రక్షణ కోసం.. సుప్రీంను ఆశ్రయించిన సానా సతీష్ బాబు

సీబీఐలోని ఇద్దరు అత్యున్నత అధికారుల మధ్య ఆధిపత్య పోరులో కీలకవ్యక్తి సానా సతీశ్ బాబు సుప్రీంకోర్టును ఆశ్రయించాడు. స్పెషల్ డైరెక్టర్ రాకేశ్ ఆస్థానాకు లంచం ఇచ్చిన ఆరోపణలపై విచారణకు హాజరవ్వాల్సిందిగా సతీశ్ సానాకు సీబీఐ నోటీసులు పంపింది. అలాగే ఆయన ఇళ్లు, కార్యాలయాల్లో సోదాలు సైతం నిర్వహించింది. ఈ క్రమంలో సీబీఐ విచారణ నుంచి తనను రక్షించాల్సిందిగా సతీష్ బాబు సుప్రీంలో పిటిషన్ దాఖలు చేశాడు.

ఢిల్లీకి చెందిన మాంసం ఎగుమతిదారుడు మోయిన్ ఖురేషి కేసులో తనను విచారణ నుంచి తప్పించాల్సిందిగా హైదరాబాద్‌కు చెందిన సానా సతీశ్ బాబు.. సీబీఐ స్పెషల్ డైరెక్టర్ రాకేశ్ ఆస్థానాకు రూ.2 కోట్లు లంచం ఇచ్చినట్లుగా తెలుస్తోంది. 2017 డిసెంబర్ నాటి ఈ వ్యవహారంలో రాకేశ్ ఆస్థానాపై సీబీఐ ఎఫ్ఐఆర్ నమోదు చేయడం దేశంలో సంచలనం సృష్టించిన సంగతి తెలిసిందే.