ఇంటికొస్తే కొత్త డిజైన్లు చూపిస్తానని... యువతిపై అత్యాచారం

తన వద్ద తరచుగా ఆభరణాలు కొనుగోలు చేసే యువతిపై అత్యాచారయత్నం చేశాడు ఓ ఆభరణాల వ్యాపారి. బెంగళూరు కురుబరహళ్లికి చెందిన సుభాష్ అనే వ్యక్తి రిషబ్ జ్యూవెలర్స్ పేరిట నగల దుకాణాన్ని నడుపుతున్నాడు.

ఆయన వద్ద తరచుగా నగలు కొనుగోలు చేసే ఓ 21 ఏళ్ల యువతితో సుభాష్‌కి మంచి పరిచయం ఏర్పడింది. ఆమెపై కన్నేసిన సుభాష్ ఎలాగైనా లోబరుచుకోవాలనుకున్నాడు. ఈ క్రమంలో గత నెల 26వ తేదీన నగలు కొనేందుకు దుకాణానికి వెళ్లిన యువతికి... ఇంట్లో కొత్త రకం డిజైన్లు ఉన్నాయని చెప్పాడు.

ఆమెను వెంటబెట్టుకుని అదే భవనంలోని పై అంతస్తులో ఉన్న ఇంటికి తీసుకెళ్లాడు. తలుపుకి గడియ పెట్టి యువతిపై అత్యాచారం చేసేందుకు ప్రయత్నించాడు. తీవ్రంగా ప్రతిఘటించిన ఆమె ఎలాగోలా తప్పించుకుని బయటికి పారిపోయింది.

అయితే ఈ విషయాన్ని ఎవరికైనా చెబితే.. తన వద్ద అత్యాచారయత్నం చేసిన వీడియోలున్నాయని వాటిని సోషల్ మీడియాలో పెడతానని సుభాష్ బెదిరించాడు. భయపడిన యువతి స్నేహితురాళ్ల సాయంతో పోలీసులకు ఫిర్యాదు చేసింది. కేసు నమోదు చేసుకున్న పోలీసులు సుభాష్‌ను అదుపులోకి తీసుకున్నారు.