సాధారణంగా చాలామందికి గోళ్ల దగ్గర చర్మం ఊడిపోతూ ఉంటుంది. దీని వల్ల నొప్పితో పాటు గోళ్ల అందం కూడా పోతుంది. అసలు గోళ్ల దగ్గర చర్మం ఎందుకు ఊడిపోతుందో మీకు తెలుసా? దానికి కారణాలు, నివారణ మార్గాలు ఇక్కడ తెలుసుకుందాం
చాలామందికి చేతి గోళ్ల చుట్టూ చర్మం ఊడిపోవడం మనం చూస్తుంటాం. దీనివల్ల విపరీతమైన నొప్పి వస్తుంది. కొందరైతే సరిగ్గా తినలేరు కూడా. చాలా మంది దీన్ని చిన్న విషయంగా భావించి పట్టించుకోరు. అయితే ఈ సమస్య తరచుగా వస్తుంటే దానికి కారణాలు తెలుసుకోవాలి అంటున్నారు నిపుణులు. గోళ్ల చుట్టూ చర్మం ఊడడానికి కారణాలు, నివారించే చిట్కాలు ఇక్కడ చూద్దాం.
చలి కాలం, పొడి వాతావరణం:
చలి కాలంలో గాలిలో తేమ శాతం తగ్గుతుంది. దీని వల్ల చర్మం పొడిబారి పగుళ్లు వస్తాయి. ఈ మార్పు మొదట చేతులపై కనిపిస్తుంది. క్రమంగా వేళ్లపై చర్మం ఊడటం మొదలవుతుంది.
తరచుగా చేతులు కడగడం లేదా శానిటైజర్ ఉపయోగించడం:
కరోనా తర్వాత శానిటైజర్ వాడటం, తరచుగా చేతులు కడగడం ఎక్కువైంది. అయితే, ఎక్కువగా సబ్బు లేదా ఆల్కహాల్ కలిగిన శానిటైజర్ వాడటం వల్ల చర్మం పొడిబారుతుంది. దీని వల్ల చర్మం ఊడిపోతుంది.
శరీరానికి తగినంత విటమిన్ బి, ఈ, సి, ఐరన్ అందకపోతే చర్మం బలహీనంగా మారుతుంది. ముఖ్యంగా మీ ఆహారంలో ఆకుకూరలు, పండ్లు, ఆరోగ్యకరమైన కొవ్వులు లేకపోతే వేళ్లపై చర్మం త్వరగా ఊడిపోతుంది.
చర్మ ఇన్ఫెక్షన్:
వేళ్లపై చర్మం దురదగా, ఎర్రగా, వాపుగా ఉంటే అది చర్మ ఇన్ఫెక్షన్ లేదా అలర్జీకి సంకేతం కావచ్చు. దీని వల్ల వేళ్లపై చర్మం ఊడటం మొదలవుతుంది.
మానసిక ఒత్తిడి:
కొందరు ఎక్కువ ఒత్తిడిలో ఉన్నప్పుడు ఏం చేస్తున్నారో తెలియకుండా వేళ్లపై చర్మాన్ని తీయడం మొదలుపెడతారు. ఇది ఒక రకమైన ఆందోళనకరమైన అలవాటు. ఈ అలవాటు క్రమంగా పెరిగి వేళ్ల చర్మాన్ని దెబ్బతీస్తుంది.
మాయిశ్చరైజర్:
పొడిబారిన చర్మాన్ని నయం చేయడానికి చర్మాన్ని తేమగా ఉంచాలి. కొబ్బరి నూనె, కలబంద లేదా ఏదైనా మంచి మాయిశ్చరైజర్‌ను రోజుకు రెండు, మూడు సార్లు చేతులకు రాయండి.
వేడి నీరు:
వేలి కొనల వద్ద చర్మం తరచుగా ఊడుతుంటే, చేతులను గోరువెచ్చని నీటిలో 10 నిమిషాలు ఉంచాలి. తర్వాత కొద్దిగా మాయిశ్చరైజర్ లేదా గ్లిసరిన్ రాయండి. ఇది చర్మాన్ని బాగు చేస్తుంది.
పండ్లు, కూరగాయలు, గింజలు, పెరుగు వంటి పోషకాలు అధికంగా ఉండే ఆహారాన్ని ఎక్కువగా తీసుకోండి. ఇవి చర్మాన్ని లోపలి నుంచి తేమగా ఉంచడానికి సహాయపడతాయి. ముఖ్యంగా తగినంత నీరు తాగడం అలవాటు చేసుకోండి.
చేతులను రక్షించుకోండి:
పాత్రలు కడగడం, బట్టలు ఉతకడం, ఇల్లు శుభ్రం చేయడం లాంటి పనులు చేసేటప్పుడు తప్పనిసరిగా చేతి తొడుగులు వాడండి.
చర్మం ఊడగొట్టే అలవాటును మానుకోండి!
ఒత్తిడిలో ఉన్నప్పుడు గోళ్ల వద్ద చర్మాన్ని ఊడగొట్టే అలవాటు ఉంటే వెంటనే ఆ అలవాటును మార్చుకోవడానికి ప్రయత్నించండి. బదులుగా వేరే ఏదైనా విషయంపై దృష్టి పెట్టండి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి