వి.జి సిద్ధార్థ ఇంట్లో మరో విషాదం: తండ్రి గంగయ్య కన్నుమూత

కొద్దిరోజుల క్రితం ఆత్మహత్య చేసుకున్న కేఫ్ కాఫీ డే వ్యవస్థపాకులు వి.జి. సిద్ధార్థ తండ్రి గంగయ్య హెగ్డే కన్నుమూశారు. ఆయన వయసు 96 సంవత్సరాలు. వయసు సంబంధిత అనారోగ్యంతో బాధపడుతున్న గంగయ్య కొద్దిరోజుల నుంచి మైసూరులోని ఓ ప్రైవేట్ ఆసుపత్రిలో ఐసీయూలో చికిత్స పొందుతున్నారు.

గత నెలలో ఆత్మహత్య చేసుకోవడానికి ముందు సిద్ధార్థ ఆసుపత్రిలో చికిత్స పొందుతున్న తన తండ్రిని చివరిసారిగా చూసి అనంతరం నేత్రావతి నదిలో దూకి బలవన్మరణానికి పాల్పడ్డారు.

కాగా.. సిద్ధార్ధ చనిపోయిన సంగతి గంగయ్యకు ఇంతవరకు తెలియకపోవడం దురదృష్టకరం. కేఫ్ కాఫీ డే వ్యవస్థాపకుడు, కర్ణాటక మాజీ సీఎం ఎస్ఎం కృష్ణ అల్లుడు గత నెల 31న మంగళూరులోని నేత్రావతి నది వంతెనపై నుంచి నడుచుకుంటూ వెళుతూ అదృశ్యమవ్వడం కలకలం రేపింది.

దీంతో ఆయన కోసం కర్ణాటక పోలీసులు, ఎన్డీఆర్ఎఫ్ సిబ్బంది తీవ్రంగా గాలించారు. 36 గంటల పాటు నేత్రావతి నదిని జల్లెడపట్టిన అనంతరం సిద్ధార్థ మృతదేహాన్ని కనుగొన్నారు.

ఆదాయపు పన్నుశాఖ వేధింపులతో పాటు ప్రైవేట్ ఈక్విటీ మేనేజర్ నుంచి ఒత్తిడి కారణంగానే తాను ఆత్మహత్య చేసుకుంటున్నట్లు సిద్ధార్థ సూసైడ్ నోట్‌లో పేర్కొన్నారు.