Ragi Java: చలికాలంలో రాగి జావ తాగితే ఏమౌతుంది?

Ragi Java: మన సంప్రదాయ ఆహారాలల్లో రాగి కూడా ఒకటి. ఇలాంటి రాగిని జావ రూపంలో ప్రతిరోజూ ముఖ్యంగా చలికాలంలో తీసుకుంటే శరీరంలో ఎలాంటి మార్పులు జరుగుతాయో తెలుసా?

రాగి జావ

చలికాలం మొదలైన వెంటనే చాలా మందిలో ఆరోగ్య సమస్యలు వస్తూ ఉంటాయి. ఇది చాలా సాధారణం. ఈ సీజన్ లో చల్లని గాలులు, ఉష్ణోగ్రతలు తగ్గుతాయి. దీని కారణంగా జలుబు, దగ్గు, జీర్ణ సమస్యలు, కీళ్ల నొప్పులు వంటి ఇబ్బందులు తరచుగా ఎదురౌతూ ఉంటాయి. ఈ కాలంలో శరీరాన్ని వెచ్చగా ఉండే, రోగనిరోధక శక్తిని పెంచే ఆహారం తీసుకోవడం చాలా అవసరం. అలాంటి ఆహారాల్లో రాగి జావ ముందు వరసలో ఉంటుంది. మరి, అలాంటి రాగి జావను చలికాలంలో తీసుకుంటే ఏమౌతుంది? ఎలాంటి ప్రయోజనాలు కలుగుతాయో ఇప్పుడు చూద్దాం....

రాగి జావ ప్రయోజనాలు..

1.రోగనిరోధక శక్తిని పెంచుతుంది....

చలికాలంలో పిల్ల నుంచి పెద్దల వరకు అందరికీ జలుబు, ఫ్లూ వంటి ఇన్ఫెక్షన్లు ఎక్కువగా వస్తాయి. వీటిని ఎదుర్కోవడానికి బలమైన రోగనిరోధక శక్తి అవసరం. రాగిలో ఉండే యాంటీ ఆక్సిడెంట్లు, ఫాలీ ఫెనాల్స్ , అమైనో యాసిడ్స్ శరీర రక్షణా వ్యవస్థను బలపరుస్తాయి. రోజూ లేదా వారానికి ఒకసారి రాగి జావ తీసుకుంటే, చలికాలంలో వచ్చే వైరల్ జ్వరాలు, ఇన్ఫెక్షన్ల నుంచి శరీరాన్ని కాపాడే కవచంలా పని చేస్తుంది.

2.జీర్ణక్రియను మెరుగుపరుస్తుంది...

చలికాలంలో నీరు తక్కువగా తాగడం, శారీరక చురుకుదనం తగ్గడం వల్ల మలబద్దకం, గ్యాస్, అజీర్ణం వంటి సమస్యలు ఎక్కువగా వస్తూ ఉంటాయి. రాగి జావలో ఉండే ఫైబర్ జీర్ణక్రియను మెరుగుపరుస్తుంది. ఇది పేగుల కదలికలను సరిచేసి, మలబద్ధకాన్ని నివారిస్తుంది. అంతేకాదు, పేగుల్లో మంచి బాక్టీరియా పెరుగుదలకు సహాయపడుతూ, మొత్తం జీర్ణ వ్యవస్థను ఆరోగ్యంగా ఉండేలా చేస్తుంది.

3. శరీర బరువును నియంత్రించడంలో సహాయపడుతుంది

చలికాలంలో ఆకలి ఎక్కువవడం సహజం. దీంతో వేడి, నూనెలో వేయించిన ఆహారాలు, స్వీట్లు ఎక్కువగా తినాలనిపిస్తుంది. ఇది బరువు పెరగడానికి కారణమవుతుంది. రాగి జావ తాగితే ఎక్కువసేపు కడుపు నిండిన భావన ఉంటుంది. రాగిలోని ట్రిప్టోఫాన్ వంటి అమైనో ఆమ్లాలు ఆకలిని నియంత్రించడంలో సహాయపడతాయి. దీంతో అనవసరంగా చిరుతిళ్లు తినే అలవాటు తగ్గి, బరువు అదుపులో ఉంటుంది.

మధుమేహం ఉన్న వారికి కూడా...

4.షుగర్ లెవల్స్ కంట్రోల్ లో ఉంటాయి...

మధుమేహం ఉన్నవారు కూడా రోజూ రాగి జావ తాగడం మంచి ఆప్షన్. రాగి లో తక్కువ గ్లైసెమిక్ ఇండెక్స్ ఉండటం వల్ల, ఇది రక్తంలో చక్కెరను నెమ్మదిగా పెంచుతుంది. చక్కెర స్థాయిలు ఒక్కసారిగా పెరగకుండా నియంత్రణలో ఉంటాయి. అందువల్ల డయాబెటిస్ ఉన్నవారు కూడా నిశ్చింతగా రాగి జావ తీసుకోవచ్చు.

5. శరీరాన్ని వెచ్చగా ఉంచుతుంది

చలికాలంలో రాగి జావ తీసుకోవడం వల్ల కలిగే ముఖ్యమైన ప్రయోజనం – శరీరానికి సహజమైన వెచ్చదనం అందించడం. రాగి శరీర ఉష్ణోగ్రతను సమతుల్యం చేయడంలో సహాయపడుతుంది. ఉదయం పూట లేదా రాత్రి వేళ రాగి జావ తాగితే, శరీరానికి తక్షణ శక్తి లభిస్తుంది. అలసట తగ్గి, చలికాలపు బద్ధకాన్ని దూరం చేస్తుంది.

ఫైనల్ గా....

అందువల్ల, ఈ చలికాలంలో రాగి జావను కేవలం రుచి కోసం మాత్రమే కాకుండా, ఆరోగ్యాన్ని కాపాడుకునే ఒక సంపూర్ణ ఆహారంగా మీ దినచర్యలో చేర్చుకోవచ్చు. ఇది శరీరాన్ని వెచ్చగా ఉంచడంతో పాటు, రోగనిరోధక శక్తిని పెంచి, మిమ్మల్ని చురుకుగా, ఆరోగ్యంగా ఉంచడంలో సహాయపడుతుంది.