహరాచారిని వెనుకనుంచి ఓ యువకుడు బలంగా తన్నాడు. దీంతో మనోహరాచారి వెనక్కి తగ్గాడు.’ అంటూ ఓ వీడియో సోషల్‌ మీడియాలో వైరల్‌ అయింది. అయితే, ఈ సాహసం చేసింది తానేనని అసద్‌ అనే యువకుడు చెప్పుకున్నాడని కూడా సోషల్‌ మీడియాలో వచ్చింది. ఇదే విషయాన్ని మీడియా కూడా ప్రచురించింది. 

ఈ నేపథ్యంలో ఎస్‌ఆర్‌నగర్‌ సీఐ వెంకటేశ్వరరావు అసద్‌ను పిలిచి విచారించారు. అది తాను కాదని అసద్‌ స్పష్టం చేశాడు. సోషల్‌ మీడియాలో జరిగిన ప్రచారంలోనూ తన ప్రమేయం లేదని చెప్పారు. ఆ సాహస యువకుడిని గుర్తించేందుకు ఎస్‌ఆర్‌నగర్‌ పోలీసులు సీసీ టీవీ ఫుటేజీలు పరిశీలిస్తున్నారు.

related news