Oral Health: దంతాలు తెల్లగా, బలంగా మారాలంటే .. సింపుల్‌గా ఇలా చేయండి చాలు..

Oral Health: దంతాలు శుభ్రంగా ఉంటేనే నోరు పరిశుభ్రంగా ఉంటుంది. అయితే కొంతమందిలో దంతాలు పుచ్చిపోవటం, చిగుళ్ల నొప్పి, పంటి నొప్పి, రక్తం కారటం, పళ్లు పుచ్చుపట్టిపోవటం వంటివి సమస్యలు కనిపిస్తాయి. ఈ సమస్యలన్నింటికి చెక్ పెట్టాలంటే..  ఈ టిప్స్ ఫాలోకండి.

బలంగా తోముకోవడం

చాలామంది పళ్ళను గట్టిగా తోమితేనే శుభ్రంగా అవుతాయని భావిస్తారు.  కానీ, ఇది పూర్తిగా తప్పు. పళ్లను గట్టిగా తోముకోవడం వల్ల మీ పళ్ళ ఎనామిల్ దెబ్బతింటుంది. దీనివల్ల పళ్ళు సున్నితంగా మారి, చల్లని లేదా వేడి ఆహారాలను తీసుకోలేకపోతారు. అంతేకాకుండా.. చిగుళ్ళు వెనక్కి జరిగి, పళ్ళ వేర్లు బయటపడవచ్చు. ఇది పళ్ళ ఆరోగ్యానికి చాలా ప్రమాదకరం. మృదువైన లేదా మధ్యస్థ ముళ్ళు కలిగిన టూత్ బ్రష్‌ను ఉపయోగించండి. బ్రష్‌ను ఎక్కువగా నొక్కకుండా, చిగుళ్ళను దెబ్బతీయకుండా తోముకోవడం చాలా ముఖ్యం.

బ్రషింగ్ చేసే విధానం

పళ్ళు తోముకునేటప్పుడు చాలామంది ముందుకు-వెనుకకు తోముకుంటారు. ఈ పద్ధతి పళ్ళ మధ్యలో చిక్కుకున్న ఆహార కణాలను తొలగించదు, అంతేకాకుండా చిగుళ్ళు, పళ్ళను దెబ్బతీస్తుంది. దంత వైద్యులు సాధారణంగా "బాస్ పద్ధతి" లేదా "మోడిఫైడ్ బాస్ పద్ధతి" వంటి టెక్నిక్‌లను సూచిస్తారు. ఈ పద్ధతుల్లో, టూత్ బ్రష్‌ను చిన్న, వృత్తాకార కదలికలతో తోమాలి. ప్రతి భాగాన్ని కనీసం 10-15 సెకన్ల పాటు తోమాలి.

నాలుక శుభ్రం

పళ్ళు తోముకోవడంతో నోటి శుభ్రత పూర్తి అయినట్టు కాదు. పళ్లతో పాటు  నాలుకను కూడా శుభ్రం చేసుకోవాలి. నాలుకపై అనేక బ్యాక్టీరియా  ఉండి, దుర్వాసన,  పళ్ళు పాడవడానికి కారణమవుతాయి. పళ్ళు తోముకున్న తర్వాత, మీ నాలుకను కూడా శుభ్రం చేసుకోండి. చాలా టూత్ బ్రష్‌ల వెనుక భాగంలో నాలుక శుభ్రం చేసుకోవడానికి ప్రత్యేక భాగం ఉంటుంది. లేదంటే, tongue cleaner ఉపయోగించవచ్చు. ఇది నాలుకపై ఉన్న బ్యాక్టీరియా, ఆహార కణాలను సమర్థవంతంగా తొలగించి, నోటి దుర్వాసనను నివారిస్తుంది.

ఎంత సమయం?

చాలామంది తొందరలో ఒక నిమిషంలోనే పళ్ళు తోముకుంటారు. ఇది పళ్ళను పూర్తిగా శుభ్రం చేయడానికి సరిపోదు. అదేవిధంగా, చాలా సేపు తోముకోవడం కూడా పళ్ళు, చిగుళ్ళకు హాని కలిగిస్తుంది. రోజుకు రెండుసార్లు, ప్రతిసారీ కనీసం రెండు నిమిషాలు పళ్ళు తోముకోవడం చాలా ముఖ్యం. ఎలక్ట్రిక్ టూత్ బ్రష్‌లలో చాలా వాటిలో టైమర్లు ఉంటాయి, అవి తోముకునే సమయాన్ని ట్రాక్ చేయడంలో సహాయపడతాయి.

ఏ సమయంలో ?

చాలామంది ఉదయం లేవగానే పళ్ళు తోముకుని, ఆ తర్వాత టిఫిన్ తింటారు. టిఫిన్ తిన్న తర్వాత పళ్ళకు అంటుకున్న ఆహార కణాలను తొలగించకపోవడం వల్ల బ్యాక్టీరియా పెరుగుదలకు దారితీస్తుంది. టిఫిన్ తిన్న తర్వాత నోరు శుభ్రం చేసుకోవాలి. ఆ తర్వాత పడుకునే ముందు పళ్ళు తోముకోవడం చాలా ముఖ్యం, ఎందుకంటే రాత్రిపూట లాలాజల ఉత్పత్తి తగ్గి బ్యాక్టీరియా పెరుగుదల ఎక్కువగా ఉంటుంది.

చిట్కాలు:

మూడు నెలలకు ఒకసారి కొత్త టూత్ బ్రష్‌ను ఉపయోగించండి. రోజుకు ఒకసారి పళ్ళ మధ్య చిక్కుకున్న ఆహార పదార్థాలను తొలగించడానికి dental floss ఉపయోగించండి. 

బ్యాక్టీరియాను తగ్గించడానికి, నోటిని శుభ్రంగా ఉంచుకోవడానికి Mouthwash ఉపయోగించవచ్చు.

చక్కెర ఎక్కువగా ఉండే ఆహారాలు, పానీయాలను తగ్గించడం పళ్ళ ఆరోగ్యానికి మంచిది.

కాల్షియం, విటమిన్ D అధికంగా ఉండే ఆహారాలు పళ్ళను బలోపేతం చేస్తాయి.  

కనీసం ఆరు నెలలకు ఒకసారి దంత వైద్యుడిని సంప్రదించి దంత పరీక్ష,  శుభ్రపరచుకోవడం వల్ల పళ్ళు, చిగుళ్ళ ఆరోగ్యాన్ని కాపాడుకోవచ్చు.